කපිල කේ හීනටියන –
අද අපේ රටේ ගෑස් මිල ඉහළ ගියේය. මාස කීපයකට පසු සිදුවන මෙම ඉහළ යෑම දරාගැනීම පහසු නොවන්නේ ජීවන වියදම සම්බන්ධව බරපතල තත්ත්වයක් තුළ සමාජයම සිරවී ඇති බැවිනි.
මේ යුද්ධය මේ වනවිට ලෝක ආර්ථිකය ටික ටික කුඩු කරමින් සිටින්නේය. අප තවමත් අර්බුදයේ මැදට වැටී නැත. දැන් ඉන්නේ ගැට්ටේය. එහෙත් ඉන්දියාවේ තත්ත්වය වෙනස්ය. ඉන්දියාව මේ වන විට දැවැන්ත ද්රව පෙට්රෝලියම් ගෑස් (LPG) හිඟයකට මුහුණ දී සිටී. ගෝලීය බලශක්ති සැපයුමේ තීරණාත්මක මංසන්ධියක් වන ‘හෝමුස් සමුද්ර සන්ධිය’ (Strait of Hormuz) හරහා සිදුවන නාවික ගමනාගමනය අත්හිටුවීම මෙයට ප්රධාන හේතුව වී ඇත. මේ හේතුවෙන් කටාර් රාජ්යය සහ සෞදි අරාබිය වැනි ප්රධාන නිෂ්පාදකයන්ගෙන් ඉන්දියාවට ලැබෙන ගෑස් ආනයනයන් සම්පූර්ණයෙන්ම ඇනහිට තිබේ.
අර්බුදයේ ව්යාප්තිය සහ බලපෑම
ඉන්දියාවේ වාර්ෂික ගෑස් පරිභෝජනය වන ටොන් මිලියන 31.3න් 62%ක්ම සපුරා ගනු ලබන්නේ ආනයනය මගිනි. යුද්ධය ආරම්භ වන විට සති අටක සංචිත රට සතුව පැවතියද, සැපයුම් අඩාල වීම දිගින් දිගටම සිදුවීම නිසා මුම්බායි, බැංගලෝර්, චෙන්නායි සහ දිල්ලි වැනි ප්රධාන නගරවල මේ වන විට උග්ර ගෑස් හිඟයක් හටගෙන ඇත.
මෙම අර්බුදයෙන් වැඩිම බලපෑමක් එල්ල වී ඇත්තේ එරට ආගන්තුක සත්කාරක (Hospitality) ක්ෂේත්රයටය. පවතින තත්ත්වය මත ආහාර පාන සපයන ආයතනවලට ගෑස් සලාක ක්රමයකට නිකුත් කරන අතර, මිල ගණන් ද ශීඝ්රයෙන් ඉහළ ගොස් ඇත.
මේ හේතුවෙන් ප්රධාන නගරවල අවන්හල් සහ හෝටල්වලින් 60%ක් පමණ වැසී යාමේ අවදානමකට ලක්ව ඇති බවට එම ක්ෂේත්රයේ නියෝජිතයෝ අනතුරු අඟවති. මීට අමතරව උළු සහ සෙරමික් කර්මාන්ත ශාලාවලට ද මෙයින් දැඩි බලපෑම් එල්ල වී ඇතත්, රජයේ ප්රමුඛතා ප්රතිපත්ති මත නිවෙස් සඳහා අවශ්ය ගෑස් සැපයුම යම් මට්ටමකට ආරක්ෂා කර ගැනීමට පියවර ගෙන තිබේ.
රජය ගෙන ඇති හදිසි පියවර
තත්ත්වය පාලනය කිරීම සඳහා ඉන්දීය රජය විසින් ‘අත්යවශ්ය භාණ්ඩ පනත’ (Essential Commodities Act) යටතේ හදිසි බලතල ක්රියාත්මක කර ඇත. ඒ අනුව:
- පෙට්රොකෙමිකල් සම්පත් වෙනතකට යොමු කරමින් දේශීය ගෑස් නිෂ්පාදනය උපරිම කරන ලෙස පිරිපහදු මධ්යස්ථානවලට නියෝග කර ඇත.
