ජාලිය වීරක්කොඩි –
රට ඉල්ලුවේ ගෞරවණීය පරාජයකි. එහෙත් තමන්ගේ රටේ තමන්ගේ ක්රීඩාංගනවල, තමන්ට උචිත ලෙස සකස්කරගත් තණ තීරු මත තමන්ම කාසියේ වාසිය දිනාගෙන තරග කිරීමට පැමිණ ඉනිමකින් හා ලකුණු 222ක් පැරදී කුජීත වූ පසු ඔවුන් අපට කුමක් කියන්න සූදානම් දැයි වැටහෙන්නේ නැත.
මුල් ඉනිම ශ්රී ලංකා පිල පන්දු ඕවර 48ක් තුළ ලකුණු 166කට දැවී ගියේය. පිළිතුරු ලෙස පකිස්ථාන කණ්ඩායම කඩුළු 05කට ලකුනු 576ක් රැස් කළේය. අබ්දුල්ලා ෂාෆිකියු ලකුනු 202කි. අඝා සලමන් නොදැවී ලකුණු 132කි. දිවා ආහාරයට පෙර පකිස්ථාන කණ්ඩායම සිය ඉනිම අත්හිටුවා ශ්රී ලංකා පිලට ක්රීඩා කරන්නට දෙන විට ලකුණු 410ක් ඉදිරියෙනි. ඉනිමක පරාජයෙන් බේරීමට ලකුණු 410ක් ලබා ගත යුතු විය. අදත් හෙටත් ඉතිරිව තිබිණි.
එහෙත් අද තරගය නිමා වීමට දෙපැයකට පෙර ශ්රී ලංකා කණ්ඩායම ලකුණු 188කට දැවී ගියේය. මුහුණ දුන්නේ පන්දු ඕවර 67.4කට පමණි. පකිස්ථානු වමත් ඔතඩොක් පන්දු යවන්නා, නෝමන් අලි ලකුණු 70කට ශ්රී ලංකා කඩුළු 07ක් බිඳ හෙළුවේය. ඉතිරි කඩුළු 03 විසි හැවිරිදි දකුණත් වේග පන්දු යවන්නා, නසීම් ෂා විසින් දවා ගත්තේය.
ඈන්ජලෝ මැතිව්ස් නොදැවී ලකුණු 63ක් ලැබුවේය. කණ්ඩායමේ 08 දෙනෙක් ලකුණු 16ට අඩුය. ආරම්භක පිතිකරු නිශාන් මධුෂ්ක 31ක් නායක දිමුත් කරුණාරත්න 41ක් ලැබුවේය. එපමණි.
තරගයේ වීරයා අබ්දුල්ලා ෂාෆිකියු ය. තරගාවලියේ වීරයා ආඝා සලමන්ය.
අප මේ ගහන්නේ අහවල් ක්රිකට් දැයි දැන් අපේ කණ්ඩායම නිවාඩු පිට කල්පනා කළ යුතුය. තරගය ක්රීඩා කලේ දවස් තුනකි. හෙට ඔවුන්ට නිවාඩු දවසක් නිසා කල්පනා කරන්නට කාලයත් තිබේ. අප එසේ කියන්නේ මේ ඔවුන්ගේ වෘත්තිය බැවිනි. කෝටි දෙකක් වන අප වැනි මිනිස්සුන්ට ක්රිකට් ගහන්න බැරි නිසා අපේ කෝටි දෙක අතරින් හොඳම 11 තොරාගෙන අප නියෝජනය කරන්නට ඔවුන් පිටියට බැස ඇති බැවිනි.
පරාජය පිලිගත යුතු බව අපි ලියා තබා ඇත්තෙමු. එසේ කතා කළ හැක්කේ පිළිගත හැකි පරාජයක් ගැන පමණි. අප ඉල්ලුවේ ජයග්රහණයක් නොව. පිළිගත හැකි පරාජයකි.
එහෙත් ඔවුහු අපව පස් පඩංගුවේ කුජීත කළහ. ඒ ගැන දුකය.
