කපිල කේ. හීනටියන –
ඇමරිකානු වෙලාවෙන් ඉරිදා රාත්රියේ ප්රමාද වී ඩොනල්ඩ් ට්රම්ප් විසින් Truth Social ජාලය ඔස්සේ පළ කරන ලද එක් ජායාරූපයක් මුළු මහත් ලෝකයම මවිතයට පත් කිරීමට සමත් විය. කිසිවෙකුත් බලාපොරොත්තු නොවූ අයුරින් පළවූ මෙම ඡායාරූපය අතිශය නාට්යමය ස්වරූපයක් උසුලනු පෙනුණි. එහි ට්රම්ප් සුදු පැහැති දිගු ලෝගුවකින් සහ දීප්තිමත් රතු පැහැති පටියකින් සැරසී, බයිබලයානුකූල ගැලවුම්කරුවෙකු මෙන් දිදුලමින් සිටියි. බයිබලානුකුල ගැලවුම්කරුවා යනු මිනිසාට තනිවම ලබාගත නොහැකි වූ “පාපයෙන් සහ මරණයෙන් නිදහස් වීම” තමන්ගේ කැපකිරීම තුළින් මිනිසාට ලබාදෙන උත්තමයාය.
බයිබලයානුකූල ගැලවුම්කරුවෙක් ලෙස රූපණයවන ට්රම්ප්ගේ දකුණු අත රෝහල් ඇඳක වැතිර සිටින වයෝවෘද්ධ මිනිසෙකුගේ නළල මත තිබේ. එයින් රන්වන් පැහැති ආලෝක ධාරාවන් විහිදෙයි. එම රෝගී මිනිසාගේ මුහුණෙන් දිස්වන්නේ ක්ෂණික සුවය ලැබූවෙකුගේ සහනයකි.
බයිබලානුකූල ගැලවුම්කාර ට්රම්ප් පසුබිමේ ඇත්තේ ඇමරිකානු අභිමානය විදහා දක්වන දර්ශනයකි. යෝධ ඇමරිකානු ධජයක්, අහසේ පියාසර කරන බෝල්ඩ් ඊගල් රාජාලීන් දෙදෙනෙක්, අහස සිසාරා යන ප්රහාරක ජෙට් යානා, මල්වෙඩි සංදර්ශන, ලිබර්ටි ප්රතිමාව සහ ස්වර්ගීය වලාකුළු අතරින් මතුවන සෙබළුන්ගේ රූප එහි අන්තර්ගත වේ.
කිසිදු සටහනක් නොමැතිව පළවූ මෙම ජායාරූපය ප්රසිද්ධියට පත් වූයේ ට්රම්ප් විසින් 14 වන ලියෝ පාප්තුමාට එල්ල කළ දරුණු ප්රහාරයකින් මිනිත්තු 40කට පමණ පසුව වීම ලෝක අවධානයට ලක් වූයේය. පහත දැක්වෙන්නේ එම AI නිර්මාණය ය.
පාප්තුමාට එල්ල වූ ට්රම්ප්ගේ ප්රහාරය
මෙම ජායාරූපය පළ කිරීමට පැය කිහිපයකට පෙර, ට්රම්ප් Truth Social හරහා සිය උපරිම වේගයෙන් පාප්තුමා විවේචනය කළේය. පළමු ඇමරිකානු පාප්තුමා “අපරාධ සම්බන්ධයෙන් දුර්වල” බවත් “විදේශ ප්රතිපත්ති සම්බන්ධයෙන් භයානක” බවත් ඔහු පැවසීය. ලියෝ පාප්තුමා ඉරාන ගැටුම හමුවේ මෘදු පිළිවෙතක් අනුගමනය කරන බවටත්, “අන්ත වාමවාදීන්” පිනවන බවටත් ඔහු චෝදනා කළේය. එපමණක් නොව, තමා ධවල මන්දිරයේ නොසිටියේ නම් පාප්තුමාට කිසිදා වතිකානුවට යාමට නොහැකි වන බවටද ට්රම්ප් ප්රකාශ කළේය. ඔහු කීවේ සුදුසුකම් නැති පාප් වහන්සේ වතිකානයෙන් පාප් තනතුරට පත් කරනු ලැබුවේ ඩොනල්ඩ් ට්රම්ප් සමග ගනුදෙනු කිරීමට බවය.
“ලියෝ පාප්තුමා ලෙස තමාගේ වැඩකටයුතු නිවැරදි කරගත යුතුයි. දේශපාලනඥයෙකු නොවී පොදු බුද්ධිය පාවිච්චි කළ යුතුයි,” යනුවෙන් ට්රම්ප් සටහන් කළේය. ඉන් අනතුරුව ක්රිස්තුස් වහන්සේ වැනි ස්වරූපයකින් හාස්කම් සිදුකරන ට්රම්ප්ගේ රූපය පළවීමත් සමඟ එහි පණිවිඩය ඉතා පැහැදිලි විය.
