අත් අඩංගුවට ගෙන ගම්පහ මහේස්ත්රාත් අධිකරණයට ඉදිරිපත් කළ කාන්තාව අධිකරණ නියෝග මත අංගොඩ ජාතික මානසික සෞඛ්ය විද්යායතනය වෙත යොමු කර තිබේ.
ඒ එම කාන්තාව සම්බන්ධව මානසික වෛද්ය පර්යේෂණ වාර්තාවක් ලබා ගැනීම සඳහා ය.
ජ්යෙෂ්ඨ නියෝජ්ය පොලිස්පති රන්මල් කොඩිතුවක්කුගේ නැගනිය ලෙස පෙනී සිටිමින් පොලිසියේ රාජකාරියට බාධ කරමින් වියරු ලෙස හැසිරුණ කාන්තාවක සම්බන්ධ වීඩියෝ පටයක් අද දිනය පුරා වේගයෙන් සමාජ මාධ්ය ඔස්සේ පැතිරී ගියේය.
ඊයේ (31) දිනයේ දී කොටුගොඩ උඩුගම්පොල මාර්ගයේ දී මාර්ග නීති කඩ කරමින් මෝටර් රථයක් ධාවනය කළ කාන්තාවක පොලිස් අණ නොතකා රිය ධාවනය කර තිබිණි. පොලිසිය හඹා ගොස් ඇයව නැවැත්වූ විට තමන් රන්මල් කොඩිතුවක්කුගේ නැගනිය බව කියමින් ප්රදේශයේ සිවිල් ජනතාවගේ ද විරෝධය නොතකා යළි පලා යමින් සිටිය දී මිනුවන්ගොඩ පොල්වත්ත ප්රදේශයේ දී ගම්පහ පොලිසිය විසින් අත් අඩංගුවට ගෙන තිබිණි.
අන්තරාදායක ලෙස රිය පැදවීම, අපරික්ෂාකාරී රිය ධාවනය, පොලිස් සංඥා නොතකා රිය ධාවනය, සාපරාධී බලහත්කාරය, අනෙකෙකු ලෙස පෙනී සිටීම යන චෝදනා යටතේ ගම්පහ මහේස්ත්රාත් අධිකරණයට අද මෙම කාන්තාව ඉදිරිපත් කළාය.
ඇයව අධිකරණ නියෝගයක් මත ජාතික මානසික සෞඛ්ය විද්යායතනය වෙත යොමු කර ඇත්තේ ඒ අනුවය.
