මැද පෙරදිග ගැටුම ආරම්භ වීමත් සමග මේ වනවිට රටේ සෑම ඉන්ධන පිරවුම් හලකම ඇති වී ඇති දිගු පෝලිම් අවිචාරවත්ව කලබලයට පත් ජනතාව විසින් කරන අනවශ්ය මිලදී ගැනීමක් බව පෙනී ගොස් තිබේ.
ඛණිජ තෙල් නීතිගත සංස්ථාව පවසන්නේ අප්රේල් සහ මැයි මාසය දක්වා ඇණවුම් කර ඇති ඉන්ධන තොග ප්රමාදයකින් තොරව ලැබෙන බවට සහතික විය හැකි බවය.
එබැවින් මේ කලබලයට පත්වීම කිසිම ප්රායෝගකව පෙනෙන ගැටලුවක් නිසා ඇති වූවක් නොවන බවත්, ජනතාව මේ පිළිබඳව නිසි අවබෝධයක් ඇතිව කටයුතු කළ යුතු බවත් ඛණිජ තෙල් නීතිගත සංස්ථාව පෙන්වා දෙයි.
අද (01) පැවැති මාධ්ය සාකච්ඡාවකට එක්වෙමින් ඛණිජ තෙල් නීතිගත සංස්ථාවේ සභාපති ඩී.ජේ. රාජකරුණා ප්රකාශ කළේ, අදාළ ඉන්ධන ඉන්දියාවෙන් සහ සිංගප්පූරුවෙන් ලැබීමට නියමිත බැවින් මැද පෙරදිග ඇති වී තිබෙන ගැටුම්කාරී තත්ත්වය මෙරටට බලපාන්නේ නැති බවත්, අනවශ්ය කලබලයක් ඇති කරගැනීමට කිසිම හේතුවක් නොමැති බවත්ය.
“අපි මේක කියන්නේ වගකීමක් සහිතව. ඒ නිසා පෝළීම්වල ඉන්න එකේ තේරුමක් නැහැ. අපි අද (01) තෙල් බෙදාහරින්න නෙවෙයි හිටියේ. ජනතාව තෙල් පරිභෝජනය කරන නිසා ඉන්ධන බෙදාහැරීමේ කටයුතු කරන සියලු සේවකයන් අපි සේවයට කැඳෙව්වා. දැන් තෙල් නිකුත් කිරීම ආරම්භ කළා. ඒ වගේම හෙට (02) පෝය දිනයක් වුණත්, තෙල් සැපයුම් කරනවා. “
“අපි සියලුම පිරවුම්හල්වලට කියලා තියෙනවා බූලිවලට තෙල් සපයන්න එපා කියලා. බූලිවලට තෙල් අරන් ගිහින් අලෙවි කරන්න උත්සහ කළොත්, අපි නීතිය ක්රියාත්මක කරනවා.”
