ලසන්ත ඝාතන සැක කරුවන් නඩුවෙන් නිදහස් කිරීම සඳහා පාදක වූ නෛතික කරුණු සම්බන්ධව නීතිපති දෙපාර්තමේන්තුව ප්රකාශ කර තිබේ.
විවාදයට ලක්ව තිබෙන්නේ නීතිපතිවරයාගේ අත්සනින් ජනවාරි 27 දා අපරාධ පරීක්ෂණ දෙපාර්තමේන්තුවේ අධ්යක්ෂවරයාට යැවූ ලිපියකි. මේ ලිපියේ ලසන්ත වික්රමතුංග ඝාතනයට සම්බන්ධ සැකකරුවන් තුන්දෙනෙක් සම්බන්ධව නීති මගින් කටයුතු කිරීමට අදහස් නොකරන බවට නීතිපතිවරයා විසින් ප්රකාශ කර තිබිණි.
එම චූදිතයන් නිදහස් කළ හැකි බව මහේස්ත්රාත් අධිකරණය වෙත වාර්තා කර ඒ පිළිබඳව අධිකරණය ගත් ක්රියාමාර්ග දින 14ක් ඇතුළත දන්වන ලෙස ද නීතිපතිවරයා යොමු කර ඇති ලිපියේ සඳහන් විය.
නීතිපතිවරයා චූදිතයන් නඩුවලින් නිදහස් කිරීමට හේතුව
ප්රේම් ආනන්ද උදලාගම නම් හිටපු හමුදා බුද්ධි අංශ නිලධාරියාත්, එවකට ගල්කිස්ස අපරාධ විමර්ශන අංශයේ ස්ථානාධිපති හෙට්ටිආරච්චිගේ දොන් තිස්සසිරි සුගතපාලත් එවකට ප්රදේශය භාර නියෝජ්ය පොලිස්පති විතාරණ ආරච්චිගේ සිරිමෙවන් ප්රසන්න නානායක්කාරත් නීතිපතිවරයාගේ ලිපිය මගින් නිදහස් කර තිබිණි.
මේ නිර්දේශය ලබා දෙන්නට නීතිපතිවරයා කටයුතු කරන්නේ යුද හමුදා බුද්ධි අංශයේ හිටපු සාමාජික ප්රේම් ආනන්ද උදලාගම හඳුනා ගැනීමේ පෙරට්ටුවක දී ලසන්ත වික්රමතුංගගේ රියදුරු විසින් හඳුනා ගත්ත ද පසුව එම හඳුනා ගැනීමට සිදුකළ අවස්ථාවට පෙර අපරාධ පරීක්ෂණ දෙපාර්තමේන්තුව ප්රේම් ආනන්ද උදලාගමව තමන්ට පෙන්වූ බවට රියදුරා ප්රකාශ කර ඇති බවය.
තිස්සසිරි සුගතපාලට සහ ප්රසන්න නානායක්කාර යන පොලිස් නිලධාරීන්ට අපරාධ නඩුවක් ගොනු කිරීමට තරම් ප්රබල සාක්ෂි නොමැති බැවින් මෙම නිර්දේශය සිදුකළ බව නීතිපතිවරයා ප්රකාශ කර තිබිණි.
අධිකරණයේ දි සැකකරුවන් ගැන කියැවුන කතා
කෙසේ වෙතත් අධිකරණයේ දී මොවුන් දෙදෙනා සම්බන්ධයෙන් කරුණු අනාවරණය වී තිබිණි. තිස්සසිරි සුගතපාල වෙනුවෙන් පෙනී සිටි නීති රසික වීරසූරිය එහිදී ප්රකාශ කර තිබුණේ ලසන්ත වික්රමතුංග ඝාතනය කළ අවස්ථාවේ ඔහුගේ සටහන් පොතේ සටහන් කර තිබූ යතුරු පැදි දෙකේ අංක සම්බන්ධයෙන් විමර්ශනය නොකරන ලෙසට එවක ප්රදේශය භාර නියෝජ්ය පොලිස්පතිවරයා වූ ප්රසන්න නානායක්කාර තම සේවාදායකයාට තර්ජන කර ඇති බවය.
එම විමර්ශන ඉදිරියට කළහොත් තිස්සසිරි සුගතපාලට සහ ඔහුගේ පවුලේ සාමාජිකයින්ට අත්විය හැකි බවට ඔහු තර්ජනය කර ඇතැයි නීතිඥවරයා එදින අධිකරණයට දැනුම් දුන්නේය. ඒ අනුව අදාල සටහන්පොත සහ විමර්ශන වාර්තා තමසේවාදායකයා විසින් නියෝජ්ය පොලිස්පති ප්රසන්න නානායක්කාර වෙත ලබා දී ඇති බවය.
කවුද මේ ප්රේම් සැකකරුවන්
ප්රේම් ආනන්ද උදලාගම යනු යුද හමුදා බුද්ධි අංශයේ හිටපු සාමාජිකයෙකි. ලසන්ත වික්රමතුංගගේ රියදුරු ලෙස සේවය කළ දේවමුල්ලගේ කරුණාරත්න පැහැරගෙන ගොස් තර්ජනය කිරීම සම්බන්ධයෙන් උදලාගමට චෝදනා එල්ල වී තිබිණි.
මීට අමතරව මාධ්යවේදී කීත් නොයාට පැහැරගෙන ගොස් පහර එල්ල කිරීමත්, උපාලි තෙන්නකෝන්ට පහර එල්ල කිරීමත් සම්බන්ධ චෝදනා කීපයක් ඔහුට එල්ල වී ඇ.ත.
තිස්සසිරි සුගතපාල සහ ප්රසන්න නානායක්කාර චෝදනා ලබන්නේ සාක්ෂි විනාශ කිරීම සම්බන්ධවය. තිස්සසිරි සුගතපාල යනු ගල්කිස්ස පොලිසියේ අපරාධ අංශයේ හිටපු ස්ථානාධිපතිවරයා ය. ප්රසන්න නානායක්කාර යනු හිටපු පොලිස්පතිවරයෙකි.
ලසන්ත වික්රමතුංගගේ සටහන් පොතේ තිබූ සටහන් විනාශ කිරීම සම්බන්ධයෙන් ඔවුන්ට චෝදනා එල්ල වී තිබිණි.
