යුක්රේනයේ නේටෝ ආධාරකරුවන් භූමියේ ක්රියාන්විතය මග හරිමින් සිටිති. ඒ අතර උතුරු කොරියානු සටන්කරුවන් බටහිර රුසියාවේ කර්ස්ක් කලාපය පුරා දරුණු සටන්වලය.
“උතුරු කොරියාව දැන් ඉරානයට හෝ චීනයට වඩා රුසියාවට වැදගත් සගයෙකි,” ජ්යෙෂ්ඨ රුසියානු විශ්ලේෂක ඔලෙග් ඉග්නාටොව් ප්රකාශ කර ඇත.
රුසියාවට අනුව උතුරු කොරියාව රුසියාවට පතොරම් සහ සමහර වර්ගයේ බර අවි සපයයි. උතුරු කොරියානු සොල්දාදුවන් සම්බන්ධයෙන් ගත් කල, රුසියානු මූලාශ්ර පවසන්නේ ඔවුන් වෘත්තීමයවූත් විනයගරුකවූත් විශිෂ්ඨයන් පිරිසක් බවයි.
“කර්ස්ක් මෙහෙයුම ආරම්භයේදී, ඩ්රෝන යානා විශාල සංඛ්යාවක් භාවිතා කිරීම ඇතුළත් වන මෙම ආකාරයේ යුද්ධයක් සඳහා අවශ්ය නවීන සටන් කුසලතා ඔවුන්ට නොතිබුණි, නමුත් ඔවුන් ඉක්මනින් අනුවර්තනය විය.” ඔලෙග් ඉග්නාටොව් කීවේය.
ඉදිරිය දෙස බලන විට, රුසියානු-උතුරු කොරියානු සන්ධානය ඉදිරියට යන බවට සලකුණු තිබේ. සති දෙකකට පෙර, යුක්රේන බුද්ධි අංශ ආරංචි මාර්ග CNN වෙත පැවසුවේ උතුරු කොරියාව තවත් සොල්දාදුවන් 30,000 ක් දක්වා යැවීමෙන් යුක්රේනයට එරෙහිව ඉදිරි පෙළේ තම බලය තුන් ගුණයකින් වැඩි කිරීමට සැලසුම් කරමින් සිටින බවය.
රුසියානු ස්වාධීන මාධ්යයක් වන Mediazona සහ BBC විසින් තබා ඇති ගණන් බැලීම්වලට අනුව, 2022 දී තම අසල්වැසියාට එරෙහිව පූර්ණ පරිමාණ යුද්ධයක් දියත් කිරීමෙන් පසු මොස්කව් හමුදාවෙන් 116,000 කට වඩා අහිමිවීම් ඇති බැවින්, රුසියාව අතිරේක මිනිස් බලය සාදරයෙන් පිළිගනු ලබයි.
උතුරු කොරියාව ලබන ප්රතිලාභය
ප්රසිද්ධ හුදකලා ජාතියක් වන උතුරු කොරියාවට ද මේ සම්බන්ධතාව හරහා බොහෝ දේ ලබා ගත හැකි බව සමහර නිරීක්ෂකයින් පවසති. උතුරු කොරියාව මහා භූමියට සම්බන්ධ කරන උතුරු සීමාව එක් පසෙකින් චීනයටත් අනෙක් පසින් රුසියාවටත් මායිම් වන්නේය. රුසියාවට මායිම් වන්නේ රසෝන් කලාපය සීමා කරමින් ගලන ටුමෙන් නදියෙනි. රුසියාව ටුමෙන් නදියට සීමා වන්නේ කාසන් කලාපයෙනි. දැන් රුසියාව ජාත්යාන්තර සම්බාධක නොසලකා කාසන් – ටුමෙන් සීමාව හරහා උතුරු කොරියාව වෙත සැපයුම් මාර්ග ගොඩබිමෙන් විවෘත කර ඇත්තේය. දිගු කලක් මේ සැපයුම් මාර්ග ලෝක සම්බාධක ඉදිරියේ සපුරා අක්රීයව පැවතිනි.
