පසුගිය මාර්තු සහ අප්රේල් මාසවලදී මෙරට බලශක්ති උත්පාදනයට දැඩි බලපෑම් එල්ල කළ නියං තත්ත්වයෙන් පසුව, දිවයිනේ ප්රදේශ රැසකට ඇද හැලෙන තද වැසි හේතුවෙන් ප්රධාන ජලාශවල ජල මට්ටම් සීඝ්රයෙන් ඉහළ යමින් පවතී.
කාලගුණ විද්යා දෙපාර්තමේන්තුවට අනුව බස්නාහිර, සබරගමුව, මධ්යම, දකුණ, ඌව, වයඹ සහ උතුරු පළාත්වලටත්, අනුරාධපුර දිස්ත්රික්කයටත් අද දිනයේ සහ ඉදිරි දින කිහිපය තුළ මිලිමීටර් 100 ඉක්මවූ තද වැසි ඇතිවිය හැකිය.
මෙම වර්ෂාපතනයත් සමඟ බදුල්ල සහ මොණරාගල දිස්ත්රික්කවල ඇතැම් ප්රදේශ සඳහා නායයෑම් පූර්ව අනතුරු ඇඟවීම් නිකුත් කිරීමට ආපදා කළමනාකරණ මධ්යස්ථානය පියවර ගෙන ඇත. කඳුකර සහ නායයෑම් අවදානම් සහිත ප්රදේශවල වසන ජනතාවට මේ පිළිබඳව දැඩි අවධානයෙන් පසුවන ලෙස බලධාරීන් උපදෙස් දෙයි.
ජල විදුලි උත්පාදනයට නව බලාපොරොත්තුවක්
2026 වසරේ මුල් මාසවල පැවති වියළි කාලගුණය හේතුවෙන් ජල විදුලි බලාගාර ආශ්රිත ජලාශවල ජල මට්ටම දැඩි ලෙස පහත වැටී තිබුණි. විශේෂයෙන්ම කොත්මලේ ජලාශයේ ජල ධාරිතාව එක් අවස්ථාවක 21.8% දක්වාම අඩුවීම විදුලි සැපයුමට දැඩි අවදානමක් මතු කළේය.
කෙසේ වෙතත් වත්මන් වර්ෂාව හේතුවෙන් වික්ටෝරියා, රන්දෙනිගල, රන්ටැඹේ සහ ඉහළ කොත්මලේ වැනි ප්රධාන ජල විදුලි බලාගාරවල ජල මට්ටම් යළි ඉහළ යමින් පවතී. මහවැලි ජල කළමනාකරණ ලේකම් කාර්යාලයේ නවතම දත්ත වාර්තා අනුව, මේ වනවිට ප්රධාන ජල විදුලි බලාගාර ආශ්රිත ජලාශවල ජල මට්ටම් කැපී පෙනෙන ලෙස ඉහළ ගොස් ඇත. ඒ අනුව රන්දෙනිගල ජලාශය එහි උපරිම ධාරිතාවයෙන් 81% ක් දක්වා ඉහළ ගොස් තිබේ. රන්ටැඹේ සහ ඉහළ කොත්මලේ ජලාශ පිළිවෙළින් 67% ක සහ 60% ක මට්ටම්වල පසුවේ. මීට අමතරව වික්ටෝරියා ජලාශයේ ජල මට්ටම 42% ක් ලෙස සටහන් වන අතර, පවතින වර්ෂාපතනය මෙම තත්ත්වය තවදුරටත් වර්ධනය කිරීමට හේතු වී තිබේ.
කෙසේ වෙතත් වසරේ මුල් භාගයේ පැවති දැඩි වියළි කාලගුණය හේතුවෙන් කොත්මලේ ජලාශයේ ජල මට්ටම 22% දක්වාම පහත වැටී තිබිණි. වර්තමාන වර්ෂාවත් සමඟ එය 28% ක මට්ටමක් දක්වා සෙමින් වර්ධනය වෙමින් පවතී. නමුත් ජල මට්ටමේ වැඩිවීමක් ඉදරි දින වලදී අපේක්ෂා කෙරේ. මෙම වාතාවරණය හමුවේ විදුලි උත්පාදනය අඛණ්ඩව පවත්වාගෙන යාම සඳහා අවශ්ය ජලය කළමනාකරණය කිරීමටත්, පහළ නිම්නවල ගංවතුර තත්ත්වයන් පාලනය කිරීමටත් මහවැලි අධිකාරිය සහ ලංකා විදුලිබල මණ්ඩලය ජලාශවල වාන් දොරටු පිළිබඳ දැඩි අවධානයෙන් පසුවෙයි.
මේ වන විටත් මහවැලි පද්ධතියේ සහ අනෙකුත් ප්රදේශවල ප්රධාන ජලාශ කිහිපයක් වාන් දැමීමට හෝ පාලිත මට්ටමකින් ජලය මුදා හැරීමට පටන් ගෙන ඇත.
මහවැලි අධිකාරිය සහ ලංකා විදුලිබල මණ්ඩලය ජල කළමනාකරණය සහ ගංවතුර පාලනය පිළිබඳව දැඩි අවධානයෙන් පසුවන අතර, ගංගා දෙපස සහ පහත් බිම්වල වසන ජනතාවට විමසිලිමත් වන ලෙස දැනුම් දී තිබේ. ඉදිරි දින කිහිපය තුළ ද මෙම වැසි සහිත කාලගුණය පවතිනු ඇතැයි අපේක්ෂා කෙරේ.
