ක්රිකට් ක්රීඩාවේ ආශ්චර්යයන් නැත. මැච් එහෙම දිනන්නට බැරිය. මේ අපට පුලුවන් හරිය බව සාධාරණව කල්පනා කර හිත හදා ගත යුතුය. ජයග්රහණය මෙන්ම පරාජය ද පිළිගත හැකිය. අප එය පිළිගැනීමට සූදානම්ය. හැබැයි ක්රිකට් කෙළියේ මෑතක සිට ඇති වී තිබෙන මේ නුහුගුණය කුමක් දැයි ඔය ක්රිකට් පකීර්ලා අපට තේරුම් කර දිය යුතුය.
“ අද අපේ දවස නෙමෙයි… අපේ දවස ආවම කොල්ලො නෙළනවා පළු යන්න… උඹලා වැටෙන්න එපා කොල්ලනේ…” උදේ වෙනවිට එෆ් බී පිටු පුරා මේ ආකාරයේ හිඟන කතා දකින්නට ලැබෙනු ඇත. තමන්ගේ ගේම ගහගන්නට බැරි වී අවශ්යම මොහොතවල්වල ලොන්ත පෝල්වන කස්ටිය තම තමන්ගේ ඇඩ්මින්ලා ලවා සිම්පති හිඟා කන්නට කරන උත්සාහයන් කල්පනාවෙන් දකින ලෙස ක්රීඩාවට ආදරය කරන උන්ගෙන් ඉල්ලා සිටිමු. මුන් ඇතැමෙක් එෆ්.බීවල වැළලෙන්නට කරන උත්සාහය ක්රිකට් ගහන්න කැප කළා නම් අපේ ක්රිකට් තියෙන්නේ මීට බොහෝ උඩිනි.
ඇත්තම කතාව නම් අපේ දවස ලේසියෙන් එන්නේ නැති බවය. මේ ගහන ක්රිකට් හැටියට පොට්ටයින්ටත් එය පෙනෙන බව කිව යුතුව ඇත.
දැන් අප සුපිරි තරගයේ ගහපු මැච් දෙකම හොඳටම ගුටි කා ඇත. පකිස්තාන තරගය කඩුළු 05කින් පරාදය. ඕවර 20 අවසානයේ ගහන්නට පුලුවන් වන්නේ ලකුණු 134ක් නම් ඒ තරගය දිනන්නට ආශ්චර්යයන් පහළවන තුරු බලා සිටීමේ ගොංකම පුරුද්දට මෙන් අපි කළෙමු.
අවසානයේ පන්දු 12ක් ඉතිරිව තිබිය දි පකිස්ථානය දිනුම්ය. අද පැවැත්වුනේ ආසියානු කුසලාන තරග මාලාවේ 15 වැනි තරගය ය. අබුඩාබි සෙයිඩ් ක්රීඩාංගනයේ පැවති තරගයේ දී කාසියේ වාසිය දිනාගත් පකිස්ථාන පිල පන්දු රැකීම තේරුවේය. ශ්රී ලංකා පිලි ලකුණු 133කි. කඩුළු 08ක් දැවී ගියේය. කමිඳු මෙන්ඩිස් පමණක් ලකුණු 50ක් ලබා ගත්තේය. ඒ හතරේ පහර 3ක් සහ හයේ පහර 2ක් සමගින් පන්දු 44ක දී ය.
ෂහීන් ෂා ඇෆරිඩි ලකුණු 28ට කඩුළු 03කි. හුසේන් ටලට් ලකුණු 18ට කඩුළු 02කි. හරිස් රවුෆ් ලකුණු 37ට කඩුළු 2කි. අබ්රාර් අහමඩ් පන්දු ඕවර 4ක් යවා ලබා දුන්නේ ලකුණු 08ක් පමණි. එක් කඩුල්ලක් ලබා ගත්තේය.
පිලිතුර ඉනිම ක්රීඩා කිරීමට පැමිණි පකිස්ථාන කණ්ඩායමට තරගය මැද දී තරමක අභියෝගයක් එල්ල කිරීමට වනිඳු හසරංග සහ මහීෂ් තීක්ෂණ උත්සාහ කළ ද තමන් අභියස ඇති පහසු ඉලක්කය ලබා ගන්නට පකිස්ථාන කණ්ඩායමට හැකි වුයේය. හුසේන් ටලට් සහ මොහොමඩ් නවාස් විශිෂ්ට පිතිකරණයක නිරත වෙමින් තරගය අවසන් කළහහ. මොහොමඩ් නවාස් පන්දු 24ට හතරේ පහර 3ක් සහ හයේ පහර 3ක් සමගින් ලකුණු 38කි. ඔහු දැවී ගියේ නැත. හුසේන් ටලාට් 4 පහර හතරක් සමගින් ලකුණු 32කි. ඔහුත් නොදැවී ය.
දැන් අපේ ඉරණම පැහැදිලිය. මේ ගැහිල්ල ඉන්දියාවට ගහන්නට ගියොත් මේ රටේ ක්රිකට් බලන අපට ක්රිකට් එපා වෙනවා හැරෙන්නට වෙන අමුතු දෙයක් වෙන්නේ නැත. එක අතකට ඕවර 18න් මැච් එක ඉවර වුන එකත් හොඳය. ඕවර 20 යවා ඉවර කරගන්නට හරිහමන් එකෙක් අන්තිමට ඉතිරි වූයේ නැත. මේ ගිය විදිහට ගියා නම් අන්තිම ඕවරය යවා ගන්නට එකෙක් හොයා ගන්නට කුසපත් අදින්න වෙන්නේය.
මේ ක්රිකට් ඇතිය. බලා හිටපු අයට බුදු සරණය. දෙවි පිහිටය.
