කීර්ති ප්රනාන්දු
අද (15) සවස සිදු වූ මාරක රිය අනතුරු දෙකකින් කාන්තාවන් දෙදෙනෙකු මියගොස් දරුවන් 06 දෙනෙකු ඇතුළු 23 දෙනෙකු තුවාල ලබා රෝහල් ගතකර ඇතැයි පොලිසිය පවසයි .
මෙහි එක් මාරක රිය අනතුරක් පොලොන්නරුව ඕනගම මාර්ගයේ වලේ කඩේ ප්රදේශයේදී ලොරි රථයක් හා ටැක්ටරයක් එකට ගැටීමෙන් එකම පවුලේ සහෝදරියන් දෙදෙනෙකු මියගොස් තවත් 8 දෙනකු බරපතළ තුවාල ලබා ඇතැයි පොලිසිය පවසයි .
අද 15 සවස සිදුවී ඇති මෙම අනතුරින් මියගොස් ඇත්තේ ටැක්ටරයේ ගමන් කළ 46 සහ 47 වියැති සහෝදරියන් දෙදෙනෙකි . ඔවුන් පොළොන්නරුව ප්රදේශයේ පදිංචිකරුවන් බව පොලීසිය කියයි .
මෙතෙක් කරන ලද පොලිස් විමර්ශන වලට අනුව ලොරි රථයේ රියදුරු අධික වේගයෙන් ධාවනය කරවීම නිසා ඔහුට ලොරි රථයේ වේගය පාලනය කර ගැනීමට නොහැකි වීමෙන් ටැක්ටරේ ගැටීමෙන් මෙම අනතුර සිදුවී ඇති බවට අනාවරණය වී ඇතැයි පොලිසිය කියයි .
අනතුරින් තුවාල ලැබූවන් පොළොන්නරුව රෝහලට ඇතුළත් කර ඇති අතර ලොරි රථයේ රියදුරු පොලිස් අත් අඩංගුවට ගත් බව පොලිසිය කියයි .
මේ අතර ඇඹිලිපිටිය ගල් වංගුව ප්රදේශයේදී ද අද (15 )සවස කැබ් රථයක්, වෑන් රථයක් සහ යතුරු පැදියක් ගැටීමෙන් පුද්ගලයින් පහළොස් දෙනකු තුවාල ලබා ඇඹිලිපිටිය දිස්ත්රික් මහ රෝහලට ඇතුළත් කළ බව ඇඹිලිපිටිය පොලීසිය පැවසීය .
අනතුරින් කාන්තාවන් 05දෙනෙකු දරුවන් 6 දෙනෙකු හා පිරිමින් 04 දෙනකු තුවාල ලබා ඇතැයි ද පොලීසිය කියයි .
ඇඹිලිපිටිය දෙස සිට පැමිණ ඇති කැබ් රථය ගල් වංගුව ප්රදේශයේදී අපරික්ෂාකාරී ලෙස පාර මැද හැරවීමට යාමේදී උඩවලව දෙස සිට පැමිණ ඇති වෑන් රථයේ ගැටී පසුව යතුරුපැදිකරුවෙකුගෙ ද ගැටීම නිසා මෙම අනතුර සිදුවී ඇති බව දැනට කරන ලද පොලිස් පරීක්ෂණවලදී අනාවරණය වූ බව පොලිසිය පැවසීය .
කැබ් රථයේ රියැදුරු පොලිසිය මගින් අත්අඩංගුවට ගෙන ඇති අතර ඇඹිලිපිටිය පොලීසිය වැඩිදුර විමර්ශන සිදුකරයි .
