රාජපක්ෂ චෝර පුත්තු ඇතුළු රාජපක්ෂ නඩය රට බංකොලොත් කළ පසු රටේ බංකොලොත් භාවය ප්රකාශ කළ මහ බැංකු අධිපතිවරයාට එම ප්රකාශ සම්බන්ධව රාජපක්ෂලාම චෝදනා කිරීම අශිෂ්ට විහිලුවක් බව පාර්ලිමේන්තු මන්ත්රී චම්පික රණවක පවසයි. ප්රශ්නය රට බංකොලොත් කිරීම ද, එසේත් නැතිනම් රටේ බංකොලොත් භාවය ප්රකාශ කිරීම දැයි ඔහු විමසා සිටී.
ඔහු මේ බව පැවසුවේ අද (05) මෙරට එක්සත් අරාබි එමීර් රාජ්යයේ තානාපති කාලෙඩ් නසර් අල්අමේරි හමුවී පැවැත්වූ සාකච්ජාවෙන් අනතුරුව මාධ්යට අදහස් දක්වමිනි.
රටේ ණය ප්රශ්නයක් තිබුණ ද එම ඒ ණය ප්රශ්නය යම්තාක් දුරකට කළමනාකරණය කරගෙන හැම රජයක්ම පැමිණි බව කී මන්ත්රීවරයා රට බංකොලොත් වෙන තරමේ මුග්ධ තීරණ මේ ආණ්ඩුව ගත් බව පැවසීය.
“දැන් මේ රට බංකොලොත් කියලා ප්රකාශ කළේ ඇයි කියලා රාජපක්ෂවරුම අහනවා මහ බැංකු අධිපතිගෙන්. රට බංකොලොත් කළේ ඒගොල්ලෝ. රටේ ධනය හොරකම් කරගෙන ගියේ ඒගොල්ලෝ. දැන් අහනවා මහ බැංකු අධිපතිගෙන් බංකොලොත් බව ප්රකාශ කළේ ඇයි කියලා. මේක ප්රකාශ කරපු එකද ප්රශ්නේ? රට බංකොලොත් කරපු එක නෙමෙයිද ප්රශ්නේ?
එතන යම්කිසි තාක්ෂණික ප්රශ්නයක් තියෙනවා. පාර්ලිමේන්තුව නොදැනුවත්ව ඒ කටයුත්ත කිරීම ගැන. නමුත් ඒ වරද තියෙන්නේ මහ බැංකු අධිපතිගේ නෙමෙයි, රට බංකොලොත් කරපු රාජපක්ෂවරුන්ගේ. ප්රධාන වශයෙන්ම මහින්ද රාජපක්ෂ මහත්තයාත්, ගෝඨාභය රාජපක්ෂ මහත්තයත්, බැසිල් රාජපක්ෂ මහත්තයත් වගකියන්න ඕන.“
තානාපති කාලෙඩ් නසර් අල්අමේරි හමුවී පැවැත්වූ සාකච්ජාව පිළිබඳව අනතුරුව පාඨලී චම්පික රණවක මන්ත්රීවරයා මෙසේ පැවසුවේය.
“ඩුබායි රට 1990 පස්සේ විශේෂයෙන්ම ගුවන්, නාවුක, වෙළඳ ඒ වගේම අද වෙනකොට තාක්ෂණික මූලස්ථානයක් මර්මස්ථානයක් හැටියට දියුණු වෙලා තියෙනවා. ඉතින් අපිත් බලාපොරොත්තු වුණා ලංකාව ඒ තත්වයට ගේන්න.
මේ රාජපක්ෂ පවුල පැනලා ලංකාවේ අනාගතය සම්පූර්ණයෙන්ම විනාශ කළා. මේ වගේ ප්රශ්න වලට එක්සත් අරාබි එමීර් රාජ්යයත් මුහුණ දීලා තියෙනවා 2008 – 2009 වගේ කාලේ. ඉතින් ඒ අවස්ථාවලදී කොහොමද ඒවට ඒ අය ප්රතිචාර දැක්වුයේ කියන එක අපි කතාබහ කළා.
ඒ වගේම අද වර්තමානයේ අපට තියෙන ලොකු ප්රශ්නයක්, බලශක්ති ප්රශ්නය. ඒ බලශක්ති ප්රශ්නය ගත්තහම ඩුබායිවල තමයි අපේ කලාපයේ තියෙන වැදගත්ම තෙල් අලවි මධ්යස්ථානය තියෙන්නේ. ඉතින් ඒ කරුණු ගැනත් සාකච්ඡා කළා. ඒ වගේම අපි දන්නවා කාලයක් ඒ රටට අයිති එමිරේට්ස් ගුවන් සේවය, අපේ ගුවන් සේවය පාලනය කළා. ඒ වගේම දැන් ආණ්ඩුව බලාපොරොත්තු වෙනවා මේ තෙල් සැපයුම්කරුවෙක් හොයාගන්න. ඉතින් ඒ වගේ කාරණා සම්බන්ධයෙන් ඒ රාජ්යයේ ප්රතිචාරය අපි කතා කළා. ඔහුගේ අදහස වුණේ විධිමත් ස්ථාවර ආයෝජන විශ්වාසයක් හා වැඩපිළිවෙලක් නැතුව මේක සාර්ථක වෙන්නෑ. ඒ නිසා ඒ සඳහා ලංකාවත්, විශේෂයෙන් පාර්ලිමේන්තුවත්, ආණ්ඩුවත් ක්රියා කළ යුතුයි. එතකොට හුඟක් ආයෝජන ලංකාවට එයි. ලංකාවට හොඳ බුද්ධිමත් ජන කණ්ඩායමක් ඉන්නවා. මේක ඩුබායි වලටත් ලොකු සේවයක්. අබුඩාබියටත් ලොකු සේවයක් ඒ ජනතාව.”
