දළදා ප්රදර්ශනය හා සමාන වැදගත්මක් සහ ගෞරවයක් සහිතව කැළණියේ නාග ධාතු ප්රදර්ශනයක් සංවිධානය කරන ලෙස පාර්ලිමේන්තු මන්ත්රී දිලිත් ජයවීර අද (17) පාර්ලිමේන්තුවේ දී ඉල්ලා සිටියේය.
2019 මහ මැතිවරණය ආසන්නයේ දී කැළණියෙන් මතුවූ නාග රාජයා සහ නාග ධාතු සම්බන්ධව වූ මතය දැඩි ලෙස සමාජගත කිරීමට මැදිහත් වූ බවට විශ්වාස කරන දෙරණ නාලිකාව හිමි ව්යාපාරිකයා ලෙස දිලිත් ජයවීර එවක විවාදයට ලක් වූයේය.
අද පාර්ලිමේන්තු මන්ත්රීවරයෙක් ලෙස ඔහු කැලණියේ නාග ධාතු ප්රදර්ශනයක් ඉල්ලා සිටියේ එය සංස්කෘතික ප්රබෝධයක් සඳහා අත්යවශ්ය අංගයක් වනු ඇතැයි කියමිනි. එමෙන්ම ජනාධිපති අනුර දිසානායක සහ අගමැතිනී හරිනි අමරසූරිය මනස්ගාත ඔළුවෙන් අත්හැර දළදා ප්රදර්ශන පවත්වන සංස්කෘතික මිනිසුන් බවට පත්වීම ගැන තමන් තරම් සතුටුවන වෙනත් කෙනෙක් නැති බව ද දිලිත් ජයවීර පැවසුවේය.
ඔහු අද පාර්ලිමේන්තුවේ මෙසේ ද කීවේය.
ආගම අබින් කියලා කියන මනස්ගාතවලින් ඔබ අයින් වීම ගැන සිතුටුයි. අද දළදා ප්රදර්ශනය පැවැත්වීම ගැන මම සතුටුයි. මම යෝජනා කරනවා ඔබතුමන්ලට මේ වගේම අපි වරක් වැන්දොත් නිවන් දකින්නට පුලුවන් කියලා අපි විශ්වාස කරන කැළණිය රජ මහා විහාරයේ අපේ හාමුදුරුවොත් එක්ක කතා කරලා එතනත් අර නාග ධාතු ප්රදර්ශනය කිව්වම අපට ශ්රද්ධාව ඇති වෙනවා.
හැම ආගමකම තියෙන්නේ එහි දර්ශනයට ඔබ්බට ගියපු ශ්රද්ධාවක්. අපි දැකලා නෑ හේමමාලා කුමරිය දන්ත ධාතුව අරගෙන එනවා. අපි විශ්වාස කරනවා. ඒක අපේ විශ්වාසයක්.
මණිඅක්ඛිත නා රජු දමනයට බුදු රජානන්වහන්සේ කැළණියට වැඩියා කියලා අපි දැක්කෙ නෑ. අපි විශ්වාස කරනවා. ආගමික විශ්වාසයන්ට ඔය විදිහට පහර ගහන්න ඔබ කටයුතු කරනකොට… නයා නයා කියලා ඔබලාගෙ ෆේක් එකවුන්ට්වලින් ගැහුවේ මේ රටේ ශ්රි ලාංකික සභ්යත්වයට මිසක් මට නෙමෙයි. මම ඔය නිවුස් එක දානව කියල දන්නෙත් නෑ. දැනගත්තා නම් නවත්වන්නෙත් නෑ. ඒක යන්න ඕන නිවුස් එකක්.
හැබැයි ඔය නිවුස් එක හැම චැනල් එකම ගැහුවා. ඔබගේ ඔෆීෂියල් චැනල් එකවන සිරස නාලිකාවෙත් පැයක වැඩ සටහනක් ගියා ලයිව්. දිලිත් ජයවීර පැවසුවේය.
ඔහු කීවේ ඊර්ශ්යාව වෛරය ක්රෝධය ඉවත් කොට ජාතික ජන බලවේගයේ සාමාජිකයින් සංස්කෘතික මනුෂ්යයන් වීම ගැන තමා ඉතාම සතුටුවන බවය. ඔහු මෙසේත් කීවේය.
“අගමැති තුමිය නිරාගමික රාජ්යයක් ඉල්ලලා සාක්ෂි දුන්න අගමැතිනිය අටපිරිකර අරගෙන, සුදු සාරිය ඇඳගෙන කොහොමද එකත් පසකට නැමෙනකොට අපිට ආඩම්බර නැද්ද මේ රටේ සභ්යත්වය ගැන. අපට ආඩම්බර නැද්ද.”
අනතුරුව ඔහු නාගධාතු ප්රදර්ශනයක් ඉල්ලා සිටියේය.
“මේ ආණ්ඩුව ඉදිරිපත් කරන අනෙකුත් කරුණු අනුව සංස්කෘතික හා ආගමික ප්රබෝධයට ගරු කරලා අපි අර කැලණියෙත් ධාතු ප්රදර්ශනය දළදා ධාතු ප්රදර්ශනය වැනි ඒ රාජ්ය අනුග්රහයෙන්ම පවත්වමු. අනෙකුත් ජාතීන්ට සහ ආගම්වලට ගරු කරමින් ඒ සංස්කෘතික කටයුතුවලටත් රාජ්ය අනුග්රහය ලබා දෙමින් ඉස්සරහට යමු. “
