ජනාධිපති මන්දිරයේ සුරක්ෂිතව තිබූ රුපියල් එක්කෝටි හැත්තෑ ලක්ෂයක මුදලක් එම මන්දිරයේ ගත කරන විරෝධතා කරුවන් පිරිසක් විසින් සොයාගෙන ඊයේ (09) සවස පොලිසියට භාර දුන් පසු එම මුදල වහාම පොලිසිය භාර ඇමතිවරයා ලෙස භාර දෙන ලෙස කොටුව පොලිසිය ස්ථානාධිපති ප්රධාන පොලිස් පරීක්ෂක සාගර ලියනගේ වෙත බස්නාහිර පළාත් භාර ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් විසින් කළ බලපෑමක් පිළිබඳ පොලිස් වාර්තාවල සටහන් වී තිබේ.
වාර්තා වන ආකාරයට සිද්ධිය මෙසේය.
විරෝධතාවයේ නියුතු තරුණයින් විසින් ජනාධිපති මන්දිරයේ කාමරයක තිබී රුපියල් එක්කෝටි හැත්තෑ ලක්ෂයක මුදලක් සොයා ගෙන තිබිණි.
බැංකු සටන් සමග එම මුදල තිබී ඇත්තේ අලුත්ම මුදල් නෝට්ටු ලෙසය. එම මුදල සොයා ගත් වහාම එම තරුණයන් ජනාධිපති මන්දිරයේ ආරක්ෂාව භාරව සිටින විශේෂ කාර්ය බලකායේ පොලිස් අධිකාරී නිශේධ ප්රනාන්දුට දන්වා ඔහුට එම මුදල භාර දී තිබේ.
එහෙත් පොලිස් අධිකාරීවරයා එය තමන් භාර ගැනීම නොව වඩාත් නීත්යානුකූල ක්රමවේදයකට එය පොලිස් භාරයට පත් කළ යුතු බව එම තරුණයින්ට දන්වා කොටුව පොලිස් ස්ථානාධිපති සාගර ලියනගේට මේ බව දන්වා තිබේ.
සාගර ලියනගේ පොලිස් කණ්ඩායමක් සමග පැමිණ එම මුදල භාර ගෙන මුදල තිබූ ස්ථානය හා එම මුදල් ප්රමාණය වීඩියෝ ගත කර භාරගෙන අනතුරුව එම ස්ථානයේ රැඳී සිටි තරුණයින් පස් දෙනෙකුගෙන් සාක්ෂිත් සටහන් කරගෙන පොලිස් සථානයට පැමිණීමෙන් පසු සියලු තොරතුරු පොත්පත්වල සටහන් කර ඇත.
ඉදිරි නෛතික කටයුතු සඳහා සූදානම් වෙමින් සිටිය දී ඊයේ රාත්රියේ බස්නාහිර පළාත් භාර ජ්යෙෂ්ඨ නියෝජ්ය පොලිස්පති දේශබන්දු කොටුව පොලිස් ස්ථානාධිපති සාගර ලියනගේට දුරකථනයෙන් අමතා ඇත. ඒ වනතුරු දුරකථනය විසන්ධි කරගෙන සිටි බවට වාර්තා වන ජ්යෙෂ්ඨ නියෝජ්ය පොලිස්පතිවරයා සාගර ලියනගේ අමතා ඔහුට තදින් දෝෂාරෝපණය කර මෙම මුදල පොත් පත්වල සටහන් කළේ කුමක් නිසා දැයි ප්රශ්න කර තිබේ.
අනතුරුව ඉරිදා (10) උදෑසන වනවිට මුදල පොලිසිය භාර ඇමතිවරයාගේ නිවසේ තිබිය යුතු බවට ඔහු කොටුව පොලිස් ස්ථානාධිපතිවරයා වෙත දන්වා ඇත.
එය කළ නොහැකි බවත් නීත්යානුකූල නොවන බවත් පැහැදිලි කිරීමට ගිය කොටුව ස්ථානාධිපතිවරයාට ජ්යෙෂ්ඨ නියෝජ්ය පොලිස්පතිවරයා පවසා ඇත්තේ තමන්ට මේ පැහැදිලි කිරීම් අනවශ්ය බවය.
මේ අවස්ථාවේ දී කොටුව පොලිස් ස්ථානාධිපතිවරයා පොලිස්පතිවරයාගේ කාර්ය මණ්ඩල ප්රධානීත්වය දරන නියෝජ්ය පොලිස්පතිවරයා අමතා තිබේ. ඒ හරහා සිද්ධිය පිළිබඳ පොලිස්පතිවරයා දැනුම්වත් කර ඇත.
ඒ අනුව පොලිස්පතිවරයා කොටුව පොලිස් ස්ථානාධිපතිවරයාට උපදෙස් ලබා දී ඇත්තේ කිසිම අනීතික කටයුත්තක් නොකරන ලෙසය. නීතිය ක්රියාත්මක කරන ලෙසය ඕනෑම උපදෙසක් අවශ්ය නම් පොලිස්පතිවරයා විමසන ලෙසය.
එමෙන්ම ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් විසින් සිදුකළ බලපෑම සම්බන්ධව සටහනක් තබන ලෙස ද පොලිස්පතිවරයා කොටුව පොලිස් ස්ථානාධිපතිවරයාට දැනුම් දී තිබේ.
මේ අතර මේ වනවිට කොටුව පොලිස් ස්ථානාධිපතිවරයාට දුරකථන ඇමතුමක් ලබා දී ඇති පොලිසය තුළ “සුදු පුතා“ ලෙස ප්රසිද්ධියක් උසුලන හිටපු පොලිස් මාධ්ය ප්රකාශකවරයෙක් වූ ජ්යෙෂ්ඨ පොලිස් අධිකාරීවරයා පවසා ඇත්තේ දුරදිග නොගොස් මේ මුදල “සුගීෂ්වර“ වෙත ලබා දෙන ලෙසය.“ සුගීෂ්වර“ අවශ්ය කටයුතු කරනු ඇතැයි ද දන්වා තිබේ.
පොලිස්පතිවරයාගේ සමීපතමයෙක් ලෙස පෙනී සිටින මෙම පොලිස් නිලධාරියා එම ඇමතුම ලබා දී ඇත්තේ පොලිස්පතිවරයාගේ අනුදැනුමකින් තොරව බව පසුව කළ සොයා බැලීමක දී හෙළි වී ඇත.
එම අවස්ථාවේ දී කොටුව පොලිස් ස්ථානාධිපතිවරයා ප්රකාශ කර ඇත්තේ මෙම මුදල තමන් භාර දෙන්නේ කිසිවෙකුටවත් නොව උසාවියට බවය.
