සියල්කොට් ඛේදවාචකයේ මූලික විමර්ශන වාර්තාව පන්ජාබ් ප්රධානීන් විසින් අගමැති ඉම්රාන් ඛාන් වෙත යවා ඇති බව පකිස්ථාන පුවත් ඒජන්සි වාර්තා කරයි.
පකිස්ථානු ප්රවෘත්ති සේවා දක්වන මූලික වාර්තාවට අනුව, ප්රියන්ත කුමාර දියවඩන පෙරේදා (03) දිනයේ පෙරවරු 10:28 ට ප්රියන්ත කුමාර විසින් කම්හලේ බිත්තිවලින් පෝස්ටර් කිහිපයක් ඉවත් කිරීමට දැනුම් දී එය ඉවත් කරවීමත් සමඟ ආරවුලක් ඇති වී තිබේ. එම පෝස්ටර්වල ශුද්ධ වූ නබි (සල්) තුමාණන්ගේ නම සටහන් කර තිබූ බව වාර්තා වේ.
ටික වේලාවකට පසු කර්මාන්තශාලා හිමිකරු එම ස්ථානයට පැමිණ ගැටලුව විසඳා ඇත. ප්රියන්ත කුමාර තමාගේ වරදවා වටහා ගැනීම ගැන සමාව ඉල්ලා තිබේ.
කුමාර සමාව ඉල්ලීමෙන් පසු සිද්ධිය සමථයකට පත් වූ බව වාර්තා වන අතර කම්හල් සේවකයන් විසිර ගොස් ඇත.
සමථයකට පත් වූ පසු –
කෙසේ වෙතත්, සමහර කම්කරුවන් කළමනාකරුට පහර දීමට තම සගයන් උසිගන්වා ඇත. සිද්ධිය සමථයකට පත් වී ඇතැයි කියා මිනිත්තු කිහිපයක් ඇතුළත, කාර්මික ඒකකයේ පරිශ්රය තුළදීම මැර පිරිසක් ප්රියන්ත කුමාරට පහර දී මරා දමා තිබේ.
මෙම ම්ලේච්ඡ ප්රහාරය සිදුවන විට කම්හල තුළ මුරකරුවන් 13 දෙනෙකු සිට ඇත. ඔවුන් කිසිවෙක් වින්දිතයා බේරා ගැනීමට හෝ මැර පිරිස විසුරුවා හැරීමට උත්සාහ නොකළ බව වාර්තාවේ සඳහන් වේ.
පසුව කුමාරගේ සිරුර කම්හලෙන් පිටතට ඇදගෙන ගොස් තිබේ.
සිද්ධිය සම්බන්ධයෙන් පොලිසියට පෙරවරු 11.28 ට දුරකථන ඇමතුමක් ලැබුණු බව නිලධාරීහු පවසති. විනාඩි 12ක් ඇතුළත පොලිස් කණ්ඩායමක් එම ස්ථානයට පැමිණ තිබේ.
අත්අඩංගුවට ගැනීම්
අද (05) උදෑසන වනවිට සිද්ධිය සම්බන්ධව ප්රධාන සැකකරුවන් 13ක් පොලිස් අත්අඩංගුවේ පසුවිය. අද උදෑසන වන විට තවත් සැකකරුවන් හය දෙනෙකු ද අත්අඩංගුවට ගත් බවත් මේ වනවිට මෙම ප්රධාන සැකකරුවන් 19 දෙනා ඇතුළුව සැකකරුවන් 124ක් අත්අඩංගුවට ගෙන ඇති බවත් මාධ්ය වාර්තා කරයි.
අත්අඩංගුවේ පසුවන ප්රධාන සැකකරුවන් 19 දෙනා ගුජ්රන්වාලා හි පිහිටි ත්රස්ත මර්දන අධිකරණයට ඉදිරිපත් කිරීමට නියමිත බව පොලිසිය පවසා ඇත.
මේ අතර, පන්ජාබ් පොලිසියේ ප්රකාශකයෙකු නිකුත් කළ නිවේදනයක දැක්වෙන්නේ සිද්ධියේ වීඩියෝ දර්ශන ආධාරයෙන් නව අත්අඩංගුවට ගැනීම් සිදු කර ඇති බවයි.
“අත්අඩංගුවට ගත් සැකකරුවන් ශ්රී ලාංකික පුරවැසියාට වධ හිංසා පමුණුවන ආකාරය වීඩියෝ පටයේ දැකිය හැකිය,” ප්රකාශකයා පැවසීය.
සැකකරුවන් තම මිතුරන්ගේ සහ ඥාතීන්ගේ නිවෙස්වල සැඟවී සිට ඇති බව ඔහු පැවසීය.
පොලිසිය “විමර්ශන සඳහා නවීන තාක්ෂණය” භාවිතා කරන බවත්, අත්අඩංගුවට ගත් සැකකරුවන්ගෙන් 19 දෙනෙකු මෙම ඝාතනයේ ප්රධාන භූමිකාවක් ඉටු කර ඇති බවත් එම ප්රකාශකයා වැඩිදුරටත් සඳහන් කළේය.
පන්ජාබ් ප්රධාන අමාත්ය උස්මාන් බුස්ඩාර් සහ පොලිස්පතිවරයා පුද්ගලිකව පරීක්ෂණ අධීක්ෂණය කරන බවත්, සී එම් බුස්ඩාර් විසින් නඩු පසු විපරම් කිරීමේ කාර්යය පැමිණිල්ලේ ලේකම්වරයාට පවරා ඇති බවත් ඔහු පැවසීය.
