මෙරට මුහුදු සීමාව උල්ලංඝනය කරමින් දී මන්නාරම උතුරු මුහුදේ අනවසර ලෙස මසුන් අල්ලමින් සිටියදී නාවික හමුදාව විසින් අත් අඩංගුවට පත් ඉන්දීය ධීවරයින් 30 දෙනා එළඹෙන 23 දා දක්වා රක්ෂිත බන්ධනාගාරගත කිරීමට මන්නාරම මහේස්ත්රාත් අධිකරණය නියෝග කර තිබේ.
නාවික හමුදාව, 2025 ඔක්තෝබර් මස 08 වැනි දින රාත්රියේ සහ 09 දා අළුයම් කාලයේ, මන්නාරම උතුර සහ යාපනය ඩෙල්ෆ්ට් දූපතට ඔබ්බෙන් වූ මෙරට මුහුදු සීමාවේ දී මෙම ආක්රමණික ධීවරයින් පිරිස අත් අඩංගුවට ගන්නේ මන්නාරම උතුරු මුහුදේදී සහ ඩෙල්ෆ්ට් දූපතට ඔබ්බෙන් දේශීය මුහුදු සීමා ආක්රමණය කර සිටියදී ය.
මෙහෙයුමේ දී ඉන්දීය ධීවර යාත්රා පහක් (05) සමඟ ඉන්දීය ධීවරයින් හතලිස් හත් දෙනෙකු (47) නාවික හමුදා භාරයට ගැනීමට කටයුතු කෙරිණි.
මෙම මෙහෙයුම් මඟින් මන්නාරම උතුරු මුහුදේදී නාවික හමුදා භාරයට ගත් ඉන්දීය ධීවර යාත්රා හතර (04) සහ එහි සිටි ඉන්දීය ධීවරයින් තිස්දෙනා (30) නීතිමය කටයුතු සඳහා මන්නාරම ධීවර පරීක්ෂක කාර්යාලය වෙත භාර දී තිබිණි.
යාපනය ඩෙල්ෆ්ට් දූපතට ඔබ්බෙන් වූ මෙරට මුහුදු සීමාවේදී නාවික හමුදා භාරයට ගත් ඉන්දීය ධීවර යාත්රාව සහ එහි සිටි ඉන්දීය ධීවරයින් දහහත්දෙනා (17) ඉදිරි නීතිමය කටයුතු සඳහා යාපනය මයිලඩි ධීවර පරීක්ෂක කාර්යාලය වෙත භාරදීමට කටයුතු කෙරිණි.
අධිකරණ නියෝග මත මෙසේ බන්ධනාගාරගත කර ඇත්තේ මන්නාරම ධීවර පරීක්ෂක කාර්යාලය හරහා මන්නාරම අධිකරණය වෙත ඉදිරිපත් කළ ධීවරයින් 30 දෙනාය.
ඒ අනුව සැකකරුවන් 30 දෙනා එළැඹෙන 23 වැනිදා දක්වා රක්ෂිත බන්ධනාගාරගත කිරීමට මහේස්ත්රාත්වරයා නියෝග කළේය.
සිද්ධිය සම්බන්ධව මන්නාරම ධීවර පරීක්ෂක කාර්යාලය හා නාවික හමුදාව වැඩිදුර පරීක්ෂණ මෙහෙයවයි.