රුසියාව දුම්රිය හරස් මාර්ග හරහා ගල් අඟුරු, පොහොර සහ යකඩ සපයන අතර [උතුරු කොරියාව] මුහුදු ආහාර සහ දුර්ලභ පස් ලෝහ සපයයි. රුසියානු සමූහාණ්ඩුවේ සහභාගීත්වයෙන් සිදුවන [උතුරු කොරියානු] රාජින් වරාය නවීකරණය කිරීම මේ අතර සිදුවේ.
“ප්රතිපත්තිමය දෘෂ්ටි කෝණයකින්, රුසියාව සමඟ උතුරු කොරියාවේ වැඩිදියුණු වූ සබඳතා කිම් ජොන් උන්ට වැඩි උපායමාර්ගික අවස්ථාවන් සහ හැකියාවක් ලබා දෙයි. මෙම සම්බන්ධතාවය පෝෂණය කිරීමෙන් කිම් ජොන් උන් දකින දිගු කාලීන අවස්ථාවන් ප්රමාණයක් ඇත. එනම් රුසියාවේ තෙල් සහ තිරිඟු නැව්ගත කිරීම් සහ උතුරු කොරියාවට මිලිටරි තාක්ෂණය මාරු කිරීම වැනි ක්ෂණික ප්රතිලාභ ඒ අතර පෙනේ. ” එය නිරීක්ෂකයින්ගේ අදහසය.
රුසියා – උතුරු කොරියා නව හවුල
දෙවන ලෝක යුද්ධය අවසානයේ කොරියානු අර්ධද්වීපයේ උතුරු අර්ධය අත්පත් කරගත් ජපන් යටත් විජිත හමුදා පලවා හැරිය අතර, දකුණේ දී එක්සත් ජනපද හමුදා ද එසේ කළ කළේය. නූතන උතුරු කොරියානු රාජ්යය එහි පැවැත්මට සෝවියට් සංගමයට ණය ගැතිය. සෝවියට් සහ චීන පිටුබලය ලත් කොමියුනිස්ට් රාජ්යයක් උතුරු කොරියාවේ නිර්මාණය විය. සෝවියට් සංගමය සීතල යුද්ධය පුරාම උතුරු කොරියාව සිටියේ එහි සමීප සගයෙකු ලෙසය.
නමුත් 1990 දශකයේ මුල් භාගයේදී සෝවියට් සංගමය බිඳ වැටීමෙන් පසු, උතුරු කොරියාවට එහි තීරණාත්මක සහායකයා සහ ආධාර සැපයීමේ වැදගත් ප්රභවයක් අහිමි වූයේය. , රට විනාශකාරී සාගතයකට ඇද වැටිනි. නව රුසියාව සමඟ සබඳතා සතුරු නොවූ නමුත් විශේෂයෙන් සමීප නොවීය. 2000 සහ 2010 වර්ෂ වලදී, රුසියාව උතුරු කොරියාවේ න්යෂ්ටික වැඩසටහන සහ චෝදනා කරන ලද මානව හිමිකම් උල්ලංඝනයන් මැඩපැවැත්වීම අරමුණු කරගත් ගෝලීය සම්බාධකවලට පවා රුසියාව සම්බන්ධ වූයේය.
කෙසේ වෙතත්, රුසියාවේ ‘විශේෂ මිලිටරි මෙහෙයුමක්’ ලෙස හඳුන්වන යුක්රේනයේ යුද්ධය ආරම්භ වීමත් සමඟ, ඔවුන් ගුණාත්මකව නව අවධියකට පිවිසි බව විචාරකයෝ කියති. 2022 මුල් භාගයේ යුද්ධය ආරම්භයේ සිටම පියොන්යැං සිය ස්ථාවරය පැහැදිලි කළේය. එක්සත් ජාතීන්ගේ හදිසි සැසියකදී මොස්කව් ආක්රමණය හෙළා දැකීමට එරෙහිව ඡන්දය දුන් ආණ්ඩු පහෙන් එකක් ලෙස උතුරු කොරියාව නැගී සිටියේය. අනෙක් රාජ්යයන් වූයේ බෙලාරුස්, එරිත්රියාව, සිරියාව සහ රුසියාවම ය.
