පසුගිය වකවානුව තුළ බංකොළොත් වූ ආර්ථිකය තුළ ව්යාපාරික අවස්ථා බිඳවැටී බැංකු ණය ගෙවා ගත නොහැකිව දේපල බැංකුවට සින්න වූ සුලු හා මධ්ය පරිමාණ ව්යාපාරිකයන්ට සහනයක් ලබා දීම සඳහා දෙසැම්බර් 15 වැනිදා දක්වා ක්රියාත්මක වීම අත් හිටුවා තිබූ පරාටේ නීතිය අත්හිටුවීම මාර්තු මස 31 වැනිදා දක්වා දීර්ඝ කිරීමට රජය තීරණය කර තිබේ.
1990 අංක 04 දරන බැංකු මගින් ණය අය කරගැනීමේ විශේෂ විධි විධාන පනත හෙවත් පරාටේ නීතිය යටතේ බිඳවැටුන ව්යාපාර ගණනාවක දේපල බැංකු මගින් අත් පත් කරගැනීමට නියමිතව තිබිණි.
කුඩා හා මධ්ය පරිමාණ ව්යවසායකයින්ගේ ඉල්ලීම සලකා බලා මේ දෙපල වෙන්දේසි කිරීම දෙසැම්බර් 15 දක්වා තාවකාලිකව අත් හිටුවීමට පැවති රජය තීරණය කර තිබිණි.
මේ සම්බන්ධව අද කැබිනට් තීරණ දැනුම් දීමේ මාධ්ය හමුවේ දී කැබිනට් මාධ්ය ප්රකාශක අමාත්ය වෛද්ය නලින්ද ජයතිස්ස මෙසේ ප්රකාශ කළේය.
“මේ අය පාස්කු දින ප්රහාරයෙන් කොවිඩ් වසංගතයෙන් සහ රටේ ඇති කරන ලද ආර්ථික අර්බුදයෙන් පීඩාවට පත්වුන අය. මේ කුඩා හා මධ්ය පරිමාණ ව්යවසායකයින් කණ්ඩායම රජයට විටින් විට ඉලලීම් ඉදිරිපත් කළා මේ නීතිය ක්රියාත්මක වීම තව දුරටත් අත් හිටුවා තව දුරටත් සහන කාලයක් ලබා දෙන්න කියලා. ”
“ඒ පිළිබඳව කැබිනට් මණ්ඩලයේ අවධානය යොමු වුනා. ඒ අනුව ජානාධිපතිතුමා ඉදිරිපත් කළා කැබිනට් පත්රිකාවක් මේ බැංකු විසින් පරාටේ නීතිය ක්රියාත්මක කිරීම අත්හිටුවීමේ කාලය මාර්තු මාසයේ 31 දින දක්වා දීර්ඝ කරන්න.”
“ඒ අනුව ශ්රී ලංකා මහ බැංකුව, රාජ්ය සහ පෞද්ගලික බැංකු සහ අනෙකුත් රාජ්ය ආයතන ඇතුළු මේකට සම්බන්ධ සියලු පාර්ශවයන්ගේ සක්රීය දායකත්වයෙන් මෙම ගැටලුව විසඳීම සඳහා බහුමානී යාන්ත්රණයක් සකස් කිරීමටත් මුදල් හා ක්රම සම්පාදන ආර්ථික සංවර්ධන අමාත්යවරයා හැටියට ජනාධිපතිවරයා ඉදිරිපත් කළ කැබිනට් පත්රිකාවට කැබිනට් මණ්ඩලයේ අනුමැතිය හිමි වුනා.”
කැබිනට් ප්රකාශකවරයා පැවසුවේ මේ සුළු හා මධ්ය පාරිමාණ ව්යාපාරිකයින් නැවත ආර්ථික ක්රියාවලියට දායක කරගැනීම සඳහා පරාටේ නීතිය සම්බන්ධව සහනයක් ලබා දුන්නා සේම රජය මගින් විශේෂ යාන්ත්රණයක් ද සකස් කරනු ලබන බවය.
