2016 වසරේ රජයට රුපියල් ලක්ෂ 88 කට අධික පාඩුවක් සිදුකිරීමේ දූෂණ චෝදනාවක් සම්බන්ධයෙන් වත්මන් බලශක්ති අමාත්ය කුමාර ජයකොඩි වෙත කොළඹ මහාධිකරණය හමුවේ අද (27) අධි චෝදනා පත්ර භාර දෙන ලදී.
කොළඹ මහාධිකරණ විනිසුරු රශාන්ත ගොඩවෙල ඉදිරියේ මෙම චෝදනා භාරදීම සිදු විය. මීට පෙර අධිකරණය විසින් නිකුත් කර තිබූ සිතාසියකට අනුව විත්තිකාර කුමාර ජයකොඩි අද පෙරවරුවේ අධිකරණය හමුවේ පෙනී සිටියේය.
සිද්ධිය සහ චෝදනා
අල්ලස් හෝ දූෂණ චෝදනා විමර්ශන කොමිෂන් සභාව විසින් මෙම නඩුව පවරා ඇත. චෝදනා පත්රයට අනුව, 2016 වසරේ ලංකා පොහොර සමාගමේ සේවය කරමින් සිටියදී සිදුකළ ප්රසම්පාදන ක්රියාවලියකදී පුද්ගලික සමාගමකට අයුතු වාසියක් සැලසීමෙන් රජයට රුපියල් 8,859,708 ක මූල්ය පාඩුවක් සිදුකළ බවට ඔහුට චෝදනා එල්ල වී තිබේ. මෙය අල්ලස් හෝ දූෂණ විරෝධී පනතේ 70 වැනි වගන්තිය යටතේ ‘දූෂණය’ නමැති වරද සිදුකිරීමක් බව කොමිසම පෙන්වා දෙයි.
ඇප නියම කිරීම
අධි චෝදනා පත්ර භාරදීමෙන් අනතුරුව, විත්තිකරු රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට විනිසුරුවරයා නියෝග කළේය. එසේම විත්තිකරුගේ ඇඟිලි සලකුණු ලබාගෙන ඒ පිළිබඳ වාර්තාවක් කැඳවන ලෙස ද පොලිසියට නියම විය.
මෙම නඩුව පූර්ව නඩු විභාග සම්මන්ත්රණය (Pre-trial conference) සඳහා ලබන මැයි මස 06 වනදා යළි කැඳවීමට අධිකරණය තීන්දු කළේය.
