බටහිර දෙසින් වූ ගැඹුරු මුහුදේදී නාවික හමුදා භාරයට ගත් සීදේවී සීදේවී 0811 නැමැති මෙරට බහුදින යාත්රාවේ තිබී හෙරොයින් සහ අයිස් මත්ද්රව්ය තොගයක් සොයාගෙන තිබේ. ආරක්ෂක නියෝජ්ය අමාත්යවරයා උපුටා දක්වමින් නිවුස් ෆස්ට් වාර්තා කර ඇත්තේ අත් අඩංගුවට ගත් මත්ද්රව්ය තොගයේ වටිනාකම රුපියල් බිලියන 05ක් ඉක්මවන බවය.
එම යාත්රාවේ තිබූ උර 16ක අයිස් සහ හෙරොයින් මත්ද්රව්ය ඇතැයි අනාවරණය වී ඇත. මෙම යාත්රාව සම්බන්ධව විශ්වාසනීය තොරතුරු රැසක් විමර්ශන අංශ වෙත ලැබී තිබිණි. හෙරොයින් සහ අයිස් කිලෝ 350කට ආසන්න ප්රමාණයක එම යාත්රාවේ ප්රවාහනය කරමින් ඇති බවට වූ තොරතුරුක් ද විමර්ශන අංශ සතු විය. නාවික හමුදාව විසින් අදාල මෙහෙයුම දියත් කරන්නේ ඒ දත්ත මත පදනම්වය.
දැනට වාර්තාවන මූලික තොරතුරු ප්රකාරව මෙම හෙරොයින් සහ අයිස් මත්ද්රව්ය තොගය මෙරට මත්කුඩු ජාවාරම් කරුවන් කීප දෙනෙක් විසින් ගෙන්වා ඇත්තේ පකිස්ථානයෙනි. පාකිස්තාන ජාතික මත්ද්රව්ය ජාවාරම්කරුවකු වන හජී අබ්දුල් නැමැත්තෙක් මෙම මත්ද්රව්ය තොගය ශ්රී ලංකාවට එවා ඇති බවට තොරතු වූයේය.
දෙමටගොඩ චමින්ද්ගේ පුතා, බටුවත්ත චාමර, පරෙයි සුද්දා සහ රූබන් නැමැති මත්ද්රව්ය ජාවාරම් කරුවන්ගේ මත්ද්රව්ය ඇනවුම් මත මෙම කුඩු තොගය ප්රවාහනය වෙමින් තිබුණු බව ද මූලික විමර්ශනවලින් අනාවරණය කර ඇත.
එම විශ්වාසනීය තොරතුරු මත නාවික හමුදාව එම යාත්රාව භාරයට ගැනීම සඳහා විශේෂ මෙහෙයුමක් දියත් කළේය. හමුදා නිලධාරින් අදාළ යාත්රාව දෙසට ළඟාවූයේ නාවික හමුදාවට අයත් දිගුදුර නාවික නෞකා යොදාගනිමින්ය.
අනතුරුව බහුදින යාත්රාව සිය භාරයටගත් නාවික හමුදා නිලධාරින් යාත්රාවේ සිටි සැකකරුවන් 6 දෙනෙකු ද අත්අඩංගුවට ගෙන තිබුණි. යාත්රාව අද පෙරවරුවේ දික්ඕවිට ධීවර වරයාට රැගෙන එනු ලැබ ඇත.
