කිසිම ඊශ්රයාල ජාතිකයෙකුට ආගමික මධ්යස්ථානයක් ඉදිකිරීමට රජය අවසර ලබා දී නැති බව අගමැතිනි හරිනි අමරසූරිය අද පාර්ලිමේන්තුවේ දී පැවසුවාය.
ඇය ඒ බව ප්රකාශ කළේ සමගි ජන බලවේගයේ පාර්ලිමේන්තු මන්ත්රි මුජිබර් රහුමාන් විසින් රට තුළ ඉදිවන ඊශ්රයාල ආගමික මධ්යස්ථාන සම්බන්ධව කළ ප්රශ්න කිරීමකට පිළිතුර ලබා දෙමිනි.
මන්ත්රීවරයා කීවේ ආරක්ෂක අමාත්යාංශයේ අනුමැතිය සහිතව වැලිගම, දෙහිවල අල්විස් පෙදෙස, චිත්තප්ලම් ගාර්ඩිනන් මාවතේ සිනමන් රෙඩ් ගොඩනැගිල්ල ඉදිරිපිට ඊශ්රයාල ආගමික මධ්යස්ථාන යුද හමුදාවේ සහ විශේෂ කාර්ය බලකායේ ආරක්ෂාව සහිතව ඉදිකරන බවය. එමෙන්ම වැලිගම ඊශ්රයාල ආගමික මධ්යස්ථානය ඉදිවන්නේ මුස්ලිම් ජනතාව ජීවත්වන ප්රදේශයක බව ද ඔහු පෙන්වා දුන්නේය.
දෙහිවල අල්විස් පෙදේසේ මෙම ආගමික මධ්යස්ථානය ඉදිවන තැන ඉදිරියෙන් ගමන් කළ සරසවි සිසුවෙක් අත්අඩංගුවට ගෙන අනතුරුව බේරා ගැනීමට සිදුවූයේ උසාවියෙන් බවද මන්ත්රීවරයා පැවසුවේය.
එකම යුදෙව් ජාතිකයෙක් හෝ ජීවත් නොවන ලංකාව තුළ මෙවැනි ආගමික මධ්යස්ථාන පිහිටුවීම නැති ප්රශ්න ඇතිකරගැනීමක් බවත් මොසාඩ් වැනි සංවිධාන දිවයිනේ පැලපදියම් වීමට උත්සාහ කරන්නේ නම් එය ජාතික ආරක්ෂාවට බරපතල ප්රශ්නයක් වීම නොවැලැක්විය හැකි බවත් මන්ත්රීවරයා පෙන්වා දුන්නේය.
එහෙත් අගමැතිනී හරිනි අමරසූරිය අවධාරණයෙන් පැවසුවේ එවැනි ඉදිකිරීම් සඳහා රජයෙන් අවරස ලබා දී නැති බවය.
“ඊශ්රයාල ජාතිකයන් ආගමික මධ්යස්ථාන හෝ ඒ සමාන ස්ථාන ගොඩනැගීම සඳහා බුද්ධ ශාසන හා සංස්කෘතික කටයුතු අමාත්යාංශය හෝ ඒ යටතේ ඇති දෙපාරත්මේන්තුවලින් අවසර ලබාදීමක් සිදුකර නෑ. එවැනි මධ්යස්ථාන පවත්වාගෙන යනවා කියලා තොරතුරු ලැබෙනවා. ඒ සම්බන්ධව අපි නිරීක්ෂණය කරනවා. අවසරයකින් නෙමෙයි ඒවා කරන්නේ. ඒ සම්බන්ධත් මොනවද සිදුකළ යුත්තේ කියලා ආරක්ෂක අමාත්යාංශය මෙන්ම විදෙස් කටයුතු අමාත්යාංශය මගිනුත් කටයුතු කරනවා.” අගමැතිනිය පැවසුවාය.
කිසිම රටකට සංචාරක තහන්චි පනවන්නේ නැති නමුත් ජාත්යාන්තර නීතිය අනුව කටයුතු කරන බවත්, රටට පැමිණෙන සෑම සංචාරයෙකුටම ආරක්ෂාව සැලසීම රජයේ වගකීම බවත් අගමැතිනිය කීවාය. ඊශ්රයාල ජාතිකයින්ට අරුගම්බේ සිද්ධියත් සමග ඇති වූ තත්ත්වය තුළ ආරක්ෂාව සැපයුවා විනා වෙනත් අර්ථයකින් ඔවුන්ට ආරක්ෂාව සැපයුවේ නැති බවත් ඇය පැවසුවාය.
පසුගිය වසර තුළ ඊශ්රයාල ජාතිකයින් 25514 සංචාරය සඳහා ලංකාවට පැමිණ තිබිණි.
