රුසියානු සැපයුම්කරුවන්ගෙන් සෘජුවම ඉන්ධන මිලදී ගැනීම සම්බන්ධයෙන් වන විශේෂ සාකච්ඡාවක් අද (27) දහවල් මාර්ගගත ක්රමය (Online) ඔස්සේ ආරම්භ වූ බව ඛණිජ තෙල් නීතිගත සංස්ථාවේ කළමනාකාර අධ්යක්ෂ මයුර නෙත්තිකුමාරගේ පැවසීය. .
ලංකා ඛනිජ තෙල් නීතිගත සංස්ථාව සහ රුසියානු සැපයුම්කරුවන් අතර පැවැත්වෙන මෙම සාකච්ඡාවේ ප්රධාන අරමුණ වන්නේ ඉදිරියේදී පිරිපහදු කරන ලද ඛනිජ තෙල් මෙරටට ගෙන්වා ගැනීමේ හැකියාව සහ ඒ සඳහා පවතින තාක්ෂණික කරුණු පිළිබඳව එකඟතාවයකට පැමිණීමය.
මෙම සාකච්ඡාව සඳහා රුසියානු නියෝජිතයින් පිරිසක් මෙරටට පැමිණ සිටින අතර, සෙසු සාමාජිකයින් රුසියාවේ සිට මාර්ගගත තාක්ෂණය ඔස්සේ සම්බන්ධ වී සිටී. මෙහිදී ගෙවීම් සිදුකරන ආකාරය සහ සැපයුම් දාමයේ සුරක්ෂිතතාව සහ අඛණ්ඩතාවය පිළිබඳව ද විශේෂ අවධානයක් යොමු කිරීමට නියමිතය.
යුක්රේන යුද ගැටුම් හේතුවෙන් බටහිර රටවලට ඉන්ධන සැපයූ ප්රධාන නල පද්ධති අකර්මණ්ය වීම සහ රුසියානු තෙල් සඳහා බටහිර පැනවූ මිල සීමාවන් (Price Caps) හමුවේ, රුසියාව සිය බලශක්ති අපනයන උපායමාර්ගිකව ආසියානු කලාපය වෙත යොමු කර ඇත.
විශේෂයෙන්ම රුසියානු ‘යුරල්ස්’ (Urals) වර්ගයේ බොරතෙල් සඳහා චීනය සහ ඉන්දියාව වැනි ආසියානු දැවැන්තයින් විශාල ඉල්ලුමක් පෙන්නුම් කරන අතර, ජාත්යන්තර බලශක්ති ඒජන්සියේ (IEA) දත්තවලට අනුව රුසියාවේ සමස්ත බොරතෙල් අපනයනයෙන් 80% කට වඩා වැඩි ප්රමාණයක් මේ වන විට ගලා යන්නේ ආසියානු වෙළෙඳපොළ වෙතයි. මෙවැනි පසුබිමක ශ්රී ලංකාව වැනි රටවලට රුසියානු සැපයුම්කරුවන් සමඟ සෘජු ගනුදෙනුවලට එළඹීමට හිතකර වාතාවරණයක් නිර්මාණය වී තිබේ.
මේ අතර, මෙරට පවතින ඉන්ධන අවශ්යතාවය සපුරාලීම සඳහා පෙට්රල් මෙට්රික් ටොන් 35,000ක් රැගත් නෞකාවක් අද පස්වරුවේ හෝ හෙට (28) දිවයිනට ළඟා වීමට නියමිතව ඇත. එම නෞකාවේ ඔක්ටේන් 92 වර්ගයේ පෙට්රල් මෙට්රික් ටොන් 30,000ක් සහ ඔක්ටේන් 95 වර්ගයේ පෙට්රල් මෙට්රික් ටොන් 5,000ක් අඩංගු බව වාර්තා වේ..
