මනම්පිටිය නිමල් ජයරත්න –
දහය වසරේ ඉගෙනුම ලබන සිසුවියන් අට දෙනෙකුට ලිංගික අතවර කර ඇතැයි, දෙමවුපියන් කරන ලද පැමිණිලි කිහිපයකට අනුව දිඹුලාගල අධ්යාපන කලාපයේ අරලගංවිල අධ්යාපන කොට්ඨාසයේ මහා විද්යාලයක ගණිත ගුරුවරයෙකු අද ( 07 ) අත්අඩංගුවට ගත් බව අරලගංවිල පොලිසිය කියයි.
දෙමව්පියන් විසින් පොලිසියට අවස්ථා කිහිපයකදී කරන ලද පැමිණිලිවලට අදාළව ගණිත ගුරුවරයා අත්අඩංගුවට ගත් බවත්, එම ගුරුවරයා අතින් පාසලේ දහය වසරේ සිසුවියන් අට දෙනෙකු අවස්ථා කිහිපයකදීම ලිංගික අතවරයට පත්ව ඇති බවත් ඒ පිළිබඳ පරීක්ෂණ සිදුකරන අරලගංවිල පොලිසිය පවසයි.
අත්අඩංගුවට ගත් ගණිත ගුරුවරයා අද පොළොන්නරුව මහේස්ත්රාත් අධිකරණයට ඉදිරිපත් කිරීමට කටයුතු කරන බවද පොලිසිය සඳහන් කරයි.
අරලගංවිල පොලිස් ස්ථානාධිපති ප්රධාන පොලිස් පරීක්ෂක ඉඳුනිල් හේමපාලගේ උපදෙස් අනුව කාන්තා පොලිස් කාර්යාංශය ඇතුළු පොලිස් නිලධාරි කණ්ඩායමක් සිද්ධිය පිළිබඳ වැඩිදුර පරීක්ෂණ සිදුකරයි.
