අධිකරණ නියෝග මත රඳවාගෙන ප්රශ්න කරමින් සිටි සැකකරුවෙක් නඩු භාණ්ඩ පෙන්වන්නට යන අතර පොලිස් අත් අඩංගුවේ දී මිය ගොස් තිබේ.
පොලිිසිය පවසන්නේ පොලිස් ජිප් රථයකින් අවිස්සාවේල්ල මානියම්ගම ඇත්පන්තිය පාරේ ගමන් කරද්දී මාංචු සහිව සිටි සැකකරු පොලිස් නිලධාරියෙකුගේ ගෙල මාංචුවලින් සිර කර ඝාතනය කිරීමට උත්සාහ කළ බවත් අනෙකුත් නිලධාරීන් එම පොලිස් නිලධාරියා බේරා ගැනීමට යෑමේ දී සැකකරු මිය ගිය බවත්ය.
පොලිස් අත් අඩංගුවේ දී ඝාතනය වූ සැකකරු මන්නා රමේෂ් නැමැති පුද්ගලයාගේ මෙහෙයවීමෙන් අවිස්සාවේල්ල පොලිස් වසමේ තල්දූව ප්රදේශයේ දී ටී 56 ගිනි අවියකින් වෙඩි තබා ද්විත්ව ඝාතනයක් සිදු කර පුද්ගලයින් දෙදෙනෙකුට බරපතල තුවාල සිදුකිරීමේ සිද්ධියේ ඝාතකයා සමග පැමිණි පැදිකරු බව වාර්තා වේ.
පොලිසිය සිය නිවේදනයෙන් ප්රකාශ කරන සිටින්නේ මෙවැන්නකි.
මෙම ඝාතන සැකකරු හොරොයින් ග්රැම් 06යි මිලිග්රෑම් 170ක් සමග පසුගිය දා විශේෂ කාර්ය බලකාය මගින් අත් අඩංගුවට ගෙන වැඩිදුර විමර්ශනය සඳහා ඔහුව හම්බන්තොට පොලිසියට භාර දී තිබිණි.
අනතුරුව මෙම සැකකරු පසුගිය 12 වැනිදා අපරාධය සිදුවූ ප්රදේශය ආවරණය කරන අවිස්සාවේල්ල පොලිස් ස්ථානයට රැගෙන ගොස් පසුව අවිස්සාවේල්ල මහේස්ත්රාත්වරයා වෙත ඉදිරිපත් කර ප්රශ්න කිරීම සඳහා පැය 72ක් රැඳවුම් නියෝග ලබා ගෙන ඇත.
පොලිසියට අනුව ප්රශ්න කිරීමේ දි අනාවරණය කරගත් තොරතුරු මත අද (15) අවිස්සාවේල්ල පොලිස් ස්ථානයේ නිලධාරීන් පිරිසක් සැකකරු ද රැගෙන පොලිස් ජිප් රථයකින් අවිස්සාවේල්ල මානියම්ගම ඇත්පන්තිය පාර ප්රදේශයට පිටව ගොස් තිබේ.
පොලිසිය කියන්නේ ඔහු ජිප් රථයේ යනවිට පැළඳ සිටි මාංචු වලින් පොලිස් නිලධාරියෙකුගේ ගෙල සිරකිරීමට උත්සාහ කළ බවය.
එම අවස්ථාවේ එම නිලධාරියා බේරා ගැනීමට කටයුතු කිරීමේ දී ඇති වූ තත්ත්වයක් මත සැකකරු හා එම පොලිස් නිලධාරියා තුවාල ලබා ඇතැයි පොලිසිය කියයි.
පොලිසිය පවසන පරිදි තුවාල කරුවන් දෙදෙනාම අවිස්සාවේල්ල රෝහලට ගෙන ගොස් ඇති අතර රෝහල්ගත කිරීමෙන් පසු සැකකරු මිය ගොස් ඇත.
මියගොස් ඇත්තේ වයස අවුරුදු 21 පමණ වන අවිස්සාවේල්ල මානියංගම ප්රදේශයේ පදිංචිකරුවෙකි.
ඔහු හෙරොයින් සන්තකයේ තබා ගැනීම, ජීව අත් බෝම්බයක් සන්තකයේ තබා ගැනීම, තියුණු ආයුධවලින් පුද්ගලයෙක් කපා කොටා බරපතල තුවාල කිරීම, සම්බන්ධව අවිස්සාවේල්ල අධිකරණයේ නඩු පැවරී ඇති පුද්ගලයෙක් බව පොලිසිය කියයි.
අවිස්සාවේල්ල පොලිසිය වැඩි දුර පරීක්ෂණ පවත්වයි.
