ඉඳුනිල් කහටපිටිය –
මහනුවර, කුණ්ඩසාලේ, වරාපිටිය ප්රදේශයේ නිවසක තිබී අබිරහස් ලෙස මියගිය 23 හැවිරිදි විවාහක තරුණියකගේ මළසිරුරක් පොලිසිය විසින් සොයාගෙන තිබේ.
මෙම මළසිරුර සොයාගෙන ඇත්තේ මියගිය තැනැත්තියගේ සැමියාට අයත් බව කියන නිවසේ තිබියදීය.
මරණකාරියගේ ඥාතීන් චෝදනා කරන්නේ ඇයගේ ස්වාමිපුරුෂයා ඇතුළු පවුලේ සාමාජිකයන් විසින් ඇයට පහර දී ඝාතනය කර ඇති බවය. කෙසේ වෙතත්, ඇයගේ ස්වාමිපුරුෂයා ප්රකාශ කර ඇත්තේ තමා සංගීත සංදර්ශනයක් බැලීමට ගොස් අද අලුයම නිවසට පැමිණි අවස්ථාවේදී ඇය ගෙල වැලලාගෙන සිටිනු දුටු බවත්, පසුව එම කඹය කපා ඇයගේ සිරුර ඇඳ මතට ගත් බවත්ය.
මොවුන් විවාහ වී වසර දෙකකට ආසන්න කාලයක් ගත වී ඇති අතර, මත්ද්රව්යවලට ඇබ්බැහි වූ ස්වාමිපුරුෂයා ඇයට දිගින් දිගටම සිදුකළ තාඩන පීඩන සම්බන්ධයෙන් මීට පෙර බලගොල්ල පොලිසියට පැමිණිලි කිහිපයක්ම සිදු කර තිබූ බව මියගිය තරුණියගේ ඥාතීන් සඳහන් කරයි. ස්වාමිපුරුෂයා විසින් සිදුකරන පහරදීම් හේතුවෙන් ඇය නිරන්තරයෙන් දෙමාපියන්ගේ නිවසට පැමිණ ඇති අතර, ඇය දික්කසාද වීමේ සූදානමකින් පසුවූ බව ද ඥාතීන් වැඩිදුරටත් පැවසීය.
මේ අතර මියගිය තරුණිය විසින් ලියන ලදැයි කියන ලිපියක් තරුණයාගේ නිවසේ පාර්ශ්වය විසින් පොලිසියට සහ මහේස්ත්රාත්වරයාට ඉදිරිපත් කර ඇතත්, ඥාතීන් චෝදනා කරන්නේ එම ලිපියේ ඇති අත්අකුරු තම දියණියගේ නොවන බවයි.
මහේස්ත්රාත් පරීක්ෂණය සිදුවන අවස්ථාවේදී මියගිය තරුණියගේ පාර්ශ්වයේ පිරිස නොසන්සුන්කාරී ලෙස හැසිරීම හේතුවෙන් එම ස්ථානයේ උණුසුම් තත්ත්වයක්ද හටගෙන තිබේ. ඒ අනුව තරුණියගේ දේහය පශ්චාත් මරණ පරීක්ෂණය සඳහා මහනුවර ජාතික රෝහල වෙත යවන ලෙස මහේස්ත්රාත්වරයා නියෝග කර ඇත.
බලගොල්ල පොලිසිය සිද්ධිය සම්බන්ධයෙන් වැඩිදුර පරීක්ෂණ පවත්වයි.
