ලලිත් චාමින්ද –
සිරකරුවන්ගේ සුභසාධක වැඩසටහන් සඳහා සිරකරු සුභසාධක අරමුදලින් 2020 වර්ෂයේ දී කිසිදු වියදමක් දරා නොතිබු බව ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වේ.
එමෙන්ම සිරකරුවන් නිදහස් කළ පසු ඔවුන්ගේ පුනරුත්ථාපනයට උපකාරීවන පශ්චාත්භාරසේවා සඳහා අරමුදලින් කිසිදු ප්රතිපාදනයක් සලසා නොතිබු බවද විගණනය මගින් අනාවරණය කොට ඇත.
තවද අරමුදලේ ප්රගතිය මැනීම සඳහා කාර්යසාධන දර්ශක හදුන්වා දී නොතිබුනු බවද විගණන වාර්තාවේ සඳහන් වේ. බන්ධනාගාරවල පැවැත්විය යුතු වැඩසටහන් ස්වභාවය, සහභාගි කළ යුතු සිර සැකකරුවන් සංඛ්යාව දැරීමට සිදුවන පිරිවැය ඇතුළත්ව පුර්ව සැලසුම් සකස්කොට එම සැලසුම්වලට අනුව ප්රගතිය වාර්තා නොකිරීම නිසා අරමුදලේ අරමුණ ඉටුකිරීමේ මුල්ය හා භෞතික කාර්යසාධනය ඇගයමට නොහැකි වී ඇති බව ද විගණනය මගින් අනාවරණය කොට ඇත.
එමෙන්ම බන්ධනාගාර ආයතන වෙත ලැබෙන පාරිභෝජ්ය ද්රව්ය ගිණුම්ගත කිරීම සඳහා ගිණුම්කරණ ප්රතිපත්තියක් හඳුනාගෙන නොතිබීම හේතුවෙන් 2020 වර්ෂයේ දී රුපියල් 2,195,395ක පාරිභෝජ්ය ද්රව්ය ලැබීම හා තොග ප්රමාණයන් මුල්ය ප්රකාශනවල දක්වා නොතිබුණු බව ද විගණන වාර්තාවේ සඳහන් වේ.
එමෙන්ම අරමුදල සඳහා වෙනම බැංකු ගිණුමක් පවත්වා නොමැති අතර සුභසාධක අරමුදලේ ගනුදෙනු දෙපාර්තමේන්තුවේ නිල බැංකු ගිණුම යටතේ ඉටුකරගෙන තිබු බව ද විගණනය මගින් අනාවරණය කොට ඇත.
සිරකරු සුභසාධක අරමුදලේ මුල්ය ප්රකාශනවලට අනුව සමාලෝචිත වර්ෂය සඳහා (2020) අරමුදලේ මුල්ය ප්රතිඵලය රුපියල් 7,63,088ක ඌනතාවයක් ඇති බවද විගණන වාර්තාවේ සඳහන් වේ.
එමෙන්ම 2019 වර්ෂයේ දී මුල්ය ප්රතිඵලය අනුව 13,59,184ක ඌනතාවයක් වුයෙන් මුල්ය ප්රතිපලයේ 5,96,096ක වර්ධනයක් සිදුවි තිබුණි. 2020 වර්ෂයේ අරමුදල මගින් ක්ෂය හැරුණුවිට කිසිදු වියදමක් දරා නොතිබිම මෙම වර්ධනය කෙරෙහි ප්රධාන වශයෙන් බලපා තිබු බවද විගණන වාර්තාවේ සඳහන් වේ.
සිරකරු සුභසාධක අරමුදලක් පිහිටුවිම සිරකරුවන්ගේ පොදු සුභ සිද්ධිය සඳහා ඉන් වියදම් දැරීම හා ඊට සම්බන්ද අනුෂාංශික සියලු කරුණු සඳහා විධි විධාන සැලැස්වීම පිණිස ජාතික රාජ්ය සභාවේ 1973 අංක 18 දරණ බන්ධනාගාර දේපාර්තමේන්තුවේ සිරකරු සුභසාධක අරමුදල පනත පිහිටුවා තිබුණි.