- නිවාස, ප්රවාහන සහ අත්යවශ්ය සේවා සඳහා ප්රමුඛතාව ලබා දී තිබේ.
- ඇමරිකාවෙන් ගෑස් ටොන් මිලියනයක් ආනයනය කිරීමටත්, ඇල්ජීරියාව, ඕස්ට්රේලියාව, කැනඩාව සහ නෝර්වේ යන රටවල් සමඟ විකල්ප සැපයුම් මාර්ග සකස් කර ගැනීමටත් බලධාරීන් කටයුතු කරමින් සිටී.
අවුල් වූ ජන ජීවිතය
ගෑස් හිඟය හේතුවෙන් ඉන්දීය සාමාන්ය ජනතාව දැඩි පීඩනයකට සහ මානසික ආතතියකට ගොදුරු වී ඇති බව එරට වාර්තා පෙන්වා දෙයි. සිලින්ඩර ලබා ගැනීමට දින 25කට වඩා වැඩි කාලයක් පෝලිම්වල රැඳී සිටීමට සිදුවීමත්, කළු කඩයේ ගෑස් මිල දෙගුණයකින් පමණ ඉහළ යාමත් නිසා අඩු ආදායම්ලාභී පවුල් දැඩි අසරණභාවයට පත්ව සිටිති. ඇතැම් ප්රදේශවල ගෘහණියන් පාන්දර සිට ගෑස් බෙදාහරින මධ්යස්ථාන අසල රැක සිටින අයුරු දැකගත හැකි අතර, නියමිත වේලාවට ආහාර වේල සකස් කර ගැනීමට නොහැකි වීමෙන් දෛනික ජීවන රටාව මුළුමනින්ම අඩාල වී ඇත. විශේෂයෙන්ම කුඩා දරුවන් සහ රෝගීන් සිටින නිවෙස්වල පවතින මෙම තත්ත්වය හමුවේ ජනතාව අතර දැඩි නොසන්සුන්තාවක් වර්ධනය වෙමින් පවතින බව ද වාර්තා වේ.
මෙම යුදමය තත්ත්වය තවදුරටත් ඇදී ගියහොත්, ඉන්දියාවේ උද්ධමනය ඉහළ යාමට සහ ආර්ථිකයට දැඩි පීඩනයක් එල්ල වීමට ඉඩ ඇති බව ආර්ථික විශේෂඥයෝ පෙන්වා දෙති.
මෙම අර්බුදය හමුවේ ඉන්දීය ජනතාව තෝසේ, ඉට්ලි වැනි වැඩි වේලාවක් වැයවන ආහාර වෙනුවට සලාද සහ ක්ෂණික ආහාර වැනි අඩු ගෑස් පරිභෝජනයක් සහිත විකල්ප වෙත යොමු වෙමින් සිටිති. බොහෝ පිරිස් විදුලි ප්රේරණ උදුන් (Induction Cookers) සහ පීඩන උදුන් භාවිතයට හුරුවී ඇති අතර, ග්රාමීය ප්රදේශවල සූර්ය බලශක්තිය කෙරෙහි අවධානය යොමු වී ඇත. එසේ වුවද, කළු කඩයේ ගෑස් මිල ඉහළ යාම සහ සැපයුම් ප්රමාදය නිසා සාමාන්ය ජනතාව, විශේෂයෙන්ම අඩු ආදායම්ලාභී පවුල්, සිය දෛනික ආහාර වේල සකස් කර ගැනීමට නොහැකිව දැඩි පීඩනයකට සහ නොසන්සුන්තාවකට පත්ව සිටින බව එරට මාධ්ය වාර්තා පෙන්වා දෙයි.
