2025 අංක 11 දරන සේවකයන්ගේ ජාතික අවම චේතන සංශෝධන පනතේ විධිවිධාන අනුව 2026 වර්ෂයේ ජනවාරි මස 01 වැනිදා සිට ක්රියාත්මක වන පරිදි පෞද්ගලික අංශයේ ජාතික අවම වේතනය රුපියල් 27,000 සිට රුපියල් 30,000 දක්වා වැඩිවන බව කම්කරු දෙපාර්තමේන්තුව නිවේදනය කරයි.
එමෙන්ම දෛනික වැටුප රුපියල් 1,080 සිට රුපියල් 1,200 දක්වා වැඩිවන බවත්, ඒ අනුව සේවායෝජකයන් විසින් අදාල ගෙවීම් කළ යුතු බවත් කම්කරු දෙපාර්තමේන්තුව විසින් නිකුත් කළ නිවේදනයේ දැක්වේ.
මෙම සංශෝධන පනත නිසි ලෙස ක්රියාත්මක කිරීමේදී, අතරමැදියෙකු හෝ කොන්ත්රාත්කරුවකු හරහා යම් කර්මාන්තයක හෝ සේවාවක සේවයේ යොදවා ගනු ලබන සේවකයෙකු සම්බන්ධයෙන් ආසන්නතම සේවායෝජකයා මෙන්ම අවසාන සේවායෝජකයා ද ඇතුළුව සෑම සේවායෝජකයකුම එකී පනතේ නියමයන් ප්රකාරව බැඳී සිටින බව එහි වැඩි දුරටත් සඳහන්ය.
එසේම, සංශෝධිත පනතේ 4 වන වගන්තිය ප්රකාරව අයවැය සහන දීමනාවන් එකතු කිරීම හැරුණු කොට සේවකයෙකු විසින් 2025.03.31 දින වන විට ලබමින් සිටි වෙනත් කිසිම දීමනාවක් අවම වේතනය සඳහා හිලවු කිරීමට යොදා නොගත යුතු බව ද කම්කරු දෙපාර්තම්න්තුව අවධාරණය කර ඇත.
මෙම වැටුප් වැඩි කිරීම අනුව සේවක අර්ථසාධක අරමුදල්, සේවා නියුක්තිකයන්ගේ භාර අරමුදල්, අතිකාල, පාරිතෝෂික, ප්රසූතිකාධාර ගෙවීම් සහ නිවාඩු දින ගෙවීම යනාදී සියලු ව්යවස්ථාපිත ගෙවීම් සඳහා අදාල කර ගැනීමේ වගකීම සේවායෝජකයන් වෙත පවර තිබේ.
යම් හෙයකින්, නිසි පරිදි ගෙවීම් නොකරන සේවායෝජකයන් වෙතොත් ඒ සම්බන්ධයෙන් වන පැමිණිලි cms.labourdept.gov.lk ඔස්සේ කම්කරු දෙපාර්තමේන්තුවේ පැමිණිලි කළමනා කරණ පද්ධතියට ඇතුළත් කිරීම හෝ ළඟම පිහිටි කම්කරු කාර්යාලයට ලිඛිතව ඉදිරිපත් කළ හැකි බව ද කම්කරු දෙපාර්තමේන්තුව කියයි.
පහත දැක්වෙන්නේ එම නිවේදනය ය.
