ශ්රී ලාංකේය මාධ්ය ක්ෂේත්රය තුළ සුවිශේෂ හැරවුම් ලක්ෂ්යයක් සටහන් කළ ප්රවීණ පුවත්පත් කලාවේදිනී අනුල ද සිල්වා දිවි සැරියෙන් සමුගෙන ඇති බව වේදනාවෙන් යුතුව දන්වා සිටිමු.
ඇය පුවත්පත් කලාවේ ආදර්ශමත් කාන්තා චරිතය වූවාව. අප කාගේත් අනුලක්කා වූ අනුල ද සිල්වා පුවත්පත් කලාවේදිනියක ලෙස ලංකාවේ එක් යුගයක් රූපණය කළ චරිතයකි. අසාධාරණය වෙනුවෙන් නොබියව හඬ නැගීමට තරම් විශාල පෞරුෂයක් සහිත කෙසඟ සිරුරකින් යුතු මේ කුඩා ගැහැණිය කලෙක හැඳින්වූයේ “ලේක් හවුසියේ යකඩ ගැහැණිය” ලෙසය. මුලු මහත් පුවත්පත් පුවත්පත් මාධ්යකරුවන් තුළම ඇය පිළිබඳව තිබුණේ විශාල ගෞරවයකි.
අනුල ද සිල්වා උපත ලබන්නේ 1941 ජනවාරි 27 වැනිදා අම්බලන්ගොඩ පොල්වත්තේ දි ය. ඊයේ (11) මට්ටක්කුලිය සිය පුතනුවන්ගේ නිවසේ දී දිවි සැරියෙන් සමුගන්නා විට ඇයගේ වයස අවුරුදු 83ක් විය.
නවකතා, යොවුන් කතා, සහ පරිවර්තන කෘති විශාල ප්රමාණයක් රචනා කර ඇති අනුල ද සිල්වා රාජ්ය සාහිත්ය සම්මාන දෙවරක්ම හිමිකර ගත් ලේඛිකාවක් වූවාය.
1964 වසරේ 23 හැවිරිදි තරුණියක ලෙසින් පුවත්පත් කලා ජීවිතය ඇරඹූ අනුල ද සිල්වා 2001 වසරේ දී ආයතනගත පුවත්පත් කලාවෙන් විශ්රාම යන විට 35 වසරකට වැඩි අත්දැකීම් ලබා තිබුණාය. ලේක්හවුසියේ ඇය වසර 18ක් සේවය කළාය. එහිදි ලද එම අත්දැකීම් සම්භාරය ගොනු කළ කෘතියක් ඇය “බේරේ ගෙදර සිට” නමින් ලීවාය. 1982 දී විජය නිවුස් පේපර්ස් ආරම්භ කළ සතිපතා කාන්තා පුවත්පතවන “සිරිකත” හි ප්රථම කර්තෘවරයා ඇයය. වනිතා විත්ති සඟරාවේ ප්රථම කර්තෘවරිය ද ඇයය.
අනුල ද සිල්වා පුවත්පත වෙත සම්බන්ධවන විට ක්ෂේත්රයේ සිටියේ අතලොස්සක් පමණ වූ පුවත්පත් කලාවේදිනියන් පිරිසකි. අද තරම් තාක්ෂණය අතින් දියුණු තත්ත්වයක නොපැවතුන ඒ වකවානුවේ පුවත්පත් කලාවම යනු අභියෝගයකි. විශේෂයෙන්ම කාන්තාවක වශයෙන් එහි බරදැරීම අතිශයින්ම අමාරු කාර්යයක් වී තිබිණි. එහෙත් අනුල ද සිල්වා ආදර්ශමත් ලෙස ඒ අභියෝග කළමනාකරණය කළාය.
අප මුලින් කී ලෙස අසාධාරණයට එරෙහිව තනිව සටන් කිරීමේ අදීන පෞරුෂයක් සතුව සිටි ඇය කලෙක ලේක්හවුසියේ යකඩ ගැහැණිය වූවාය.
පුවත්පත් කාලාවෙන් විශ්රාම ගිය පසු ඇය පූර්ණ කාලීනව ලේඛනයට යොමු වූවාය. ඉංග්රීසි සහ සිංහල භාෂා ද්විතවයෙහි පරිචයක් සතුව සිට ඇය සිංහල පරිවර්තන සාහිත්යයට අලුත් රසයක් එක් කළ ලේඛිකාවකි. ඇය විසින් පාඨකයින්ට දායද කළ කෘති ප්රමාණය 125කට අධිකය.
අනුල ද සිල්වා ගේ අවසන් කටයුතු 14 වැනිදා සඳුදා පැවැත්විමට නියමිතය. අවසන් ගෞරව දැක්වීම සඳහා 13 සහ 14 දින දෙකේම ජයරත්න මල් ශාලාවේ දේහය තැන්පත් කර තැබීමට නියමිතය.
