කීර්ති ප්රනාන්දු –
මෙවර නත්තල් සහ අලුත් අවුරුදු සමය වෙනුවෙන් රතිඤ්ඤා සහ ගිනි කෙළි භාණ්ඩ අලෙවිය බරපතල බිඳවැටීමකට ලක්වී ඇතැයි කිඹුලාපිට පාරම්පරික රතිඤ්ඤා කර්මාන්ත කරුවෝ පවසති .
ඒ අනුව මෙවර රතිඤ්ඤා සහ ගිනි කෙළි භාණ්ඩ අලෙවිය සියයට හැටකට අධික බිඳවැටීමක් සිදුවී ඇතැයි ඔවුහු කියා සිටිති .
මෙය ඉකුත් වසර වල අලවියට සාපේක්ෂව විශාල බිඳවැටීමක් බව පෙන්වා දෙන රතිඤ්ඤා නිෂ්පාදකයෝ වෙනත් වසරවල මේ වන විට සැපයුම් ලබාදිය නොහැකි තරම් ඇනවුම් ලැබෙන බවත් මෙවර එම ඇණවුම් සම්පූර්ණයෙන්ම නැවතී ගොස් ඇති බවද කියා සිටිති.
මහජනතාවට බලපා ඇති ආර්ථික අපහසුතා නිසා ඔවුන් උත්සව සැමරීමට උනන්දුවක් නොදැක්වීම රතිඤ්ඤා අලෙවියට බිඳ වැටීමට හේතු වී ඇතැයිද රතිඤ්ඤා නිෂ්පාදකයන් පැවසීය .
අප මේ පිළිබඳව සොයා බැලීම සඳහා කිඹුලාපිටිය ප්රදේශයේ සංචාරයක නිරත විය. එහිදී අදහස් දැක්වූ පාරම්පරික ගිණිකෙළි කර්මාන්ත කරුවෙකු වන කෝනියන් ගිනිකළි කර්මාන්ත ආයතනයේ අධිපති ඩබ්ලිව් .පී. නිව්ටන් ප්රනාන්දු මෙසේ කීවේය :-
මෙවර නත්තල් සහ අලුත් අවුරුදු ගිනිකෙළි වෙළඳාම සියයට 75කින්ම බිඳවැටිලා තියෙනව . වෙනත් වසර වල මේ වෙනකොට බඩු ඉවරයි . ඊට පස්සේ ඉල්ලුම් කරන ඇනවුම් ගෙනල්ලා දෙන්නෙත් පිටින් . තවම වෙළඳුන් එන්නේ නැහැ ගිනි කෙළි මිලදීගෙන යන්න . ආවත් ඒ වෙළෙන්දා ගෙනියන්නේ බඩු ටිකයි . පාරිභෝගික ජනතාවට තියෙන ආර්ථික ප්රශ්න නිසා ඒ ජනතාව රතිඤ්ඤා ඇතුළු ගිනි කෙළි භාණ්ඩ මිලදී ගන්න යොමු වෙන්නේ නැහැ. ඒකයි තියෙන ලොකුම ප්රශ්නය . ඒ නිසාම තමයි අපේ නිෂ්පාදනයන් අලෙවි වෙන්නෙත් නැත්තේ . නත්තල් කාලෙට වැඩිපුරම විකිණෙන්නේ අහස් කූරු ,විසිල් බඹර , නිලා කූරු, මල් වෙඩි වර්ග… ඒවා සේරම මේ වෙනකොට ඉතුරු වෙලා . චන්දෙට ලක්ෂ ගණනක රතිඤ්ඤා හැදුවා . ඒවත් කොහෙත්ම විකුණුනේ නැහැ .මොකද චන්දෙට රතිඤ්ඤා පත්තු කරන්න එපා කියලා. ජනාධිපතිතුමා කිව්ව නිසා කවුරුත් රතිඤ්ඤා පත්තු කළේ නෑ. මේ නිසාම මේ වෙනකොට රුපියල් ලක්ෂ 15කට අධික පාඩුවක් දරන්න සිද්ධ වෙලා තියෙනවා.
මේක හරියට සුනාමියක් ආවා වගේ උනේ . කවදාවත් නත්තලට මෙහෙම වෙළඳාම නැතිව ගියේ නැහැ . වියදම් කරපු මුදල වත් කොහොමද හොයාගන්නේ කියලයි අපි කල්පනා කරන්නේ . මේ තත්ත්වය කිඹුල පිටියේ ගිනි කෙළි කර්මාන්ත කරුවන්ට විශාල ප්රශ්නයක් . කර්මාන්තය පවත්වාගෙන යාමත් විශාල ප්රශ්නයක්.” ඔහු පැවසීය .
සමස්ත ලංකා ගිනිකෙළි භාණ්ඩ නිෂ්පාදකයින්ගේ සංගමයේ සභාපති දිනේෂ් ප්රනාන්දු :-
නත්තල් සහ අලුත් අවුරුදු සමය වෙනුවෙන් රතිඤ්ඤා ඇතුළු ගිනිකෙළි අලවිය එකට එකකින් අඩුවෙලා. වෙන වසර වල මේ වෙනකොට රට පුරා සිටින වෙළඳුන් ඇවිත් රතිඤ්ඤා ඇතුළු ගිනිකෙළි භාණ්ඩ විශාල වශයෙන් මිලදීගෙන යනවා. මේ සැරේ එහෙම වෙළදුන් කවුරුවත් තවම ආවේ නැහැ . කඩවලින් ලොකු මිලදී ගැනීමක් කරන්නෙත් නැහැ .
මීට පෙර සෑම වසරකම හොටෙල් වලින් දෙසැම්බර් 31 රාත්රියේ පත්තු කිරීමට රතිඤ්ඤා සහ මල් වෙඩි සඳහා විශාල වශයෙන් ඇණවුම් ලැබෙනවා. මෙදා සැරේ ඒවත් අඩුවෙලා . චන්ද වලට හදපු රතිඤ්ඤා අලෙවියත් සම්පූර්ණයෙන්ම නැතුව ගියා. මේ වෙනකොට නිෂ්පාදකයින් ළඟ සියයට 95% ක් පමණ රතිඤ්ඤා ඇතුළු ගිනිකෙළි භාණ්ඩ විකුණ ගන්න බැරුව ගොඩ ගසාගෙන සිටිනවා. අපේ ගිනිකෙළි භාණ්ඩ නිෂ්පාදකයින් කවදාවත් මේ වගේ විශාල සිරවීමක් වෙලා නැහැ. නිෂ්පාදන විකුණ ගන්න බැරුව ගිහින් නැහැ . නමුත් මෙවර නත්තල් අලුත් අවුරුදු සමයට අපේ කර්මාන්තකරුවන්ගේ අලවිය බිඳවැටීම නිසා ඔවුන් දැඩි සියලු තාවයකට පත් වී සිටිනවා . මෙහෙම ගියොත් අපේ පාරම්පරික රතිඤ්ඤා සහ ගිනිකෙළි භාණ්ඩ නිෂ්පාදන කර්මාන්තය බිඳවැටීමකට ලක්ව අපේ පාරම්පරික කර්මාන්ත කරුවන් මෙන්ම මේ තුළ වක්ර හා සෘජු රැකියා කරන පුද්ගලයින් පනස් දහසකට පමණ රැකියා අහිමිවීමේ අවදානමක් පවතිනවා. සභාපතිවරයා පැවසීය .
