සූරියවැව නුවන් ජයසේකර –
බරපතල අපරාධයට ලක් වූ තණමල්විල දැරිය හම්බන්තොටෙ මහ රෝහලට ඇතුළත් කර සිටියදී දැරියව අධිකරණ වෛද්ය පරීක්ෂණයට ලක් කළ අධිකරණ වෛද්ය නිලධාරියා ඇයට දැරියට බැන තර්ජනය කිරීමේ සිද්ධියකට අදාලව ලද පැමිණිල්ලකට අනුව කොළඹ ළමා ආරක්ෂක අධිකාරීයේ නිළධාරීන් විසින් එම අධිකරණ වෛද්ය නිලධාරියා අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රුපියල් ලක්ෂ 03ක ශරීර ඇපයක් මත නිදහස් කරන ලෙස හම්බන්තොට මහේස්ත්රාත් හා අතිරේක දිසා විනිසුරු ඕෂධ මිගාර මහආරච්චි ඊයේ (17) සවස නියෝග කර තිබේ.
මෙලෙස ශරීර ඇප මත නිදහස් කර ඇත්තේ හම්බන්තොට මහ රෝහලේ අධිකරණ වෛද්ය නිළධාරී ලෙස කටයුතු කළ අංක 12, සංඝමිත්තා මාවත, රඹුක්කන ලිපිනයේ පදිංචි ටී. සී. ප්රියදර්ශන පෙරේරා නැමති 32 හැවිරිදි පුද්ගලයෙකි.
තණමල්විල ජාතික පාසලේ බාලවයස්කාර දැරියක් සමූහ දූෂණය කිරීමේ සිද්ධියකට අනුව පරීක්ෂණ පැවැත් වූ තණමල්විල පොලීසිය විසින් අදාල වින්දිත දැරිය වෛද්ය පරික්ෂණ කටයුතු සදහා පසුගිය 10 වන දින හම්බන්තොට මහ රෝහලට ඇතුළත් කර තිබේ.
එහිදි දැරිය පරීක්ෂා කර ඇති මෙම අධිකරණ වෛද්ය නිලධාරියා දැරියට බැණ තර්ජනය කර දැරියට හා දැරියගේ මවට දැඩි පීඩනයක් ලබා දී දැරියගේ කටඋත්තරය පවා වෛද්ය වරයාට අවශ්ය පරිදි වෙනස් කළ බවත් එම පීඩනය දරා ගත නොහැකිව දැරිය සිය දිවි නසා ගැනීමට උත්සාහ කළ බවත් දැරියගේ මව විසින් හම්බන්තොට මූලස්ථාන පොලිසියට හා කොළඹ ළමා ආරක්ෂණ අධිකාරියට පැමිණිල්ලක් ගොනුකර තිබේ.
ඒ අනුව සිද්ධිය සම්බන්ධයෙන් පරික්ෂණ පැවැත් වු කොළඹ ළමා ආරක්ෂණ අධිකාරීයේ නිලධාරීන් විසින් චෝදනා එල්ල වු දොස්තරව හම්බන්කොට මහ රෝහලේ දී ඊයේ ( 17 ) අත්අඩංගුවට ගෙන ප්රකාශ සටහන් කර ගැනීමෙන් අනතුරුව හම්බන්තොට මහේස්ත්රාත් අධිකරණයට ඉදිරිපත් කර තිබේ.
එහිදී ඉදිරිපත් වු කරුණු සළකා බැලූ හම්බන්තොට මහේස්ත්රාත් වරයා අදාල වෛද්ය නිලධාරියා රුපියල් ලක්ෂ තුනක ශරීර ඇපයක් මත නිදහස් කරන ලෙස නියෝග කෙරුණි.
සිද්ධිය සම්බන්ධයෙන් විමර්ශනය කර අධිකරනයට කරුණු වාර්තා කරන ලෙසට මහේස්ත්රාත් වරයා විමර්ශන නිධාරින්ට නියෝග කෙරුනු අතර නඩුව යළි 2024.10.23 දින කැඳවිමට නියමිතය .
