සූරියවැව – නුවන් ජයසේකර-
වැල්ලවාය, නුගේයාය ප්රදේශයේ මහා පරිමාණයෙන් ගිනිඅවි නිෂ්පාදනය කර අලෙවි කිරීමේ ජාවාරමක නිරත වූ කම්මලක් වැටලීමට පොලිස් විශේෂ කාර්ය බලකාය (STF) සමත්ව තිබේ. පසුගිය අඟහරුවාදා (10) සිදුකළ මෙම වැටලීමේදී ගිනිඅවි 03ක් සහ ජීව උණ්ඩ තොගයක් සමඟ 61 හැවිරිදි සැකකරුවෙකු අත්අඩංගුවට ගෙන ඇත.
අත්අඩංගුවට ගත් ගිනිඅවි සහ උපකරණ
පොලිස් විශේෂ කාර්ය බලකායේ ඒකාබද්ධ විශේෂ වැටලීම් ඒකකය මගින් සිදුකළ මෙම මෙහෙයුමේදී පහත දැක්වෙන දෑ සොයාගෙන තිබේ:
- නිෂ්පාදනය කර තිබූ ෂොට්ගන් (Shotgun) වර්ගයේ ගිනිඅවියක්.
- T-56 වර්ගයේ උණ්ඩ යෙදිය හැකි ටී-කටස් (T-Katus) වර්ගයේ ගිනිඅවි 02ක්.
- ජීව උණ්ඩ 12ක් සහ නැවත පුරවන ලද උණ්ඩ 07ක්.
- ගිනිඅවි නිෂ්පාදනය සඳහා යොදාගත් විවිධ උපකරණ තොගයක්.
කම්මල මුවාවෙන් කළ හොර අවි ජාවාරම
අත්අඩංගුවට ගත් සැකකරු ප්රදේශයේ පදිංචි 61 හැවිරිදි කම්මල්කරුවෙකි. මූලික ප්රශ්න කිරීම්වලදී ඔහු පාපොච්චාරණය කර ඇත්තේ සාමාන්ය කම්මල් කටයුතු සිදුකරන මුවාවෙන්, විවිධ පුද්ගලයන්ගේ ඇණවුම් මත මෙලෙස ගිනිඅවි නිෂ්පාදනය කර අලෙවි කළ බවයි.
වැඩිදුර විමර්ශන
අත්අඩංගුවට ගත් සැකකරු සහ නීතිවිරෝධී ගිනිඅවි තොගය වැඩිදුර විමර්ශන කටයුතු සඳහා වැල්ලවාය පොලිස් ස්ථානය වෙත භාර දී තිබේ. සැකකරු වැල්ලවාය මහේස්ත්රාත් අධිකරණයට ඉදිරිපත් කිරීමට නියමිතය.
