දිනසේන රතුගමගේ –
2025 වසර යාපනය ජාත්යන්තර ගුවන් තොටුපලේ ස්වර්ණමය වසර ලෙස යාපනය ජාත්යන්තර ගුවන් තොටුපල විසින් නිකුත් කරණ ලද පරිපාලන වාර්තාවක සඳහන් වේ.
2019 වසරේදී මෙම ගුවන් තොටුපල ජාත්යන්තර ගුවන් තොටුපලක් බවට පරිවර්තනය කිරීමෙන් පසුව වැඩිම මගීන් සංඛ්යාවක් හා ගුවන් යානා සංඛ්යාවක් පැමිණි වසර ලෙස 2025 වසර හදුන්වා තිබේ.
එම පරිපාලන වාර්තාවට අනුව එම වසර තුළ පැමිණි මගීන් සංඛ්යාව 48,431 කි.
මේ මගීන් ගෙන් යාපනය ගුවන් තොටුපල එම කාලය තුළ රුපියල් බිලියන 19.06 ක මුදලක් උපයා ගෙන තිබේ.
2019 වසරට සාපේක්ෂව 2025 වසර තුළ මෙම ගුවන් තොටුපලට ගුවන් යානා 1138 ක් වැඩියෙන් පැමිණ ඇති අතර මේ වන විට යාපනය ජාත්යන්තර ගුවන් තොටුපලට එයාර් බස් A-320 වැනි විශාලතම ගුවන් යානා හැසිරවීමටද හැකියාව උදා වී ඇති බව පරිපාලන වාර්තාවේ සඳහන් වෙයි.
2026 වසරේදී යාපනය ජාත්යන්තර ගුවන් තොටුපල හරහා සංචාරකයින් මිලියන තුනක් ආකර්ශනය කර ගැනීමේ අපේක්ෂාවෙන් වැඩ කටයුතු ආරම්භ කොට ඇති බවත් යාපනය ජාත්යන්තර ගුවන් තොටුපල විසින් නිකුත් කරණ ලද පරිපාලන වාර්තාවේ වැඩිදුරටත් සඳහන් කොට තිබේ.
