පසුගිය බ්රහස්පතින්දා (25) බත්තරමුල්ල කොරාඹේදී වෙඩි තබා පුද්ගලයෙක් ඝාතනය කිරීමේ සිද්ධියට අදාල සැකකාර ඝාතකයෙක් ලංකාවෙන් සිංගප්පූරුව බලා පැන ගොස් සිටිය දී යළි රටට ගෙන්වා ගෙන අද (31) පොලිස් අත් අඩංගුවට ගැනීමට විමර්ශන කණ්ඩායම් සමත් වී තිබේ.
ආපසු ගෙන්වා ගත් සැකකරුව අද උදේ කටුනායක ගුවන් තොටුපලේ දී අත් අඩංගුවට ගත් බව අතුරුගිරිය පොලිසිය කීවේය. අත් අඩංගුවට පත් වූයේ ඝාතනය සඳහා වෙඩික්කරු පැමිණි යතුරු පැදියේ පැදිකරුය.
පසුගිය සිකුරාදා මෙම ඝාතකයන් විසින් මරා දමනු ලැබුවේ කොරාඹේ පදිංචිව සිටි ජනක පුෂ්පකුමාර (44) නැමැති පොළියට මුදල් ලබා දෙන පුද්ගලයකි.
ඔහු දැනට විදෙස් ගතව සැඟවී සිටින සංවිධානාත්මක අපරාධ කල්ලි සාමාජිකයෙකුවූ කොරාඹේ වත්තේ බන්ටි නමැත්තාගේ සහෝදරයෙකි.
ඝාතනයෙන් පසු මෙම ඝාතකයින්ගෙන් අයෙක් මෙරටින් සිංගප්පූරුව බලා පළා යන බවට නුගේගොඩ පොලිස් කොට්ඨාසය භාර ජ්යේෂ්ඨ පොලිස් අධිකාරීවරයාට ලැබුණු තොරතුරක් ප්රකාරව ඔහුට එරෙහි විදෙස් ගමන් තහනම ලබා ගත්තේය. ඒ වනවිට යානය කටුනායක ගුවන් තොටුපලින් සිංගප්පූරුව දක්වා පිටත් වී තිබිණි.
ලබා ගත් විදෙස් ගමන් තහනමකට යටත්ව මෙම පුද්ගලයා සිංගප්පූරුවේ දි සිංගප්පූරු ආරක්ෂක අංශවල අත් අඩංගුවට පත් වූයේය.
අනතුරුව එරට බලධාරීන් ඔහුට රට තුළට ඇතුළු වීමට නොදී ආපසු හරවා ලංකාවට එවා තිබේ. එසේ පැමිණි සැකකරු කටුනායක ගුවන් තොටුපොළේ දී අතුරුගිරිය පොලිසිය විසන් අත් අඩංගුවට ගෙන තිබිණි.
අත් අඩංගුවට පත් වන්නේ අතුරුගිරිය ප්රදේශයේ පදිංචි 23 හැවිරිදි තරුණයෙකි.
අතුරුගිරියේ ලැඩියාගේ කල්ලියේ දැනුම් දීමකට අනුව මෙම සැකකරු විසින් අදාල ඝාතනයට සම්බන්ධ වී ඇතැයි පොලිසිය පවසයි.
කඩුවෙල මහේස්ත්රාත් අධිකරණයට යොමු කිරීමෙන් පසු රැඳවුම් නියෝග මත තවදුරටත් මෙම තැන්තාගෙන් ප්රශ්න කිරීමට නියමිත බව විමර්ශන අංශ කියයි.
