6වන ශ්රේණියේ විෂය මාලාව ආදල ඉංග්රීසි මොඩියුලයේ බරපතල වැරැද්දක් සිදුවී ඇති බව අද රජය පිළිගත්තේය. මේ සම්බන්ධව රජය වෙනුවෙන් ප්රකාශයක් කරමින් අද විදේශ කටයුතු ඇමති විජිත හේරත් පැවසුවේ මේ මොඩියුලයට ඇතුළත් කර ඇත්තේ කිසිසේත්ම ඊට ඇතුළත් නොවිය යුතු දෙයක් බවය.
එම බරපතල වැරැද්ද මේ වනවිට අධ්යාපන අමාත්යාංශය විසින් පැහැදිලිව නිරීක්ෂණය කර ඇතැයි ද හෙතෙම පැවසුවේය.
අද ප්රවෘත්ති දෙපාර්තමේන්තුවේ පැවති මාධ්ය හමුව අමතමින් ඇමතිවරයා මෙසේ පැවසුවේය.
“ වැරැද්දක් වෙලා තියනවා. ඒ වැරැද්ද සම්බන්ධව විමර්ශනයක් කරලා ගත යුතු ක්රියාමාර්ග අනිවාර්යයෙන් ගන්නවා. අරගෙන ඒ වැරැද්ද ඉවත් කරලා මේ හයවන ශ්රේණියේ මොඩියුලය නිවැරදි ආකාරයට දරුවන්ට ලබා දෙනවා…”
වැරැද්ද හඳුනාගත් විගසම අගමැතිවරියගේ උපදෙස් මත අධ්යාපන ලේකම් තුමාගේ මූලිකත්වයෙන් දත්ත තොරතුරු ලබා ගැනීම සඳහා කමිටුවක් පත් කළ බවත්, එම කමිටුවේ වාර්තාව ලැබී ඇති බැවින් ඒ වැරැද්ද සිදුකළ අයට එරෙහිව නීත්යානුකූල ක්රියාමාර්ග ගැනීමට ඉදිරි කටයුතු සිදුවන බවත් ඇමතිවරයා පැවසුවේය. වැරැද්ද නිවැරදි කරගෙන මෙම අධ්යාපන ප්රතිසංස්කරණ දිගටම පවත්වාගෙන යෑමේ සාමුහික වගකීම රජය ගන්නා බව ඔහු අවධාරණය කළේය.
අපරාධ පරීක්ෂණ දෙපාර්තමේන්තුවේ පරීක්ෂණයේ අරමුණ සිද්ධ කළේ කෙසේ ද, සිද්ධ කළේ මොන අරමුණින්ද යන්න සොයා බැලීම බව ඇමතිවරයා පැවසුවේය.
“ පරීක්ෂණය නිවැරදිව සිදුවෙමින් තියනවා. දැන් අපට බලා ගන්න පුලුවන් කවුද මේක කළේ, මොන අරමුණින්ද කළේ කියලා. කවුද කළේ කියන එක සොයා ගන්න පහසුයි. මොන අරමුණින්ද කළේ කොහොමද මේක සිද්ධ කරන්නේ ඇයි මේක කළේ කියන එකත් අපරාධ පරීක්ෂණ දෙපාර්තමේන්තුව විසින් හොයාගෙන ඒ පරීක්ෂණ වාර්තාවත් එක්ක ඒ අදාල නීතිමය ක්රියාමාර්ග ගන්නවා. “
“ ඒ වගේම අමාත්යාංශය විදිහට අමාත්යාංශය පැත්තෙන් ගනු ලබන අභයන්තර විනය ක්රියාමාර්ගත් අනිවාර්යයෙන් ගන්නවා. වෙච්ච වැරැද්ද කිසිසේත්ම ඒ මොඩියුලයට ඇතුළත් කරන්නේ නෑ. එය ඉවත් කරනවා. එය ඉවත් කරලා නිවැරදි විදිහට 6 ශ්රේණියේ දරුවන්ට ඒ මොඩියුලය ලබා දෙනවා. ඒ අනුව ප්රතිසංස්කරණ ක්රියාත්මක කරනවා. ඒ නිසා කිසිම ආකාරයක සැකයක් අවිශ්වාසයක් ඇතිකරගත යුතු නෑ.