ලෝකයේ ප්රතිචාරය: කම්පනය, කෝපය සහ උපහාසය
මෙම සටහන පළවී මිනිත්තු කිහිපයක් ඇතුළත එය අතිශය වේගයෙන් ප්රචාරය විය. Truth Social ජාලයේ ට්රම්ට ආධාර කරන දහස් ගණන් MAGA ආධාරකරුවන් මෙය ප්රබල සංකේතයක් ලෙස අගය කළහ. නමුත් අන්තර්ජාලයේ සෙසු ප්රජාව සහ ට්රම්ප්ගේම ක්රිස්තියානි පදනමේ ඇතැම් පිරිස් පවා මෙයට දැඩි විරෝධයක් එල්ල කළහ.
කිතුනු නායකයින් සහ බැතිමතුන් මෙය “දේව අපහාසයක්”, “උමතු ක්රියාවක්” සහ “ගැඹුරු මානසික රෝගී තත්වයක්” ලෙස හඳුන්වා දුන්හ. ජනාධිපතිවරයෙකු මෙසියස් වහන්සේගේ ස්වරූපයෙන් පෙනී සිටිමින් ජේසුස් වහන්සේගේ ප්රාතිහාර්යයන් දේශපාලන ප්රයෝජනය සඳහා යොදා ගැනීම ශුද්ධ වූ සීමාවන් ඉක්මවා යාමක් බව විවේචකයෝ කීහ.
මෙම රූපයේ සිටින රෝගියා ජෙෆ්රි එප්ස්ටයින්ට සමාන බවත්, එහි ඇඟිලි සහ ධජයේ තරු වැනි AI දෝෂ පවතින බවත් බොහෝ දෙනා පෙන්වා දුන්හ.
රූපයට ටෲත් ෂෝෂල් ගිනුමේ පලවුන ප්රතිචාර 5,800 ගැන විග්රහයක් –
ට්රම්ප්ගේ මෙම “දිව්යමය” රූපයට ලැබී ඇති ප්රතිචාර 5,800කට අධික ප්රමාණයක් ලැබී තිබිණි. ඉන් සියයට 45ක් ප්රතිචාර දක්වා තිබුණේ ට්රම්ප්ගේ අචල සහයෝගී භක්තිවන්තයින්ය. ඔවුන් මෙම රූපය දුටුවේ ඔහු කෙරෙහි පවතින “ගැලවුම්කාර” ප්රතිරූපයේ සංකේතයක් ලෙසය. “අපට අවශ්ය මෙවැනි ශක්තිමත් නායකයෙක්”, “දෙවියන් වහන්සේ ඇමරිකාව සුවපත් කිරීමට ට්රම්ප්ව එවා ඇත” වැනි අදහස් මෙහිදී ප්රමුඛ විය. මේ දිස්වන්නේ “ඇමරිකාවේ ආත්මය සුවපත් කරන නායකයාගේ සැබෑ ස්වරූපය” බව ඔවුහු කීහ. ඔවුන්ට අනුව මෙය හාස්කමක් නොව, ඇමරිකානු ජනතාව රෝගී කළ දූෂිත පද්ධතියෙන් ඔවුන්ව මුදාගැනීමට ට්රම්ප් සතු කැපවීම සංකේතවත් කරන්නක් බවය.
එහෙත්, මෙම ප්රතිචාර අතර දේවධර්මවේදීන් සහ දැඩි ආගමික මතධාරීන්ගේ විරෝධය කැපී පෙනුනි. ප්රතිචාරවලින් සියයට 30ක කතෝලික සහ ක්රිස්තියානි ප්රජාවන්ගෙන් එල්ලවුන දැඩි විරෝධය ප්රකට විය. මෙය දේව අපහාසයක් ලෙස හඳුන්වමින්, ජේසුස් වහන්සේගේ හාස්කම් දේශපාලනයට ඈඳා ගැනීම පිළිබඳව ඔවුන් දැඩි කනස්සල්ල පළ කර තිබුණහ. පාප්තුමාට එල්ල කළ ප්රහාරය සමඟ මෙය සැසඳීමෙන් ඔවුන්ගේ විරෝධය තවත් තීව්ර වී තිබිණි.
