ශ්රියානි විජේසිංහ –
වෛද්ය ශිෂ්යයන් මර්දනය කිරීමට ආරක්ෂක අංශවලට තිබෙන උනන්දුව ඉමියුනෝග්ලොබීයුලින් මෙරටට ගෙන්වූ සමාගමේ වැරදිකරුවන් අත්අඩංගුවට ගැනීමට නොමැති බවත් මෙය බිහිසුනු විහිළුවක් බවත් රජයේ වෛද්ය නිලධාරින්ගේ සංගමය පවසයි.
රාජ්ය වෛද්ය පීඨවල පවතින අඩුපාඩු වහාම නිවැරදි කර තමන්ගේ අධ්යාපන තහවුරු කර ගැනීමට සඳහා කොළඹට පැමිණි වෛද්ය පීඨ ශිෂ්යයන්ට එළව එළවා පහර දුන් පොලීසි, කූඨ ලේඛණ සකස් කරමින් ඉමියුනිග්ලොබින් ඖෂධය මෙරටට ගෙන ඒමට කටයුතු කළ සමාගමට හෝ එහි ප්රධානීන්ට එරෙහිව බලය මුදා නොහැරීම ගැටලුවක් යැයි සංගමයේ මාධ්ය ප්රකාශක වෛද්ය චමිල් විජේසිංහ සඳහන් කරයි.
මෙරට ජනතාවගේ බදු මුදලින් සියයට 48ක්ම වැය වන්නේ ආරක්ෂ අංශවල වැටුප් ගෙවීමට බවත් එවැනි ජනතාවක් නිරායුධව තමන්ට සිදුවන අසාධාරණයන් කියාපෑමට මහපාරට එනවිට ඔවුන්ට එරෙහිව බැටන්පොලු පහරක් ගැසීම මිලේජ්ජ ක්රියාවක් බවත් වෛද්ය චමිල් පෙන්වාදේ.
නිරායුධ ජනතාව තමන්ගේ අයිතිවාසිකම් සහ සාධාරණය ඉල්ලා පාරට බහින විට ආරක්ෂ අංශ ඔවුන්ව තලා පෙලා යකඩ සපත්තුවෙන් පාගා දැමීමට කටයුතු කරන්නේ නම් එයට එරෙහිව් සමස්ත වෘත්තිකයන් සමග පාරට බැසීමට රජයේ වෛද්ය නිලධාරීන්ගේ සංගමයද පසුබට නොවන බව වෛද්ය චමිල් පවසා සිටියි.
කෙසේ නමුත් ලබන සතියේදී රැස්වන විධායක කමිටුවේදී රජයේ මර්දනකාරී වැඩපිළිවෙළට එරෙහිව දැඩි තීන්දු තීරණයක් ගැනීම සම්බන්ධයෙන් පුළුල්ව සාකච්ඡා කරන බවද හෙතෙම පවසා සිටියි.
