දිනසේන රතුගමගේ –
නාවික හමුදාව විසින් අත් අඩංගුවට ගෙන සිටින සීයකට ආසන්න ඉන්දීය ධිවරයින් පිරිස නිදහස් කරණ ලෙස ඉල්ලමින් රාමේස්වරන් ධීවරයෝ 7000 ක් පමණ දෙනා ඊයේ (19 ) සිට වර්ජනයක හා විරෝධතාවයක නිරතව සිටිති.
රාමේස්වරන් ධීවරයින්ගේ වර්ජනය හේතුවෙන් ධීවර යාත්රා 800 ක් පමණ රාමේස්වරන් තොටුපලේ නවතා ඇත. ඔවුහු ධීවර කටයුතු වල නිරතවීමෙන් වැළකී සිටිති.
එම ස්ථානයට රැස් වූ ධීවරයින් හා ඔවුන්ගේ පවුල් වල උදවිය විසින් විරෝධතාවයක්ද ආරම්භ කොට තිබේ. රාමේස්වරන් ධීවරයින් පවසන්නේ ඉන්දීය ධීවරයින් සම්බන්ධයෙන් ශ්රී ලංකා රජය මීට වඩා නම්යශිලි ප්රතිපත්තියක් අනුගමනය කළ යුතුව ඇති බවයි.
ඉන්දීය ධීවරයින් අත් අඩංගුවට ගැනීමෙන් පසුව අධිකරණ නියෝග මත ඔවුන්ව විශාල කාලයක් බන්ධනාගාර ගත කිරීම දැඩි අසාධාරණයක් නිසා වහාම දැනට ශ්රී ලංකාවේ බන්ධනාගාර වල සිටින ඉන්දීය ධීවරයින් සියයකට ආසන්න පිරිසත් ඔවුන්ගේ ධීවර යාත්රාත් නිදහස් කරන ලෙස රාමේස්වරන් ධීවරයෝ සිය විරෝධතාවය හා වර්ජනය හරහා ඉල්ලා සිටිති.
