එළැඹෙන වසර සඳහා ඉදිරිපත් කිරීමට නියමිත අයවැය යටතේද වසර පහකට වඩා පැරණි වාහන ආනයනය කිරීමට අවසර නොදීමට රජය තීරණය කර ඇති බව සන්ඩේ ටයිම්ස් පුවත්පත වාර්තා කරයි.
ඒ අනුව, රජයේ ආදායම් උත්පාදනය සමතුලිත කිරීම සඳහා ගෙනයන පුළුල් උපාය මාර්ගයේ කොටසක් ලෙස මෙම තීරණය පැමිණ ඇති බව වාර්තා වේ.
මේ අතර ලබන වසරේදී රජය රුපියල් බිලියන 550 ක ඇස්තමේන්තුගත බදු ආදායමක් අපේක්ෂා කරයි. එසේම මේ වසරේ වාහන ආනයනයෙන් රුපියල් බිලියන 650 ක් පමණ බදු ආදායමක් අපේක්ෂා කෙරේ.
මේ වන විට, පෙබරවාරි මාසයේ ආනයන තහනම ලිහිල් කිරීමෙන් පසු වාහන ආනයනයෙන් රුපියල් බිලියන 450 ඉක්මවූ බදු ආදායමක් ලබා ඇත.
ඒ අනුව, ලබන වසරේ අයවැය සකස් කිරීම අවසන් අදියරට ළඟා වෙමින් පවතින බැවින්, පවතින බදු සංශෝධනය කිරීමට ඉඩක් නොමැති බව නිලධාරීහු අනාවරණය කළ බව සන්ඩේ ටයිම්ස් පුවත්පත වාර්තා කරයි.
ලබන වසරේ අයවැය මඟින් අපනයන-නැඹුරු ආර්ථිකයක් කෙරෙහි අවධානය යොමු කරමින්, අපනයනකරුවන්ට දිරිගැන්වීම් ද ලබා දෙනු ඇතැයි අපේක්ෂා කෙරේ.
මෙම වසරේ වෙන් කළ රුපියල් බිලියන 229 ට සාපේක්ෂව අස්වැසුම සුභසාධන වැඩසටහනට එළැඹෙන වසරේ රුපියල් බිලියන 240 ක් වෙන් කිරීමට අපේක්ෂා කරණ බවටද වාර්තා වේ.
එමෙන්ම, ධීවර, කෘෂිකාර්මික සහ තේ අංශ සඳහා ද අයවැයෙන් දිරිගැන්වීම් ලැබෙනු ඇතැයි අපේක්ෂිතය.
මීට අමතරව, මෙම වසරේ සිට අදියර වශයෙන් සිදුවන රාජ්ය සේවකයින්ගේ වැටුප් වැඩිකිරීමට ලබන වසරේ සඳහා රජයට අමතර රුපියල් බිලියන 100 ක් වැය වනු ඇතැයි අපේක්ෂා කෙරේ.
