ඉඳුනිල් කහටපිටිය. –
රාජ්ය බුද්ධි සේවයේ හිටපු ප්රධානී විශ්රාමික මේජර් ජෙනරාල් සුරේෂ් සලේට අමානුෂික සහ කෲර ලෙස සැලකීම් ලැබෙන බවට චෝදනා කරමින් විපක්ෂයේ දේශපාලන පක්ෂ කිහිපයක් සංවිධානය කළ සත්යග්රහයක් කොළඹ කොටුව දුම්රිය පොළ පරිශ්රය ඉදිරිපිටදී ආරම්භ කර තිබේ.
“Stand Up for Sallay” නමින් හැඳින්වෙන මෙම විරෝධතාවය අඛණ්ඩව පවත්වාගෙන යාමට විපක්ෂය සැලසුම් කර ඇත.
මෙම සත්යග්රහය සඳහා විපක්ෂ නියෝජිතයින් රැසක් එක්ව සිටි අතර, ඔවුහු සලේගේ ඉක්මන් නිදහස සහ නීති ක්රියාවලියේ සාධාරණත්වය ඉල්ලා සිටියහ. අපරාධ පරීක්ෂණ දෙපාර්තමේන්තුව (CID) විසින් සිදු කරනු ලබන පරීක්ෂණ එකපාර්ශ්වික බවත්, මේ හේතුවෙන් ඔහුට දැඩි අසාධාරණයක් සිදුව ඇති බවත් සංවිධායකයෝ පවසති. තම ඉල්ලීම් සම්පූර්ණයෙන් සලකා බලන තෙක් මෙම සාමකාමී විරෝධතාවය නතර නොකරන බවද ඔවුහු අවධාරණය කළහ.
2019 පාස්කු ඉරුදින ත්රස්ත ප්රහාරයට සම්බන්ධ බවට එල්ල වූ චෝදනා මත, සුරේෂ් සලේ පසුගිය පෙබරවාරි 25 වැනිදා CID අත්අඩංගුවට පත්විය. ත්රස්තවාදය වැළැක්වීමේ පනත (PTA) යටතේ රඳවාගෙන සිටින ඔහුව, පාස්කු ප්රහාරය පිළිබඳ නඩුවේ තෙවන සැකකරු ලෙස නම් කර තිබේ. මෙම නඩුව කොළඹ කොටුව මහෙස්ත්රාත් අධිකරණයේදී විභාග වන අතර, එය ලබන ජූලි 01 වැනිදා නැවත කැඳවීමට නියමිතය.
කෙසේ වෙතත් පොලිසිය සහ බලධාරීන් මෙම චෝදනා ප්රතික්ෂේප කරමින් කියා සිටින්නේ, ඔහුට කිසිදු අමානුෂික සැලකීමක් සිදු කර නොමැති අතර නිසි පරිදි ආහාර පාන පවා සපයා ඇති බවය.
මේ අතර සලේගේ සෞඛ්ය තත්ත්වය පිළිබඳව පවුලේ සාමාජිකයින් සහ නීතිඥවරු බරපතල චෝදනා එල්ල කරති. ඔහුගේ ශාරීරික හා මානසික තත්ත්වය දැඩි ලෙස පිරිහී ඇති බවත්, ඔහු PTSD (පශ්චාත් කාර්ය සාධන ආතතික ගුණාංග ආබාධය), විෂාදය සහ දැඩි ආතතියෙන් පීඩා විඳින බවට වෛද්ය වාර්තා ඉදිරිපත් කර ඇති බවත් ඔවුහු පවසති. රැඳවුම් නියෝග මත සිටින ඔහු ආහාර ප්රතික්ෂේප කරමින් උපවාසයක නිරත වීම හේතුවෙන් තත්ත්වය තවදුරටත් උත්සන්න වී තිබේ.
ඒ අනුව, සෞඛ්ය තත්ත්වය පිරිහීම හේතුවෙන් ඔහුව ඊයේ (ජූනි 07) කොළඹ ජාතික රෝහලට ඇතුළත් කර ඇති අතර, මේ වන විට එහි හදිසි ප්රතිකාර ඒකකයේ ප්රතිකාර ලබමින් සිටී. මේ සම්බන්ධයෙන් සලේගේ බිරිය වන මනෝරි සලේ විසින් පොලිස්පතිවරයා (IGP) වෙත පැමිණිල්ලක් ද ඉදිරිපත් කර තිබේ. නීතිඥවරුන් ඉල්ලා සිටින්නේ ඔහු වෙනුවෙන් ස්වාධීන වෛද්ය ඇගයීමක් සිදු කරන ලෙසය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
සුරේෂ් සලේගේ මෙම අත්අඩංගුවට ගැනීම සහ විමර්ශන ක්රියාවලිය වටා මේ වන විට දැඩි දේශපාලනික සහ නීතිමය කතිකාවතක් නිර්මාණය වී ඇත.
