ශ්රියානි විජේසිංහ –
කඩාකප්පල් කාරී කටයුතු වළක්වා ගැනීමට පොලිස් ආරක්ෂාව ලබා දී රුපියල් 55ක සිල්ලර මිලක් යටතේ පාරිභෝගකියන්ට බිත්තර ලබා දීමට රජය සැලසුම් කර ඇත.
අමේ තීන්දුව ගෙන ඇත්තේ අද කුකුළු නිෂ්පාදන කර්මාන්තකරුවන්ගේ සංගමය කෘෂිකර්ම හා වනජීවී අමාත්ය මහින්ද අමරවීර සමග කළ සාකච්ඡාවකින් අනතුරුව රුපියල් 55කට බිත්තර ලබා දීම සඳහා එකඟතාවය පළ කිරීමෙන් පසුවය. .
රජය මෙම තීරණය ගනු ලබන්නේ මේ වනවිට දේශීය වෙළෙඳ පොලේ කුකුළු බිත්තර මිල රුපියල් 70 ඉක්මවා යමින් පවතින පසුබිමකය.
දේශීය කුකුළු බිත්තර කර්මාන්තකරුවන් සාධාරණ මිලකට බිත්තර ලබා නොදෙන්නේ නම් අවම මිලක් යටතේ බිත්තර මිලදී ගැනීම සඳහා බිත්තර ආනයනය කිරීමට සිදුවනු ඇති බවත් ඇමතිවරයා මෙහිදි අවධාරණය කළේය.
ආරම්භයේ දී කොළඹට දිනපතා බිත්තර රැගත් ලොරි 20ක් බැගින් යොදා එවා ජනාකීර්ණ ප්රදේශවල දී පාරිභෝගිකයින්ට අලෙවි කිරීමටත්, එමෙන්ම වෙනත් නාගරික ප්රදේශවලට ද එම වෙළෙඳාම ව්යාප්ත කිරීමටත් ඇමතිවරයා සමග පැවති සාකච්ඡාවේ දී කුකුළු නිෂ්පාදන කර්මාන්තකරුවන්ගේ සංගමය එකඟත්වය පළ කර ඇත.
මීට අමතරව සියලුම ආර්ථික මධ්යස්ථාන හා සතොස පරිශ්ර ආශ්රිතව බිත්තර අලෙවි කිරීමේ පහසුකම් ලබා දීමටත්, කිසියම් පිරිසක් කඩාකප්පල්කාරී ක්රියාවල නිරත වුවහොත් අදාල බිත්තර අලෙවිකරුවන් ආරක්ෂා කිරීම සඳහා ශ්රී ලංකා පොලිස් දෙපාර්තමේන්තුවේ සහය ලබා දීමටත් අමාත්ය මහින්ද අමරවීර එකඟත්වය පළ කර ඇත.
කුකුළු කර්මාන්තය ආශ්රිතව දැනට පවතින සත්ව ආහාර හිඟකම හා මිල ඉහළයාම වැනි හේතුන් නිසා එම කර්මාන්තයේ යම් බිඳ වැටීමක් පැවතියත් ලබන වසර මැයි මස වනවිට නැවතත් බිත්තර හා කුකුළු මස් කර්මාන්තය ඉහළ නැන්වීම සඳහා ස්ථිර වැඩ පිළිවෙළක් ආරම්භ කිරීමට ද මෙහිදී සාකච්ඡා විය.