බන්ධනාගාර කළමනාකාරීත්වය
මෙම විගණන නිරික්ෂණ සම්බන්දයෙන් කළමණාකාරිත්වය ද අදහස් දක්වා තිබුණි.
2020 වර්ෂයේ සිරකරු සුභසාධක අරමුදලේ සුභසාධන කටයුතු සඳහාවන වියදම් දැරීම සඳහා අරමුදලේ පැවති ශේෂය ප්රමාණවත් නොමැති බව කළමණාකාරිත්වය මගින් විගණනයට ප්රකාශකොට ඇත.
මේ සඳහා රජයේ හා භාණ්ඩාගාරයේ හෝ වෙනත් මුල්ය සහායක් ද නොමැති බැවින් 2020 වර්ෂය සඳහා ඇස්තමේන්තුවක් සකස්කර නොතිබුණි. 2020 වර්ෂයේ සිරකරු සුභසාධක අරමුදල මගින් කිසිදු වියදමක් දරා නොතිබුන ද සිරකරුවන්ගේ සුභසාධන කටයුතු සඳහා බාහිර පර්ශවයන්ගෙන් ලැබෙන දායකත්වයෙන් එම කටයුතු බෝහෝදුරට ඉටුකරගෙන තිබූ බවද කළමණාකාරිත්වයේ අදහස් දැක්වීමේ දී විගණනයට ප්රකාශකොට ඇත.
ඉදිරියේ දී අරමුදලේ ප්රගතිය මැනීම සඳහා කාර්යසාධන දර්ශක හඳුන්වාදීමට කටයුතු කරණ ලෙස බන්ධනාගාර කොමසාරිස් (පුනරුත්ථාපන ) වෙත උපදෙස් ලබා දී ඇති බව ද කළමණාකාරිත්වය මගින් විගණනයට ප්රකාශකොට ඇත.
බන්ධනාගාර වෙත ලැබෙන පාරිභෝජ්ය ද්රව්ය සම්බන්ධයෙන් කළමණාකාරිත්වය සඳහන් කොට ඇත්තේ සිරකරුවන්ගේ පරිහරණය සඳහා පරිභෝජ්ය ද්රව්ය පරිත්යාග කරන අතර එම භාණ්ඩ සිරකරුවන්ගේ පරිහරණය සඳහා ලබාදීමට කටයුතු කරන බවය.
එම භාණ්ඩ පාරිභෝජනයෙන් අවසන්වීම හේතුවෙන් එවා තොග ලෙස අවසන් ගිණුමට ගැලපීම සිදුනොකරණ බවද කළමණකාරිත්ව අදහස් දැක්විමේ දී විගණනයට ප්රකාශකොට ඇත.
එහෙත් වත්කම් ගිණුම්ගත කිරීම ක්රමවත් කිරීම සඳහා වත්කම් ප්රවර්ථන වර්ෂයේ සිට විසර්ජන ගිණුම මගින් වාර්තා කිරීමට කටයුතු කරමින් සිටින බවද විගණනයට ප්රකාශකොට ඇත.
පාරිභෝජ්ය ද්රව්ය පරිත්යාග ගිණුම්ගත කිරීම සඳහා ගිණුම්කරණ ප්රතිපත්තියක් හඳුන්වාදිය යුතු බව ද විගණනය මගින් නිර්දේශකොට ඇත.
සිරකරු සුභසාධක අරමුදලේ 2020 දෙසැම්බර් මස 31 දිනෙන් අවසන් වර්ෂය සඳහා මුල්ය කාර්ය සාධන ප්රකාශය සම්බන්දයෙන් මෙම වාර්තාව නිකුත්කොට තිබුණි.
