දැනට අධිකරණය මග හැර වරෙන්තු පිට සිටිනා රාජකාරිය තහනම් කළ පොලිස්පති දේශබන්දු තෙන්නකෝන් සොයා කතරගම බස්නාය නිලමේවරයාගේ 84 හැවිරිදි මෑණියන් සිටින මාලිම්බඩ නිවස සෝදිසි වරෙන්තුවක් නොමැතිව සිවිල් පිට පැමිණි පොලිස් නිලධාරින් පිරිසක් පරීක්ෂා කිරීම පිළිබඳ සිය බරපතල අප්රසාදය පල කරන බව කතරගම බස්නායක නිලමේ ඩිෂාන් ගුණසේකර පවසයි.
ඔහු පැවසුවේ මේ පරීක්ෂා කිරිම සම්බන්ධව තමන් මාලිම්බඩ පොලිසියෙන් විමසූ විට ඔවුන් ඒ ගැන නොදැන සිටි බවය. බස්නායක නිලමේවරයා පෙන්වා දෙන්නේ දේශබන්දු තෙන්නකෝනට ඇත්තේත් අදාල පොලිසි වසමේ පොලිසිය දැනුම්වත් නොකර පොලිස් කණ්ඩායමක් යෙදවීම පිළිබඳ චෝදනාවක් බවත් මේ සිදුවී ඇත්තේත් ඊට සමානම වරදක් බවය.
අද අපරාධ පරීක්ෂණ දෙපාර්තමේන්තුවට පැමිණි කතරගම බස්නායක නිලමේ ඩිෂාන් ගුණසේකර මාධ්ය අමතා මෙසේ ද පැවසුවේය.
“ඊයේ රෑ කරපු වැඩේ පුරවැසියෙක් විදිහට කළ ප්රශ්නයක්. මගේ අම්මට අවුුරුදු 84ක් වෙනවා. අම්මයි සේවකයින් දෙදෙනෙකුයි විතරයි ඉන්නේ ගෙදර. කිසිම සර්ච් වොරන්ට් එකක්වත් යුනිෆෝම් ඇඳගත් නිලධාරියෙක්වත් කවුරුවත් නැතිව සිවිල් පිරිසක් ඇවිත් තියෙන්නේ. ඉතින් ඔවුන් අතේ කිසිම නීත්යානුකූල ලිවිල්ලක් තිබුණෙ නෑ, ඔවුන්ගේ අනන්යතාවයවත් ඔවුන්ට එළිකරගන්න බැරි වුනා.”
“ඊට පස්සේ මාතර මාලිම්බඩ මගේ ගෙදර තියන කොට්ඨාසේ පොලිසියෙන් විමසුවාම ඔවුන් ඒ ගැන දැනුම්වත් නෑ. ඉතින් ඒ පාර පොලිසියේ නිලධාරීන් වාහනයකින් ගිහින් තිබුණා මගේ ගෙදරට. ඒ නිලධාරීන් තමයි මොවුන්ව හඳුනාගෙන තියෙන්නේ පොලිස් නිලධාරීන් හැටියට. සිවිල් නිලධාරීන්.”
“ඊට පස්සේ අම්මගෙන් ප්රකාශයක් සටහන් කරන් තිබුණා ඔවුන් ඇවිත් අම්මට කරදර කළේ නෑ කියලා. අවුරුදු 84ක්වන අම්මට කරපු එ් කරදරයම ඇති. මොකද දවසට බේත් පෙති තිහක් විතර බොනවා.”
“ඒ වගේ වියෝවෘද කෙනෙකුට ඒ වගේ කරදර කරන එකම තමයි ප්රශ්නය.” බස්නායක නිලමේවරයා පැවසුවේය.
“මෙතන තියන ප්රශ්නය මේකයි. ගෙයක් පරීක්ෂා කළාට කිසිම ප්රශ්නයක් නෑ, නීත්යානුකූල නොවන විදිහට ගෙවල්වලට ගිහින් සර්ච් වොරන්ට් එකක් නැතිව යුනිෆෝස් ඇඳගත්තු නැති නිලධාරීන් ගිහින් මේ වගේ පරීක්ෂා කිරීම ආණ්ඩුව අපහසුතාවයට පත් කිරීමක්.”
“අන්තිමට කියලා තියෙන්නේ දේශබන්දු තෙන්නකෝන් මහත්තයා ඉන්නව ද බලන්න ආවා කියලා. ”
“ඉතින් දේශබන්දු තෙන්නකෝන් මහත්තයට තියෙන්නෙත් ඔය චෝදනාවමයි. එතුමා මාතරට ඕවගේම කණ්ඩායමක් පොලිසිය දැනුම්වත් නොකර යැව්වා කියන එක. ඒකම රිපීට් වෙනව. මේ රටේ පුරවැසියො විදිහට ඒක නොකර හිටියනම් හොඳයි කියන එක මම කියන්නෙ.”
