මේ ආණ්ඩුව යටතේ තවමත් පෙට්රල් ඔක්ටේන් 92 ලීටරයක් සඳහා 143.82ක්, පෙට්රල් 95 ලීටරයක සඳහා රුපියල් 154.39ක්, ඔටෝ ඩීසල් ලීටරයක් සඳහා රුපියල් 97.47ක්, සුපර් ඩීසල් ලීටරයක් සඳහා රුපියල් 120.67ක් බදු ගසන බවත් මේ බදු ඉවත් කිරීමට පොරොන්දු ලබා දී පැමිණි ජාතික ජන බලවේග ආණ්ඩුව එම බදු ඉවත් කරන්නේ කවදා දැයි ජනතාවට හෙළිදරවු කළ යුතු බවත් පාර්ලිමේන්තු මන්ත්රී දයාසිරි ජයසේකර කීවේය.
ඔහු පැවසුවේ තවමත් මේ බදු මුදල් හිටපු ඇමති කාංචන විජේසේකරගේ සාක්කුවට යනවා නම් එය නවත්වන්නේ කවදැයි කියන ලෙස ද මන්ත්රීවරයා පැවසුවේය.
“අප්රේල්වල ඉඳන් වෙබ් අඩවියේ මිල සූත්රයට අදාල දත්ත සටහන් කරන්නෙ නෑ. ජූනි මාසයේ ඔක්ටේන් 95 ලීටයක් ගොඩබෑවේ රුපියල් 161.18. ක මිලකට. 143.82ක් බදු වශයෙන් ගන්නවා. පෙට්රල් 95 ගොඩබෑමේ දී මිල රුපියල් 154.39ක් . . ඔටෝ ලීටර් ගේන්නේ 185.67ක මිලකට. ලංකා සුපර් ඩීසල් ලීටරය ගොඩබෑමේ ගාස්තුව 157.87යි.”
“දැන් මේ බද්ද අඩු කරනවා කිව්වා. සහනය දෙනවා කියලා කිව්වා. කවද්ද මේ සහනය ජනතාවට දෙන්නේ. පෙට්රල් ලීටරයක් 161.18ට මේ රටේ ජනතාවට දෙන්න පුලුවන්. ඔබතුමාලා කිව්වේ මේ මුදල් කාංචන විජේසේකර හොරකම් කරනවා කියලා. බදු මුදල් හොරකම් කරනවා කියලා. තවදුරටත් කාංචන විජේසේකරගේ සාක්කුවට යන එක නවත්වන්නේ කවද්ද?”
ඊට පිළිතුරු දුන් විදුලි බල හා බලශක්ති ඇමති ඉංජිනේරු කුමාර ජයකොඩි පැවසුවේ ඉන්ධන සම්බන්ධව මුල්ය ගනුදෙනුවන ආකාර දෙකක් ඇති බවය.
” එකක් තමයි ප්රිමියම් එක හරහා සාක්කුවට යන එක. බදු සල්ලි සාක්කුවට යන්න බෑ. ප්රිමියම් එක මෙට්රික් ටොන් එකක ඩොලර් 37ට තිබ්බ එක මෙට්රික් ටොන් එකට දැන් ඩොලර් 5ට අඩු වෙලා. බොහෝ විට 3ට ආසන්න ප්රමාණයකින් තමයි ගෙවන්නෙ. ඒක වෙනම එකක්. එතකොට හිතාගන්න පුලුවන්නෙ කෝකද සාක්කුවට ගියේ කියලා. ඒක වෙනස් වෙනවා ටෙන්ඩර් එක අනුව. ඒ කාරණාව තමයි අපි මුල ඉඳන් පැහැදිලි කළේ.”
“ඔය තියෙන්නේ අපි ආණ්ඩුව ගන්නකොට තිබ්බ බද්ද. ඔය බද්ද ඇතුළෙ තියනවා රජයේ වැට් සහ අනෙක් රජයේ බදු. ඒ බදුවලට අමතරව තිබෙන්නේ අපි ආණ්ඩුව භාරගන්නකොටත් තිබුණු බිලියන 884ක රජය විසින් වරාගත්තු ණය. මහා භාණ්ඩාගාරයට බිලියන 884ක් ගෙවිය යුතුයි. ඒ වෙනුවෙන් ලීටරයකට රුපියල් 50ක මුදලක් එකතු වෙලා තියනවා. ඒ ණය මුදල් තවම ගෙවලා නෑ. ගෙවිලා තිබෙන්නේ බාගෙට ආසන්න ප්රමාණයක්. ඒ හින්දා ඒක ගෙවලා ඉවර වුනාම අපට පුලුවන් වෙනවා ඒක අයින් කරලා දාන්න.
අනෙක් ඒවා ස්ථාවර රජයේ බදු විතරයි තියෙන්නේ.” ඇමතිවරයා පැහැදිලි කළේය.