2023 දී, හිටපු රුසියානු ආරක්ෂක අමාත්ය සර්ජි ෂොයිගු උතුරු කොරියාව වෙත ගියේය. පසුව උතුරු කොරියානු නායක කිම් ජොන් උන් රුසියාවට නිල සංචාරයක් සිදු කළේය. එහිදී ඔහු ව්ලැඩිමීර් පුටින් සමඟ සාකච්ඡා පැවැත්වීය.
ජාත්යාන්තර යුද විශ්ලේෂකයින් පවසන්නේ යුධ පිටියේ උතුරු කොරියානු හමුදා 15,000 ක් පමණ යෙදවීම සඳහා පසුගිය ජුනි මාසයේදී පුටින් සහ කිම් විසින් අත්සන් කරන ලද විස්තීර්ණ උපායමාර්ගික හවුල්කාරිත්වයේ 4 වන වගන්තිය මගින් ඉඩකඩ සපයා ඇති බවය. මෙම ගිවිසුමෙන් විදේශ ආක්රමණයකදී එක් රටකට අනෙක් රටට “මිලිටරි සහ වෙනත් ආධාර” ලබා දීමට ඉඩ සැලසීය.
මිය යන උතුරු කොරියානු සෙබලුන්ට වෙන දේ
උතුරු කොරියානුවන් රුසියානු හමුදා සමඟ සටන් කරන බවට යුක්රේනය සහ දකුණු කොරියානු බුද්ධි අංශ විසින් පසුගිය වසරේ අගභාගයේදී කරන ලද ප්රකාශ ක්රෙම්ලිනය මුලින් ප්රතික්ෂේප කළේය. එය සැඟවීමට යම් උත්සාහයක් ගත්තේය.
දෙසැම්බර් මාසයේදී ද ගාඩියන් පුවත්පත වාර්තා කළේ, කර්ස්ක් හි තුවාල ලැබූ උතුරු කොරියානු සොල්දාදුවන්ට රුසියානු රෝහල්වල රහසිගතව ප්රතිකාර ලබා දෙන බවය. යුධ පිටියේදී මිය ගියහොත්, රුසියාවේ ඈත පෙරදිග ජනවාර්ගික සුළුතරයන් ලෙස හඳුනා ගනිමින් සොල්දාදුවන්ට ව්යාජ හැඳුනුම්පත් නිකුත් කරන ලද බවය.
යුක්රේන ජනාධිපති වොලොඩිමියර් සෙලෙන්ස්කි කියා සිටියේ උතුරු කොරියානු සොල්දාදුවන් අල්ලා ගැනීම ආසන්න වුවහොත් රුසියාව පැත්තෙන්ම ඔවුන්ට මරණ දඬුවම නියම කිරීමේ අවදානමක් ඇති බවය.
රුසියාව සහ උතුරු කොරියාව ඔවුන්ගේ හමුදා එකට සටන් කරන බව නිල වශයෙන් තහවුරු කළේ අප්රේල් මාසයේදී පමණි. කර්ස්ක් සටනේදී “සහයෝගීතාවය, යුක්තිය පිළිබඳ හැඟීම සහ සැබෑ සහෝදරත්වය” වෙනුවෙන් ක්රියා කිරීම සම්බන්ධයෙන් පුටින් ඔහුගේ “කොරියානු මිතුරන්ට” ස්තූති කළේය. ඒ සමඟම, කිම් ඔවුන්ගේ “පූජනීය මෙහෙවර” ගැන තම සොල්දාදුවන්ට ප්රශංසා කළේය.
මියගිය සොල්දාදුවන්ට කර්ස්ක් හි ස්මාරක ඉදිකර වීදි නැවත නම් කිරීමෙන් ගෞරව කරන බවට රුසියානු නිලධාරීන් උතුරු කොරියාවට පොරොන්දු වී ඇත.
දේශපාලන විද්යාඥ ෆියෝඩර් ක්රෂෙනිනිකොව් යෝජනා කර ඇත්තේ උතුරු කොරියාවේ ඉල්ලීම පරිදි මූලික රහස්යභාවය පවත්වා ගැනීමට ඔවුන් කටයුතු කර ඇති බවය. දැන් උතුරු කොරියාවට එම සැඟවීම අවශ්ය නැත. ඔවුන් තමන්ගේ භූමිකාව ලෝකයට හෙළිදරවු කිරීමට තීරණය කර තිබේ.
