පිටකෝට්ටේ ප්රදේශයේ අවහන්හලක් තුළ දී පුද්ගලයෙකුගෙන් රුපියල් කෝටියකට ආසන්න මුදලක් අල්ලසක් ලෙස ලබා ගැනීමට උත්සාහ කළ හිටපු බස්නාහිර පළාත් මන්ත්රී සලෝචන ගමගේ සහ දුෂාන්ත දිනේෂ් රත්නායක නැමැති පුද්ගලයින් දෙදනෙක් අල්ලස් හෝ දූෂණ විමර්ශන කොමිෂන් සභාවේ නිලධාරීන් විසින් ඊයේ (27) සවස අත් අඩංගුවට ගෙන තිබේ.
පොලිසිය පවසන්නේ සැකකරුවන් දෙදෙනා සම්බන්දව වැඩිදුර තොරතුරු සොයා බැලිමේදි සලෝචන ගමගේ යන අය කොළඹ ප්රධාන මහේස්ත්රාත් තිලිණ ගමගේ ගේ සොහොයුරකු බවට තොරතුරු අනාවරණය වී ඇති බවය. පුද්ගලයින් දෙදෙනාම ඉඩම් ව්යාපාරවල නිරතවන අය බව ද පොලිසිය පවසයි.
විමර්ශනවල දී හෙලිවන කතාව මෙසේය.
කුරුදුවත්ත පොලිස් වසමේ ටොරින්ටන් මාවතෙහි පිහිටා ඇති පුද්ගලික ඉඩමක් මාර්ග සංවර්ධන අධිකාරියට පවරාදි එම ඉඩමේ වටිනාකමට හිමි කෝටි දහයකට ආසන්න මුදලක් මාර්ග සංවර්ධන අධිකාරියෙන් ලබා ගැනීම සඳහා සලෝචන ගමගේ සහ දුෂාන්ත දිනේෂ් රත්නායක යන පුද්ගලයින් දෙදෙනා ඉඩමට හිමිකම් කී පාර්ශවයක් වෙත උදව් කර තිබේ.
ඒ අනුව ඉඩමට හිමිකම් කී පාර්ශවය වෙත මාර්ග සංවර්ධන අධිකාරියෙන් ලබා දුන් කෝටි 10ක මුදලින් රුපියල් කෝටියකට ආසන්න මුදලක් මෙම පුද්ගලයින් දෙදෙනා විසින් පිටකෝට්ටේ අවහන්හලක් තුළ දී අල්ලසක් ලෙස ලබා ගැනීමට කටයුතු කර ඇත.
එම අවස්ථාවේ දී ඔවුන් අල්ලස් හෝ දුෂණ විමර්ශන කොමිෂන් සභාවේ නිලධාරීන් පිරිසක් විසින් අත්තඩංගුවට ගෙන අධිකරණය වෙත ඉදිරිපත් කරන තෙක් රඳවා තබා ගැනිම සඳහා නාරාහේන්පිට පොලිස් ස්ථානය වෙත ඉදිරිපත් කර ඇත.
සැකකරුවන් අද අධිකරණය වෙත ඉදිරිපත් කරන බව පොලිසිය පවසයි.
