ශ්රී ලංකා පාසල් ක්රිකට් සංගමය හා ශ්රී ලංකා ක්රිකට් විධායක සභාව මගින් ලබන වසරේ සියලුම පළමු පෙළ( Division 1) පාසල් ක්රිකට් තරග දින දෙකේ සිට දින තුන දක්වා දීර්ඝ කිරීමට ගෙන ඇති තීරණය බොහෝ විදුහල්පති වරුන්ගේත්, දෙමව්පියන්ගේත් දෝෂ දර්ශනයට හේතු වී තිබේ.
මේ හේතුවෙන් අ.පො.ස සාමාන්ය පෙළ හා උසස් පෙළ ඉගෙනුම ලබමින් ක්රිකට් ක්රීඩාවේ නිරත වන තම දරුවන්ගේ අධ්යාපන කටයුතු එහෙම පිටින් අඩාල වන බව දෙමව්පියෝ පවසති.
දින තුනේ තරග පැවැත්වීමේදී දුර බැහැර තරග වලට යන ක්රීඩකයන් කලින් දිනයේ පිටත්ව යාම හා පසුවදා ආපසු ඒමේදී ඔවුන්ට දින හතරක් හෝ පහක් පාසලේ අධ්යාපන කටයුතු වල නිරත වීමට කාලයක් නොලැබෙන බවත් මේ අනුව සතියකට එක තරගයක් බැගින් තරග පහලොවක් පමණ ක්රීඩා කරන්නට වීමෙන් විෂය නිර්දේෂයන් එහෙම පිටින්ම මග හැරෙන බවත් ඔවුහු පෙන්වා දෙති.
මෙම තීරණය අලුතින් තේරී පත් වූ පාසල් ක්රිකට් සංගමයේ හා ක්රිකට් ආයතනයේ උප සභාපතිවරයකු විසින් ටෙස්ට් ක්රිකට් ක්රීඩකයන් කල් තබා පුහුණු කිරීමේ අටියෙන් ඉදිරිපත් කරන ලද්දක් බව වාර්තා වේ.
ක්රිකට් ආයතනය මගින් සංවිධානය කරන අවුරුදු 23 න් පහළ තරගාවලියවත් දින තුනක් නොපවත්වද්දී කිසිසේත් ප්රායෝගික නොවන පරිදි පාසල් තරග මෙසේ දින තුනක් පැවැත්වීමට තීරණය කිරීම විහිළුවක් බවත් ඔවුහු පවසති.
