අද සිට ක්රියාත්මක වන පරිදි පෞද්ගලික මගී ප්රවාහන බස් රථ සඳහා ලංගම ඩිපෝ මගින් ඉන්ධන ලබා දීමට පියවර ගෙන ඇති බව ලංකා ඛනිජ තෙල් නීතිගත සංස්ථාව පවසයි.
මේ වන විට මගී බස් රථ සඳහා සතියකට ලබාගත හැකි ඉන්ධන කෝටාව ලීටර් 60ක් වුවද, ධාවන දුර සහ වාර ගණන අනුව එම ප්රමාණය ඉදිරියේදී සංශෝධනය කරන බව ලංකා ඛනිජ තෙල් නීතිගත සංස්ථාවේ සභාපති ජී.එල්. රාජකරුණා සඳහන් කළේය.
සභාපතිවරයා වැඩිදුරටත් අදහස් දක්වමින් කියා සිටියේ, මගී ප්රවාහන කටයුතු බාධාවකින් තොරව පවත්වාගෙන යාම සඳහා ලංගම ඩිපෝ හරහා ඉන්ධන ලබාදීමට තීරණය කළ බවයි. බස් රථ ධාවනය වන මාර්ග සහ අවශ්ය වන ඉන්ධන ප්රමාණය පිළිබඳව කෙටි අධ්යයනයක් සිදු කිරීමෙන් පසු, QR කේතය හරහා අදාළ ඉන්ධන ප්රමාණය ලබා දීමට බලාපොරොත්තු වන බවද ඔහු පැවසීය.
මේ අතර, සියලුම ගිලන් රථ සඳහා විශේෂ කාණ්ඩයක් යටතේ ඉන්ධන නිකුත් කිරීමටද පියවර ගෙන ඇත.
ඛනිජ තෙල් නීතිගත සංස්ථාවේ අධ්යක්ෂ ජනරාල් ආචාර්ය මයුර නෙත්තිකුමාර පැවසුවේ, ගිලන් රථ සඳහා ඩිපෝ මගින් මෙන්ම සාමාන්ය පිරවුම්හල්වලින්ද ඉන්ධන ලබා ගත හැකි බවයි. රෝහල් සඳහා අවශ්ය ඉන්ධන ද ලංගම ඩිපෝ හරහා ලබාදීමට කටයුතු සූදානම් කර ඇති බව අධ්යක්ෂ ජනරාල්වරයා වැඩිදුරටත් සඳහන් කළේය.
