19න් පහළ ලෝක කුසලාන තරගාවලියේ ශ්රි ලංකාව මුහුණ දුන් ආරම්භක තරගය වාර්තා රැසක් සමග අවසන් වි ඇත. පළමු තරගය ජපානය සමගය. පන්දු යැවීමේ දී පන්දු රැකීමේ දි තවමත් ක්රීඩාවට ආන්තුක බවක් ප්රකට කළ යොවුන් ජපන් ක්රීඩකයින් හමුවේ ශ්රී ලංකා කණ්ඩායමේ පිතිකරුවෝ අපහසුවකින් තොරව ලකුණු රැස් කළහ.
ආරම්භක පිතිකරු යුගලවන දිමන්ත මහවිතාන සහ විරාන් චමුදිත අතර සම්බන්ධතාවය ලකුණු 328ක් විය. දෙදෙනාම ශතක රැස් කළහ. විරාන් චමුදිත පන්දු 125ක දී හතරේ පහර 26ක් සහ හයේ පහරක් සමග ලකුණු 192කි. මෙම ලකුණු ප්රමාණය ICC වයස අවුරුදු 19 න් පහළ ලෝක කුසලාන තරග ඉතිහාසයේ ක්රීඩකයෙක් රැස් කළ වැඩිම ලකුණු ප්රමාණය ලෙස වාර්තා වුයේය.
මින් පෙරත් එම වාර්තාව තිබුණේ ශ්රී ලංකා ක්රීඩකයෙක් සතුවය. ඒ හසිත බෝයගොඩය. හසිත බෝයගොඩ 2018 වර්ෂයේ දී කෙන්යාවට එරෙහිව ලකුණු 191ක් ලබා තිබිණි. විරාන් චමුදිත විසින් අද (17) බිඳ හෙළුවේ ඒ වාර්තාවය.
දිමන්ත මහවිතාන පන්දු 125ක දී හතරේ පහර 11ක් සමග ලකුණු 115කි. විරාන් චමුදිත ලකුණු 192කි. ආරම්භක පිතිකරුවන් දෙදෙනාම ශතක ලබාගෙනය. ඔවුන් දෙදෙනා අතර මුල් කඩුල්ල සඳහා ගොඩනැගුන ලකුණු 328ක සම්බන්ධතාවයත් තරගාවලි වාර්තාවකි.
අද ජපානයට එරෙහිව ශ්රී ලංකාව වෙනුවෙන් ඔවුන් අතර පැවති ලකුණු 328 ක ආරම්භක සම්බන්ධතාවය ICC වයස අවුරුදු 19 න් පහළ ලෝක කුසලාන ඉතිහාසයේ ඕනෑම කඩුල්ලක් සඳහා ගොඩනැගුණු ඉහළම සම්බන්ධතාවයය.
ඔවුන් දෙදෙනා බිඳහෙළුවේ 2016 දී ෆීජි කණ්ඩායමට එරෙහිව දෙවන කඩුල්ල සඳහා එංගලන්තයේ ඩෑන් ලෝරන්ස් සහ ජැක් බර්න්හැම් විසින් තබා තිබූ ලකුණු 303 ක සම්බන්ධතාවය ය.
නායක විමන්ත දින්සර පන්දු 24ක දී ලකුණු 44ක්, රැස් කළේය. ශ්රී ලංකා කණ්ඩායම පන්දු ඕවර 50 අවසානයේ දී කඩුලු 04කට ලකුණු 387කි. ජපානය වෙනුවෙන් හොඳම පන්දු යැවීම වාර්තා කළේ තිමොති මෝර්ය. ඔහු පන්දු ඕවර 06ක් යවා ලකුණු 43ට කඩුළු 03ක් බිඳ හෙළුවේය.
ජපානය වැනි තවමත් ක්රිකට් ක්රීඩාවට හුරු වෙමින් ඇති ජාතියක් අභියස වාර්තා තැබූ නමුත් ශ්රී ලංකා යොවුන් කණ්ඩායමේ ස්වරූපය ආසියානු කුසලාන තරගාවලියේ දී ලෝකයට පෙනුනේය. ඊට වඩා පරිනත ක්රිකට් විලාශයක් ලෝක කුසලානයේ දී ශ්රී ලංකා ප්රේක්ෂකයෝ ශ්රී ලංකා අනාගත ක්රිකට් දරුවන්ගෙන් අපේක්ෂා කරති.
