හිටපු ටෙස්ට් ක්රිකට් ක්රීඩක ජයනන්ද වර්ණවීරගේ මරණය සම්බන්ධයෙන් විවෘත තීන්දුවක් ලබා දෙමින් ශරීර කොටස් රස පරීක්ෂක වෙත යොමු කිරීමට මහනුවර ජාතික රෝහලේ විශේෂඥ අධිකරණ වෛද්ය ප්රභාත් සේනසිංහ නියෝග කර තිබේ.
ඔහුගේ ඇඳ අසල විෂ සහිත ද්රව්යයක් අඩංගු බෝතලයක් තිබුණ බවත්, පසුගිය 17 දින ඔහු මියගොස් තිබුණේ නිවසේ නිදා සිටියදී බවත් විමර්ශනවලදී අනාවරණය වී ඇත. කටුගස්තොට අඹතැන්න බොකලවෙල ප්රදේශයේ නිවසක ඔහු පදිංචිව සිටියේය.
පෙරදින නින්දට යෑමෙන් අනතුරුව පසුදින පෙරවරු 10.00 පමණ වනතුරුම ඔහු අවදි නොවීම නිසා සිදුකළ සොයා බැලීමේ දී ඔහු මියගොස් සිටි බව බිරිඳ ජානකී අබේසිංහ පොලීසියට පවසා තිබේ.
මළ සිරුර පිළිබඳ පශ්චාත් මරණ පරීක්ෂණය පසුගිය (17) දා මහනුවර ජාතික රෝහලේ දී සිදු කිරීමෙන් අනතුරුව අවසන් කටයුතු සිදු කිරීම සඳහා දේහය වර්ණවීරගේ බිරිඳට බාර දී ඇත්තේ දේහය ආදාහනය නොකර භූමදානය කරන ලෙස මහනුවර ජාතික රෝහලේ හදිසි මරණ පරීක්ෂකවරායගේ නියෝගය සමගය. රස පරීක්ෂකවරයා එම නියෝගය යොමු කර ඇත්තේ ශරීර කොටස් රස පරීක්ෂක වෙත යොමුකර වාර්තාවක් ගැනීමට නියමිත වූ නිසාය .
වර්ණවීරගේ අවසන් කටයුතු පෙරේදා (18) පස්වරු 3.00 ට මහනුවර මහයියාවේ දී සිදු කෙරුණි.
මියයන විට ජයනන්ද වර්ණවීර 64 වැනි වියේ පසුවිය.
ටෙස්ට් ක්රිකට් 10 කට හා එක්දින ක්රිකට් තරග 06 කට ක්රීඩා කර තිබෙන ජයනන්ද වර්ණවීර ක්රිකට් දිවියෙන් සමුගැනීමෙන් පසු කලක් ගාල්ල ක්රිකට් ක්රීඩාංගණයේ භාරකරු ලෙසද කටයුතු කළේය.
