දිනසේන රතුගමගේ –
අභාවප්රාප්ත මාවෙයි සේනාධිරාජා හිටපු මන්ත්රීවරයාගේ ආදාහන කටයුතු දේශපාලනඥයින් හා විශාල ජනතා සහභාගිත්වයකින් යුතුව අද ( 2 ) සවස යාපනයේ මාවිත්තපුරම් පොදු සුසාන භූමියේදී සිදු කෙරුණි.
හෘදයාබාධයක් හේතුවෙන් මියයන විට 82 වෙනි වියේ පසු වූ මාවෙයි සේනාධිරාජා ඉලංකෙයි තමිල් අරුසු කච්චි පක්ෂයේ දේශපාලන නායකයා වූ අතර මීට පෙර ඔහු වසර ගණනාවක්ම එම පක්ෂයේ නායකයා වශයෙන්ද කටයුතු කොට තිබේ.
මාවෙයි සේනාධිරාජා හිටපු මන්ත්රීවරයාගේ දේහයට අවසන් ගරු බුහුමන් දැක්වීමට අනුර කුමාර දිසානායක ජනාධිපතිවරයා ඇතුලුව දකුණේ දේශපාලන නායකයින් විශාල සංඛ්යාවක්ද ඔහුගේ නිවසට වරින් වර පැමිණ තිබුණි.
මාවෙයි සේනාධිරාජාගේ නිවසේ උදවිය අවසන් ගරු බුහුමන් දැක්වීමෙන් පසුව එම නිවසේදී හින්දු චාරිත්රානුකූලව ආගමික වතාවත් සිදු කිරීමෙන් අනතුරුව ඔහුගේ දේහය විශාල පෙරහැරකින් මාවිත්තපුරම් පොදු සුසානභූමිය වෙත රැගෙන ගොස් අවසන් කටයුතු සිදු කරණු ලැබීය.
