ශ්රියානි විජේසිංහ –
වඳුරු උණ වැලඳුණු රෝගියා අයිඩීඒච් උණ රෝහලේ විශේෂ ඒකකය රඳවා ප්රතිකාර කරන බව රෝහල් අධ්යක්ෂ වෛද්ය හසිත අත්තනායක සඳහන් කරයි.
දැනට රෝගියාගේ සම්බන්ධතා පිලිබඳව කෙරී ඇති මූලික අධ්යයනයන්ගෙන් හෙළි වී ඇත්තේ ඔහුගේ ගැටීම ඉතාම සීමිත බවය.
මෙම තරුණයා කිරුළපන පදිංචි කරුවෙකි. ඔහුව ගුවන්තොටුපලේ සිට කැඳවාගෙන පැමිණ ඇත්තේ ඔහුගේ පියා විසින්ය. නිවසේ සිට ඇත්තේ ඔහුත් මවත් පියාත් පමණි. නිවසට පැමිණි දා ට පසුදා සවස මූලික රෝග ලක්ෂණ පහළ වීමෙන් අනතුරුව ඔහු කොළඹ පුද්ගලික රෝහලකට ප්රතිකාර සඳහා ගොස් ඇත.
ලිංගාශ්රිත ප්රදේශයේ ඇති වී තිබු ගැටිති හේතුවෙන් ඔහු ලිංගාශ්රිත සායනයට යොමු කර ඇති බවත් එයින් වෛද්ය පර්යේෂණායතනයට රෝගියා යොමු කළ පසුව රෝගියාගේ සිරුරේ හටගෙන ඇති බීබිලි වලින් ලබා ගත් ශ්රාවයන් අනුකවේද පරික්ෂාවකට ලක් කර අනතුරව මන්කිපොක්ස් රෝග කාරක වයිරසය ආසාදනය වී ඇති අයුරු හඳුනා ගත් බවත් වෛද්ය පර්යේෂණායතනයේ ප්රධාන වෛරස්රෝග විශේෂඥ වෛද්ය ජූඩ් ජයමහ පැවසුවේය.
රෝගියා අයි.ඩී.එච් රෝහල වෙත යොමු කර රොගියාගේ නිවැසියන් නිවස තුළම නිරෝධායන ක්රියාවලියකට ලක් කර රෝගය මතුවනවා ද නැද්ද යන්න පිළිබඳ අධීක්ෂණය කිරීමට වෛද්ය අංශ කටයුතු යොදා තිබේ.
දැනට රෝගියා රඳවා ඇති අයි.ඩී.එච් රෝහලේ එක් එක් බෝවන රෝගයන් සඳහා ප්රතිකාර කිරීමේදී අනුගමන කරන ක්රියා මාර්ගයන් විවිධ බවත් රෝගීන්ගේ වාර්තා වීම අනුව රෝහල් කාර්ය මණ්ඩලය සුදානමින් සිටින බවත් රෝගියා සම්බන්ධව කළ විමසීමක දී රෝහල් ප්රකාශකයෙකු සඳහන් කළේය
මේ අතර වඳුරු උණ රෝගය ශ්රී ලංකාව තුළ පැතිරයාම වළක්වාගැනීම සඳහා ගුවන්තොටුපල ඇතුළු ස්ථානවල නිරික්ෂණ කටයුතු ශක්තිමත් කරන්නැයි රජයේ වෛද්ය නිලධාරීන්ගේ සංගමය ඉල්ලා සිටී.
රෝගය වසංගතයක් ලෙස පැතිර යාම වලක්වා ගැනීම සඳහා ගන්නා ක්රියා මාර්ගයන් තාක්ෂණික කමිටුව හරහා ප්රකාශයට පත් කරන්නැයිද එමගින් අනවශ්ය කලබලයක් හා බියක් ජනතාව තුළ ඇති නොවන්නේ යැයි ද සංගමයේ ලේකම් වෛද්ය හරිත අලුත්ගේ සඳහන් කරයි.
විදේශගතව සිට පැමිණ ඇත්නම් ඔබට උණ, ලිංගික ප්රදේශවල තුවාල , අධික මහන්සිය, වසා ගැටිති ඉදිමීම වැනි රෝග ලක්ෂණ මතුවී ඇතැනම් වහාම වෛද්ය ප්රතිකාර සඳහා යොමුවිය යුතු බව වෛද්ය අලුත්ගේ කියයි.
