කීර්ති ප්රනාන්දු –
කිසිම විධිමත් ක්රමවේදයකින් තොරව මාර්ග බාධකවල රාජකාරි යොදවා ඇති කාන්තා පොලිස් නිලධාරිණියන් ඉතාම දැඩි මානුෂි අපහසුතාවයන්ට ලක්ව ඇති බවත්, බස්නාහිර පළාතේ ඉහළ පොලිස් නිලධාරියෙක් ස්වකීය පොලිස්පති සිහිනය සැබෑ කරගැනීම සඳහා දියත් කර ඇති ලකුණු මෙහෙයුම පොලිසියේ පහළ නිලධාරීන් පවා දැඩි පීඩාවකට පත් කර ඇති බවත් පොලිස් ආරංචි මාර්ග පවසයි.
රටේ සිවිල් යුද්ධය පැවති වකවානුවට පසුව මෙසේ බස්නාහිර පළාත තුළ මාර්ග බාධක රාජකාරිවල යෙදවූ කාන්තා නිලධාරිණියන් කිහිපදෙනෙක් ලංකාසරට අදහස් දක්වමින් පැවසුවේ දිනකට පැය 08 රාජකාරිවල යොදවා ඇති තමන්ට වැසිකිළි පහසුකමක්වත් නොමැති බවය.
“ ඉන්න ඕන නිල ඇඳුමෙන්. වැහි කබායක්වත් නෑ. අනෝරා වැස්සෙ තෙමෙනවා. මේ පැය 08ක් පාරෙ හිටන් ඉඳිමින් කරන රාජකාරිය කාන්තා පොලිස් නිලධාරිණියකට පහසු දෙයක් නොවෙයි. අනෙක මේ රාජකාරිවල යොදවා ඉන්න බොහෝ දෙනෙක් තරුණ වයස පසු කරපු අය. පාරෙ හිටගෙන ඉඳලා ගෙදර ගිහින් කළ යුතු ගෘහණියගෙ වැඩ කොටස කරගන්න කායික මානසික ශක්තියක් නෑ. “
“ඒ සියල්ලම පැත්තකින් තියමු. මාර්ග බාධකවල රාජකාරි යොදවන්නෙ වසංගත තත්වය පාලනය කරන්න අවශ්ය සමාජ හැසිරීම් සීමා කරන්න. මේ රාජකාරියෙ යොදවනවා නම් නිසි ක්රමවේදයක් තියෙන්න ඕන. මාර්ග බාධකවලදි භාවිත කරන්න මුව ආවරණ, අත් ආවරණ, විෂබීජ නාශක දියරවර්ග කිසිම දෙයක් අපට ලැබෙන්නෙ නෑ කිව්වොත් ඔබත් පුදුම වේවි.“
මේ පිළිබඳව උසස් නිලධාරීන් දැනුවත් කළ ද ඔවුනුත් අසරණව සිටින ආකාරය මේ කාන්තා පොලිස් නිලධාරිනීහු පෙන්වා දුන්හ.
“ කාන්තා නිලධාරිනියන් විතරක් නොවෙයි… පොලිසියම පවු. මේ මාර්ග බාධක රාජකාරිය හොඳටම වෙන්න නම් ටී.වී. කැමරා එක්ක දෙකක් වටේ තියෙන්න ඕන. ඕ.අයි.සී.ලා ඉඳන් හැමෝම කැමරාවට පාරේ. මීඩියා ගිය ගමන් මාර්ග බාධක අක්රීය වෙනවා. වැඩි හරියක් තියෙන්නෙ කැමරාවට දාන ෂෝ. මෙහෙම කොහොමද රටක තීරණාත්මක අවස්ථා පාලනය කරන්නෙ.“
“කරන්න පුලුවන් දේයි බැරි දේයි හැම දේම ලොක්කො බාර ගන්නවා. අවශ්ය ස්ට්රෙන්ත් එක නෑ. උණක් හෙම්බරිස්සාවක් හැදුනොත් ගෙවල්වලට යවනවා මිසක් පී.සී.ආර්.එකකටවත් යොමු කරන්නෙ නෑ.“ උසස් පොලිස් නිලධාරියෙක් ලංකාසරට පැවසීය.