තවත් පිරිසක් මෙම රූපයේ තාක්ෂණික සහ සදාචාරාත්මක දෝෂ පිළිබඳව අවධානය යොමු කර තිබේ. විශේෂයෙන්ම, සුවය ලබන රෝගියාගේ මුහුණේ ස්වරූපය ආන්දෝලනාත්මක පුද්ගලයෙකු වන ජෙෆ්රි එප්ස්ටයින්ට සමාන වීම පිළිබඳව සමාජ මාධ්ය පරිශීලකයින් සිය දහස් ගණනින් සිය හාස්ය මුසු ප්රශ්න කිරීම මතුකළේය. සියයට 15ක් පමණ වූ මෙම පිරිස මෙම රූපය “විකාරයක්” සහ “ප්රහසනයක්” ලෙස නම් කරනු ලැබ තිබුණේ ට්රම්ප් පාර්ශවයෙන් සිදුවූ දරුණු තාක්ෂණික අතපසුවීම මතුකරමිනි.
දේශපාලන සහ ආරක්ෂක විශ්ලේෂණ සහිත ප්රතිචාර සියයට 10ක් ඒ අතර විය. වත්මන් ඉරාන ගැටුම සහ ජාත්යන්තර දේශපාලන තත්වය හමුවේ මෙවැනි පණිවිඩයකින් ඇතිවිය හැකි බලපෑම ගැන උනන්දුවක් දැක්වූවන් මේ ගණයට අයත් විය.
ලොව පුරා ප්රධාන පෙළේ පුවත්පත් මෙය “අසම්මත”, “පූජනීයත්වයට නිගරු කළ” සහ “දේව අවමානයක්” (God Complex) සහිත ක්රියාවක් ලෙස වාර්තා කළේය. CNN, The Times ඇතුළු ජාත්යන්තර මාධ්යවල මුල් පුවත් බවට මෙය පත්විය. සමාජ මාධ්ය පුරා ආගම, බලය සහ මෙම දෙකෙහි භයානක සම්මිශ්රණය පිළිබඳ උණුසුම් වාද විවාද ඇති විය.
මෙහි සැබෑ අර්ථය කුමක්ද?
මෙය හුදෙක් අහඹු ලෙස පළ කරන ලද්දක් නොවේ. මෙය ට්රම්ප්ගේ සුපුරුදු ආක්රමණශීලී සහ අවධානය දිනාගන්නා උපක්රමයකි. ආගමික රූප රාමු සහ ඇමරිකානු දේශප්රේමය මුසු කිරීමෙන් ඔහු තමා ජාතියේ අවසාන ආරක්ෂකයා සහ සුවපත් කරන්නා ලෙස හඳුන්වා දී ඇත.
එමෙන්ම මෙය වතිකානුව සමඟ පවතින ගැටුමට තවදුරටත් ඉන්ධන සපයයි. ලියෝ පාප්තුමා ට්රම්ප්ගේ විදේශ ප්රතිපත්ති ප්රශ්න කර ඇති පසුබිමක, ඇමරිකාවේ දිව්යමය අධිකාරිය ඇත්තේ පාප්තුමාට නොව තමාට බව ට්රම්ප් මෙමගින් වක්රව ප්රකාශ කරනු පෙනේ.
මෙම රූපය දේශපාලනය සහ ඇදහිල්ල පෙර නොවූ විරූ ලෙස ගැටෙන බෙදී ගිය ඇමරිකාව මනාව නිරූපණය කරනු දකිමු. නායකත්වය, නිහතමානිකම සහ ජනාධිපතිවරයෙකු තමා නවීන ගැලවුම්කරුවෙකු ලෙස පෙනී සිටීමට AI තාක්ෂණය භාවිතා කිරීම හරහා යළිත් ඇමරිකානු සමාජයේ පොදු ජන රුචියේ ස්වරූපය දේශපාලනිකව ප්රශ්න කෙරෙමින් ඇත. තමන්ගේ ජනමතයෙන් ප්රකාශිත නායකයාගේ ස්වරූපය සමාජය ඉදිරියේ නිරාවරණය වනවිට ඇමරිකානුවන් එය දරා ගනු ඇත්තේ කෙසේ දැයි අපට වැටහෙන්නේ නැත.
වතිකානුව මේ දක්වා මෙම රූපණය පිළිබඳව නිහඬය. එහෙත් මතු වී ඇති සමාජ සංවාදය උණුසුම්ය. 2026 වසරේ මේ දක්වා වැඩිම කතාබහට ලක්වූ සමාජ මාධ්ය සටහන ඔස්සේ පෙළ ගැසෙන ලෝක දේශපාලනයේ ස්වරූපය දෙස අපි පරිධියේ සිට බලාගෙන සිටිමු.
මේ ලිපියත් කියවන්න…
