සුධර්මා නෙත්තිකුමාර ගේ නිවසේ සේවය කළ මෙහෙකාරිය පොලිස් අත්අඩංගුවේ දී මිය යෑමට පෙර වැලිකඩ පොලිසිය තුළ අමානුෂික පහරකෑමට ලක්වන්නේ බස්නාහිර පොලිස් ප්රධානියෙක් විසින් වැලිකඩ පොලිස් ස්ථානාධිපතිවරයා වෙත එල්ල කළ පීඩනයක ප්රතිඵලයක් ලෙසින් බව පොලිස් විශේෂ අපරාධ විමර්ශන ඒකකය විසින් අනාවරණය කරගෙන ඇත.
සිය මුද්දක් නැතිවූ බවත් ඊට තමන්ගේ හිටපු මෙහෙකාරිය පිළිබඳ සැකයක් ඇති බවත් දන්වා පසුගිය 11 දා සුධර්මා නෙත්තිකුමාර විසින් වැලිකඩ පොලිසියේ පැමිණිලක් සිදුකර පැය කීපයක් ඇතුළත වෙනත් නිවසක ඒ වනවිට සේවය කරමින් සිටි මෙහෙකාර කාන්තාව වැලිකඩ පොලිසිය විසින් අත්අඩංගුවට ගෙන තිබිණි.
ඇයව නීති විරෝධී ලෙස අත්අඩංගුවට ගෙන පොලිසියට රැගෙන විත් ඇයට අමානුෂික ලෙස පහර දී ඇත්තේ කෙසේ හෝ නැතිවුන රන් බඩු සොයා ගත යුතු බවට එම බස්නාහිර පොලිස් ලොක්කා විසින් වැලිකඩ පොලිසියට දැන්වූ පසු බවද හෙළි වි තිබේ.
කෙසේ වෙතත් මෙම කාන්තාව පොලිස් අත්අඩංගුවේ දී මිය ගිය ආකාරය පිළිබඳ පැවති සැකය නිසා පොලිස්පති නියමයෙන් පොලිස් විශේෂ අපරාධ විමර්ශන ඒකකය අභ්යන්තර පරීක්ෂණයක් ආරම්භ කළේය.
සුධර්මා නෙත්තිකුමාරගේ නිවස පිහිටා ඇත්තේ රාජගිරිය කුරේ මාවතේ රෝයල් ගාර්ඩන් පරිශ්රයේ ය. මේ නිවසේ මෙහෙකාරිය ලෙස සේවය කර ඇත්තේ බදුල්ල දෙමෝදර නාවලවත්තේ පදිංචි ආර්. රාජ්කුමාර් නැමැති 42 හැවිරිදි කාන්තාවකි.
සුධර්මා නෙත්තිකුමාර මෙම පැමිණිල්ල යොමුකරන විට මෙම කාන්තාව සුධර්මාගේ නිවසේ වැඩ කළ නොහැකි බවට පවසා සේවයෙන් ඉවත් වී බොරැල්ල කොටාපාරේ නිවසක මෙහෙකාරියක ලෙස සේවය කරමින් සිට ඇත.
සුධර්මා නේත්තිකුමාරගේ පැමිණිල්ල සිදුකර පැය කිපයක් ඇතුළත වෙනත් නිවසක වැඩකරමින් සිටි මෙම කාන්තාව නීති විරෝධීව අත්අඩංගුවට ගෙන පොලිස් ස්ථානයට රැගෙන විත් ප්රශ්න කිරීමට පටන් ගෙන ඇති බවත් එම ප්රශ්න කිරිමේ දි පොලිස් කාන්තාවන් මෙන්ම පිිරිමි පොලිස් නිලධාරීන් ද ඇයට පහරදී ඇති බවත් හෙළි වී තිබේ.
ඇයගේ සැමියා ද ප්රකාශයක් කරමින් මාධ්යයට කීවේ බිරියගේ මළ සිරුර දකිනවිට නාස්පුඩුවලින් සහ කන් වලින් ලේ ගලමින් තිබෙනු දුටු බවය. කකුලක් දැඩි ලෙස ඉදිමී තිබුණු බව ද හෙතෙම පැවසුවේය.
දැනට හෙලි වී ඇති පරිදි ප්රශ්න කිරීම් අතර මෙම කාන්තාවට පොලිසිය තුළ රඳවාගෙන දැඩි ලෙස පහර දීමෙන් අනතුරුව හුස්ම ගැනීමේ අපහසුතාවයක් ඇති වු බව කියමින් පසුගිය 11 වැනිදා සවස 06ට පමණ දැඩි අසාධ්ය තත්ත්වයෙන් රෝහල් ගත කර තිබේ.
රෝහල්ගතකර පැයක් ඇතුළත කාන්තාව මියගොස් ඇත. අධිකරණ වෛද්ය පරීක්ෂණයේ දී මරණය සම්බන්ධව විවෘත තීන්දුවක් ලබා දී ඇත. ඇයට මින් පෙර කිසිම අවස්ථාවක සොරකම් කිරීම පිළිබඳ චෝදනා ගොනු වී නොතිබුණ බවද විමර්ශන අංශ හෙළි කරගෙන තිබේ.
පොලිස් විශේෂ අපරාධ විමර්ශන ඒකකය පරීක්ෂණ පවත්වයි.
