දිනසේන රතුගමගේ –
ඊයේ (04) රාත්රියේ වවුනියාවේ පුලියන්කුලම පොලීසියට අයත් ජීප් රථයක් පාරෙන් ඉවතට පැන නෙඩුන්කේණී ප්රදේශයේ නිවසක් තුළට කඩා වැදීම නිසා නිවසේ තිබූ රුපියල් ලක්ෂ විස්සක පමණ භාණ්ඩ වලට හානි සිදුව තිබේ.
ජීප් රථය පදවන ලද රියදුරා බීමත්ව අධික වේගයෙන් එම ජීප් රථය පැදවීම නිසා මේ අනතුර සිදු වූ බව කියමින් නෙඩුන්කේණී ප්රදේශයේ ජනතාව පොලීසියට එරෙහිව විරෝධතාවය දක්වනු දක්නට ලැබිණි.
බේබදු පොලිස් රියදුරාට නීතිය ක්රියාත්මක කරන ලෙස කළ ඉල්ලීම නිසා එම ස්ථානයේ දැඩි නොසන්සුන්තාවයක් හට ගෙන තිබුණි.
මේ අතරවාරයේ පොලිස් ජීප් රථයේ සිටි පොලිස් නිලධාරීන්ව නෙඩුන්කේණී පොලීසියේ පිරිසක් විසින් රහසිගතව එම ස්ථානයෙන් ඉවතට රැගෙන යාම නිසා යළිත් දැඩි නොසන්සුන්තාවයක් හට ගත් අතර තත්ත්වය පාලනය කිරීමට පොලිස් විශේෂ කාර්ය බලකායේ නිලධාරින්ද කැදවීමට සිදු විය.
ජීප් රථය නිවස තුළට එක්වරම කඩා වැදුණු අවස්ථාවේදී නිවසේ සිටි කුඩා ළමුන් තුන් දෙනා ජීප් රථයට යට නොවී බේරී තිබුණේ අනූ නවයෙනි.
නිවසේ නවතා තිබූ යතුරු පැදියක් මතින් ජීප් රථය ගමන් කොට තිබූ අතර නිවසේ තිබූ තවත් භාණ්ඩ රැසකට මෙම අනතුරෙන් හානි සිදුව ඇත.
තත්ත්වය සමථයකට පත් කිරීම සදහා ජෙයෂ්ඨ පොලිස් නිලධාරීන් කීප දෙනෙකුම එම ස්ථානයට පමිණි අතර නිවෙස් හිමියා තම නිවසේ භාණ්ඩ වලට සිදු වූ අලාභයට වන්දි ලබා දෙන ලෙස එම නිලධාරීන්ගෙන් ඉල්ලීමක් කොට තිබේ.
නෙඩුන්කේණී පොලීසිය හා පුලියන්කුලම පොලීසිය සිද්ධිය සම්බන්ධයෙන් පරීක්ෂණ පවත්වා ගෙන යයි.
