අසේල කුරුළුවංශ –
මහනුවර දිස්ත්රික් ලේකම් කාර්යාලයේ පුපුරණ ද්රව්ය සවිකර ඇති බවට කරන ලද ප්රකාශයක් හේතුවෙන් මහජන නොසන්සුන්තාවයක් ඇති කිරීමේ උත්සාහයක නිරත පුද්ගලයා එම ඊ මේල් පණිවිඩ එවා ඇත්තේ විදේශ රටක සිට බව පොලිසිය සැක කරයි.
සිද්ධිය සම්බන්ධයෙන් වැඩිදුර පරීක්ෂණ පරිගණක අපරාධ විමර්ශන අංශය (CID) විසින් පවත්වන බව පොලිසිය පැවසීය.
ඊයේ (26) මහනුවර දිස්ත්රික් ලේකම් කාර්යාලයට ලැබුණු විද්යුත් තැපෑලකින් කියැවුණේ පරිශ්රය තුළ ස්ථාන පහක පුපුරණ ද්රව්ය සවිකර ඇති බවය. මහනුවර කොට්ඨාසය භාර ජ්යෙෂ්ඨ පොලිස් අධිකාරීවරයාට කළ දැනුම්දීමකින් පසු, මහනුවර පොලිස් ස්ථානය, පොලිස් විශේෂ කාර්ය බලකායේ බෝම්බ නිෂ්ක්රීය ඒකකය, පොලිස් K9 ඒකකය සහ හමුදා බෝම්බ නිෂ්ක්රීය ඒකකයේ නිලධාරීන් සම්බන්ධ කර ගනිමින් දැවැන්ත ඒකාබද්ධ සෝදිසි මෙහෙයුමක් ආරම්භ කර තිබෙද්දීත් අනතුරු අඟවන ඊ මේල් පණිවිඩ මහනුවර දිස්ත්රික් ලේකම් කාර්යාලය වෙත ලැබී තිබිණි.
ඊයේ දිනයේ සවස 04ට පෙර බෝම්බදිය පුපුරුවන බව ඊ මේල් පණිවිඩ එවන පුද්ගලයා යළි යළි ප්රකාශ කිරීම හේතවෙන් ඊයේ උදෑසන සිට දවස දක්වා සෝදිසි මෙහෙයුම සිදු කරන ලදී. මෙහෙයුම අතරතුර කිසිදු සැක සහිත හෝ පුපුරණ ද්රව්යයක් හමු නොවීය. අනතුරුව සවස 4 පසු වූ පසු මෙහෙයුම් අත්හැර දැමිණි.
මෙම තර්ජනයත් සමග දිස්ත්රික් ලේකම් කාර්යාලයේ සියලු කටයුතු අඩපණ වූයේය. මේ සම්බන්ධයෙන් පරීක්ෂණ දිගටම කරගෙන යනු ඇති බව පොලිසිය තහවුරු කළේය.
